‘பரமசிவன் பாத்திமா’ படத்தின் டிரைலரை நாதக தலைமை ஒருங்கிணைப்பாளர் சீமானும், பாஜக தலைவர் அண்ணாமலையும் இணைந்து வெளியிட்டுள்ளனர்.
விமல் நடிப்பில் உருவாகி வரும் படம் பரமசிவன் பாத்திமா. இதில் விமலுக்கு ஜோடியாக சாயா தேவி கண்ணன் நடித்துள்ளார். மேலும் படத்தில் சாயாதேவி, எம்.எஸ்.பாஸ்கர், கூல் சுரேஷ், காதல் சுகுமார் உள்ளிட்டோர் நடிக்கின்றனர். படத்தை லட்சுமி கிரியேஷன்ஸ் நிறுவனத்தின் சார்பில் கார்வண்ணன் தயாரித்து இயக்கியுள்ளார். இவர் ஏற்கெனவே சேரன் நடித்த ‘தமிழ்க்குடிமகன்’ படத்தை இயக்கி உள்ளார். தீபன் சக்கரவர்த்தி இசையமைக்க எம். சுகுமார் ஒளிப்பதிவு பணிகளை கவனித்துள்ளார்.
இந்த படத்தின் கதை காதலை மையமாகக்கொண்டு அமைக்கப்பட்டுள்ளது. படப்பிடிப்பு நிறைவடைந்து படம் ரிலீஸுக்கு தயாராகி வருகிறது. இந்த நிலையில் படத்தின் டிரைலர் இன்று வெளியாகியுள்ளது.
இதுகுறித்து சீமான் எக்ஸ் தளத்தில் கூறியுள்ளதாவது:-
அன்பு இளவல் இசக்கி கார்வண்ணன் அவர்களது இயக்கத்தில் அன்புத்தம்பி விமல் அவர்கள் நடித்து, விரைவில் வெளியாகவிருக்கும் ‘பரமசிவன் பாத்திமா’ திரைப்படத்தின் முன்னோட்டத்தை வெளியிடுவதில் பெரிதும் மகிழ்கிறேன்.
மண்ணுக்கும், மக்களுக்குமான நற்கருத்துகளைக் கொண்டு ஆகச்சிறந்த படைப்பாக வெளிவரும் இத்திரைப்படம் பெரும் வெற்றியடையவும், தம்பியின் திரைப்பயணம் மென்மேலும் சிறக்கவும் என்னுடைய அன்பு நிறைந்த நல்வாழ்த்துகள்! இவ்வாறு அவர் கூறியுள்ளார்.