லோடு ஆட்டோ வாகனத்தில் மகளையும் மனைவியையும் தீயிட்டு கொலை செய்தபின் கணவனும் தீ வைத்து தற்கொலை செய்து கொண்ட சம்பவம் கேரளாவில் பரபரப்பை ஏற்படுத்தி வருகிறது
கேரள மாநிலம் மலப்புரம் மாவட்டத்திற்கு உட்பட்ட பாண்டி காடு பகுதியைச் சேர்ந்தவர் முகமது. இவர் காசர்கோடு பகுதியில் கூலி வேலை செய்து வருகிறார். இதனால், இவரது மனைவி ஜாஸ்மின் இரு மகள்களுடன் தனது தாயார் வீட்டில் தங்கியுள்ளார். இந்நிலையில், இன்று காலை சொந்த ஊர் திரும்பிய முகமது, செல்போனில் மனைவியை தொடர்பு கொண்டு அப்பகுதியில் உள்ள ரப்பர் தோட்டத்திற்கு மகள்களை அழைத்து வருமாறு கூறினார். அதன்படி மனைவியும் மகளும் அங்கு வரவே, மனைவி ஜாஸ்மினுக்கும் முகமதுவுக்கும் இடையே வாய்த்தகராறு ஏற்பட்டுள்ளது. அப்போது திடீரென அங்கு நின்று கொண்டிருந்த லோடு ஆட்டோ வாகனத்தின் முன் பகுதியில் மனைவியையும் இரு மகள்களையும் உள்ளே வைத்து பூட்டினார். இதனால் மூவரும் அலறவே அக்கம்பக்கத்தில் இருந்தவர்கள் சம்பவ பகுதிக்கு ஓடிவந்தனர். இதற்கிடையே முகமது வாகனம் மீது தீ வைத்துவிட்டார். வாகனம் முழுவதும் தீ மளமளவென பற்றி எரிந்தது. உள்ளே இருந்தவர்கள் கதறி துடித்தனர்.
இந்நிலையில் அங்கு வந்தவர்கள் வாகனத்தின் கதவை உடைத்து ஒரு மகளை காயத்துடன் மீட்டனர். எஞ்சிய இருவரும் வாகனத்திலேயே தீக்கிரையாகி பலியாயினர். இதனை அடுத்து முகமது தனது உடலில் தீ வைத்துக்கொண்டு அருகில் உள்ள கிணற்றில் குதித்து தற்கொலை செய்து கொண்டார். மனைவியையும் மகள்களையும் தீ வைப்பதற்கு எளிதில் தீப்பற்றும் வகையிலான வெடிபொருட்களை முகமது பயன்படுத்தியதாகவும் கூறப்படுகின்றது.
அப்பகுதி மக்கள் அளித்த தகவலின் அடிப்படையில் விரைந்து வந்த தீயணைப்புத் துறையினர் ஜாஸ்மின் மற்றும் அவரது மகளை சடலமாக மீட்டனர். முகமது ஜாஸ்மின் தம்பதிக்கு மேலும் ஒரு மகள் இருக்கும் நிலையில் அவர் அப்பகுதியில் இல்லாததால் இச்சம்பவத்தில் இருந்து அவர் உயிர் தப்பியுள்ளார். சம்பவம் குறித்து வழக்கு பதிவு செய்துள்ள போலீசார் இதற்கான காரணம் குறித்து விசாரித்து வருகின்றனர்.