தமிழ் சினிமாவில் பிரபல நகைச்சுவை நடிகராக திகழ்ந்த சிவ நாராயணமூர்த்தி உடல் நலக்குறைவால் காலமானார்.
தமிழ் சினிமாவில் இன்றும் பிரபலமாக இருக்கும் பல நகைச்சுவை காட்சிகளில் நடித்து ரசிகர்களை கவர்ந்தவர் சிவ நாராயணமூர்த்தி. பல முன்னணி நடிகர்களின் படங்களிலும் இவர் நடித்துள்ளார். இந்நிலையில் சிவா நாராயணமூர்த்தி உடல்நலக்குறைவால் மரணமடைந்துள்ள சம்பவம் ரசிகர்கள் மத்தியில் சோகத்தை ஏற்படுத்தியுள்ளது.
தமிழ் சினிமாவில் இயக்குநர் விசு மூலம் அறிமுகப்படுத்தப்பட்டவர் நடிகர் சிவ நாராயணமூர்த்தி. இவரின் முதல் படமாக பூந்தோட்டம் அமைந்தது. அதன்பின்னர் தொடர்ச்சியாக விவேக் மற்றும் வடிவேல் அணியில் இணைந்து பல நகைச்சுவை காட்சிகளில் நடித்து பிரபலமானர். பெரும்பாலும் காமெடி காட்சிகளில் தோன்றி பிரபலமான சிவ நாராயணமூர்த்தி தமிழ் சினிமாவின் முன்னணி நடிகர்களான ரஜினி, அஜித், விஜய் உட்பட பலரின் படங்களில் நடித்துள்ளார். இவர் சுமார் 300 படங்களுக்கு மேலும் நடித்துள்ளார்.
இந்நிலையில் சிவ நாராயணமூர்த்தி தனது சொந்த ஊரான பட்டுக்கோட்டையில் வசித்து வந்த நிலையில், அவருக்கு திடீர் உடல்நலக்குறைவு ஏற்பட்டு நேற்றிரவு 8.30 மணியளவில் உயிரிழந்துள்ளார். இவருக்கும் அவரது மனைவி புஷ்பவல்லிக்கும் லோகேஷ், ராம்குமார், ஸ்ரீதேவி என்ற மூன்று பிள்ளைகள் உள்ளனர். சிவா நாராயணமூரத்தியின் இறுதி சடங்கு அவருடைய சொந்த ஊரான பட்டுக்கோட்டையில் இன்று மதியம் 2.00 மணிக்கு நடைபெறும் என கூறப்பட்டுள்ளது.
சிவா நாராயணமூரத்தியின் திடீர் மறைவு ரசிகர்கள் மத்தியில் சோகத்தை ஏற்படுத்தியுள்ளது. இதனையடுத்து திரையுலக பிரபலங்கள் மற்றும் ரசிகர்கள் பலரும் அவரது மறைவிற்கு இரங்கல் தெரிவித்து வருகின்றனர்.