2022ம் ஆண்டு நிறைவடைய உள்ள நிலையில், இந்த ஆண்டின் பிரபல நடிகர்கள் பட்டியலை ஐஎம்டிபி நிறுவனம் வெளியிட்டுள்ளது. அதில், இந்தியளவில் மிகவும் பிரபலமான நடிகர் பட்டியலில் நடிகர் தனுஷ் முதலிடத்தை பிடித்துள்ளது ஒட்டுமொத்த ரசிகர்களையும் சந்தோஷத்தில் ஆழ்த்தி உள்ளது.
ஐஎம்டிபியின் 2022 ஆம் ஆண்டிற்கான மிகப் பிரபலமான இந்திய நடிகர்களின் பட்டியலில் நடிகர் தனுஷ் முதலிடம் பிடித்துள்ளார். தமிழ் சினிமாவில் நடிகர் தனுஷ் நடிப்பில் இந்த ஆண்டு வெளியான மாறன் திரைப்படம் ஓடவில்லை. ஆனால், தியேட்டரில் வெளியான திருச்சிற்றம்பலம் திரைப்படம் மிகப்பெரிய ஹிட் அடித்தது. நானே வருவேன் படத்திலும் நடிப்பால் மிரட்டி இருந்தார் தனுஷ். பாலிவுட்டில் தனுஷ் நடிப்பில் அட்ரங்கி ரே திரைப்படம் வெளியானது. ஹாலிவுட்டில் தி கிரேமேன் படத்தில் முக்கிய கதாபாத்திரத்தில் நடித்த நடிகர் தனுஷ் இந்த ஆண்டு ஐஎம்டிபி பட்டியலில் முதலிடத்தை பிடித்துள்ளார்.
நடிகர் தனுஷை தொடர்ந்து ஆர்ஆர்ஆர், கங்குபாய் கத்தியவாடி, டார்லிங்ஸ், பிரம்மாஸ்த்ரா படங்களில் நடித்த நடிகை ஆலியா பட் இரண்டாவது இடத்தை பிடித்துள்ளார். நடிகர் ரன்பீர் கபூர் உடன் திருமணமான நிலையில், அழகான குழந்தைக்கும் இந்த ஆண்டு அம்மாவானார் ஆலியா பட் என்பது குறிப்பிடத்தக்கது. ஹாலிவுட் படத்திலும் ஆலியா பட் நடித்து வருகிறார்.
இந்த டாப் 10 பட்டியலில் இயக்குநர் மணிரத்னம் இயக்கத்தில் வெளியான பொன்னியின் செல்வன் படத்தில் நந்தினியாக நடித்த நடிகை ஐஸ்வர்யா ராய் 3வது இடத்தை பிடித்துள்ளார். கான்ஸ் திரைப்பட விழாவிலும் நடிகை ஐஸ்வர்யா ராய் கலந்து கொண்டு பெருமைப்படுத்தியது குறிப்பிடத்தக்கது.
தனுஷ், ஆலியா பட், ஐஸ்வர்யா ராயை தொடர்ந்து 4வது இடத்தில் ஆர்ஆர்ஆர் பட நடிகர் ராம்சரண் உள்ளார். 5வது இடத்தில் நடிகை சமந்தாவும் 6வது இடத்தில் ஹ்ரித்திக் ரோஷன், 7வது இடத்தில் கியாரா அத்வானி, 8வது இடத்தில் ஜூனியர் என்டிஆர், 9வது இடத்தில் அல்லு அர்ஜுன் மற்றும் 10வது இடத்தில் கேஜிஎப் பட நடிகர் யாஷ் உள்ளார்.