தமிழ்நாட்டில் உள்ள பல்கலைக்கழகங்களில் கம்பா் ஆய்வு இருக்கை அமைக்க வேண்டும் என ஆளுநா் ஆா்.என்.ரவி வேண்டுகோள் விடுத்தாா்.
சுதந்திரப் போராட்ட வீரா் வ.வே.சு. ஐயா் எழுதிய ‘கம்பராமாயணம்-ஓா் ஆய்வு’ எனும் நூல் வெளியீட்டு விழா சென்னை மயிலாப்பூரில் உள்ள பாரதிய வித்யா பவனில் நேற்று புதன்கிழமை நடைபெற்றது. இதில் சிறப்பு விருந்தினராக கலந்துகொண்ட ஆளுநா் ஆா்.என்.ரவி நூலை வெளியிட, முதல் பிரதியை பவன்ஸ் சென்னை கேந்த்ரா குழு உறுப்பினா் டாக்டா் பிரியா ராமசந்திரன் பெற்றுக்கொண்டாா். தொடா்ந்து ஆளுநா் ஆா்.என்.ரவி பேசியதாவது:-
சமூகம் நல்லிணக்கத்துடன் இருக்க ஒவ்வொரு உயிரின் மீதும் அன்பு செலுத்த வேண்டும். இந்திய நாட்டின் அழகை ராமாயணம் மூலம் அறியலாம். அதில் உள்ள ஒவ்வொரு கதாபாத்திரமும் உறவுகள் எப்படி இருக்க வேண்டும் என்பதை வலியுறுத்துகிறது.
ராமாயணம் சம்ஸ்கிருதத்தில் இருந்ததால் சாதாரண மனிதா்கள் கற்க முடியாமல் இருந்தது. இதை சாதாரண மனிதா்களும் அறிந்துகொள்ளும் வகையில் கம்பா், துளசிதாசா் உள்ளிட்டோா் தங்கள் மொழிகளில் படைத்துள்ளனா். கம்பா் எழுதிய ராமாயணம் எளிய நடையில் அனைவரும் புரிந்துகொள்ளும் வகையில் உள்ளது. அதைப் படிக்கும்போது உயிரோட்டமாக இருக்கும். இத்தகைய சிறப்பு வாய்ந்த கம்பருக்கு புதுச்சேரியில் உள்ள பல்கலைக்கழகத்தில் பிரத்யேக ஆய்வு இருக்கை உள்ளது. தமிழ்நாட்டில் உள்ள பல்கலைக்கழகங்களிலும் கம்பருக்கு ஆய்வு இருக்கை அமைக்க வேண்டும். இவ்வாறு அவா் கூறினார்.
மத்திய செம்மொழித் தமிழாய்வு நிறுவன துணைத் தலைவா் சுதா சேஷய்யன் பேசுகையில், மேலை நாட்டு இலக்கியங்கள் பெரும்பாலும் சுவாரஸ்யத்தை தூண்டும் வகையில் முடிவை நோக்கி நகரும். அதன் பின், அந்த முடிவுக்கான காரணங்கள் விளக்கப்படும். அதுவே இந்திய இலக்கியங்கள் கதையின் போக்கில் நகரும். ராமாயணத்தின் ஒவ்வொரு அத்தியாயமும் கதையை முன்னோக்கி கொண்டுசெல்லும் என்றாா்.