நடிகை நயன்தாரா, தனது நயன்தாரா பியாண்ட் தி ஃபேரிடேல் ஆவணப் படத்தில் தன்னிடம் அனுமதி வாங்காமல் நானும் ரவுடி தான் படத்தின் காட்சிகளை பயன்படுத்திய விவகாரத்தின் இறுதி விசாரணை குறித்த அறிவிப்பை சென்னை உயர் நீதிமன்றம் தெரிவித்துள்ளது. இந்த விவகாரத்தில் ரூ. 10 கோடி இழப்பீடு கேட்டு நடிகர் தனுஷ் தொடர்ந்த வழக்கு வரும் ஏப்ரல் 9 ஆம் தேதி விசாரணைக்கு வரும் என தற்போது அறிவிக்கப்பட்டுள்ளது.
நடிகை நயன்தாரா, தனது திருமண ஆவண படத்துக்கு தனது வொண்டர் பார் நிறுவனம் தயாரித்த நானும் ரெளடிதான் படத்தின் படப்பிடிப்பு காட்சிகளை அனுமதியின்றி பயன்படுத்தியதாக கூறி, ரூ. 10 கோடி இழப்பீடு கேட்டு தனுஷ் தரப்பில் நயன்தாராவுக்கு நோட்டீஸ் அனுப்பப்பட்டு இருந்தது. இதற்கு தனுஷ் மீது பல்வேறு அடுக்கடுக்கான குற்றச்சாட்டுகளை முன் வைத்து நடிகை நயன்தாரா தரப்பில் வெளியிட்ட அறிக்கை திரையுலகினர் மட்டுமல்லாமல் ரசிகர்கள் மத்தியிலும் பெரும் அதிர்வலையை ஏற்படுத்தியது.
பின், நடிகர் தனுஷின் வொண்டர்பார் நிறுவனம் தரப்பில் நெட்பிளிக்ஸ் நிறுவனம் மற்றும் நடிகை நயன்தாராவுக்கு எதிராக சென்னை உயர்நீதிமன்றத்தில் மனு தாக்கல் செய்தது. அந்த மனுவில், மும்பையை சேர்ந்த நெட்பிலிக்ஸ் நிறுவனத்துக்கு எதிராக சென்னை உயர் நீதிமன்றத்தில் வழக்கு தொடர அனுமதிக்க வேண்டும் என கோரிக்கை வைக்கப்பட்டிருந்தது.
இந்த மனுவை விசாரித்த நீதிபதி அப்துல் குத்தூஸ் இருதரப்பு வாதங்களை கேட்டறிந்தார். அந்த சமயத்தில், தனுஷ் தரப்பில் ஆஜரான வழக்கறிஞர், படப்பிடிப்பு தளத்தில் எடுக்கப்பட்ட காட்சிகளில் பயன்படுத்தப்பட்ட உடை, சிகை அலங்காரம் என அனைத்திற்கும் காப்புரிமை உள்ளதால் இவை அனைத்தும் வொண்டர் பார் நிறுவனத்திற்கு சொந்தமானது என்றார்.
மேலும், நெட்பிளிக்ஸ் சார்பில் ஆஜரான வழக்கறிஞர், திரைப்படத்தில் இடம்பெறாத படப்பிடிப்பு காட்சிகளுக்கு வொண்டர்பார் நிறுவனம் பதிப்புரிமை கோர முடியாது. படப்பிடிப்பு காட்சிகள் 2020ம் ஆண்டே வெளியான போதும், தாமதமாக 2024 ம் ஆண்டு தான் வழக்கு தொடரப்பட்டுள்ளது என்றார்.
இந்நிலையில் தான், நடிகை நயன்தாராவுக்கு எதிராக நடிகர் தனுஷ் தொடர்ந்த வழக்கின் இறுதி விசாரணை வரும் ஏப்ரல் 9 ஆம் நடைபெறும் என சென்னை உயர் நீதிமன்றம் தெரிவித்துள்ளது.