காங்கிரஸ் கட்சியின் அடிப்படை உறுப்பினர் உள்ளிட்ட அனைத்து பொறுப்புகளில் இருந்தும் குலாம் நபி ஆசாத் விலகியிருக்கிறார்.
ஜம்மு காஷ்மீர் மாநிலத்தின் முன்னாள் முதல்வர், முன்னாள் மத்திய அமைச்சர், அகில இந்திய காங்கிரஸ் கட்சியின் விவகாரங்கள் குழு உறுப்பினர் என பல்வேறு பொறுப்புகளை வகித்தவர் காங்கிரஸ் மூத்த தலைவர் குலாம் நபி ஆசாத். இவர் கட்சி தலைமை மீது நீண்ட காலமாக அதிருப்தியில் இருந்து வந்தார். தலைமை மாற்றம் தொடர்பாக சோனியா காந்திக்கு கடிதம் எழுதிய 23 தலைவர்களில் குலாம் நபி ஆசாத்தும் ஒருவர். சமீபத்தில் ஜம்மு காஷ்மீர் மாநில காங்கிரஸின் தலைவராக நியமிக்கப்பட்டிருந்தார். ஆனால் அடுத்த சில மணி நேரங்களில் தனது பதவியை ராஜினாமா செய்து அதிர்ச்சி கொடுத்தார். இதையடுத்து தேசிய அரசியலில் கவனம் செலுத்த திட்டமிட்டிருப்பதாகவும், அதேசமயம் பாஜகவில் இணைய வாய்ப்புள்ளதாகவும் பேச்சு அடிபட்டது.
இந்நிலையில் காங்கிரஸ் கட்சியில் இருந்து அடிப்படை உறுப்பினர் உள்ளிட்ட அனைத்து பொறுப்புகளில் இருந்தும் விலகுவதாக சோனியா காந்திக்கு 5 பக்கங்களில் கடிதம் ஒன்றை எழுதியுள்ளார். அதில், அகில இந்திய காங்கிரஸ் கட்சியுடன் சுமார் 50 ஆண்டுகால உறவை கொண்டிருந்தேன். தற்போது கனத்த இதயத்துடனும், வருத்தத்துடன் கட்சியில் இருந்து வெளியேறும் முடிவை எடுத்திருக்கிறேன். காங்கிரஸ் கட்சியின் ஒட்டுமொத்த தேர்தல் நடைமுறைகளும் கேலிக்கூத்தாக இருக்கின்றன. நாட்டின் எந்தவொரு மூலையிலும் அமைப்பு ரீதியாக கட்சியின் எந்தவொரு மட்டத்திலும் தேர்தல் நடத்தப்படவில்லை. தலைவர்கள் தங்களுக்கு ஆதரவாக ஒரு நிர்வாகிகள் பட்டியலை தயார் செய்து, அதை 24 அக்பர் சாலையில் அமர்ந்திருக்கும் காங்கிரஸ் கட்சியை நடத்தும் குழுவினரிடம் அளித்து கையொப்பம் இட வேண்டும் என்று கட்டாயப்படுத்துவதாக குற்றம்சாட்டியுள்ளார்.
தேசிய அளவில் பாஜகவிடமும், மாநில அளவில் பிராந்திய கட்சிகளிடமும் காங்கிரஸ் பின்னடைவில் இருக்கிறது. இதற்கு முக்கிய காரணம் கடந்த 8 ஆண்டுகளாக கட்சியின் நிலையை உணர்ந்து செயல்படும் சரியான தலைமை இல்லாததே ஆகும். 2019ஆம் ஆண்டு ராகுல் காந்தி பதவி விலகியதைத் தொடர்ந்தே கட்சியின் நிலைமை மோசமடையத் தொடங்கியது. அதேசமயம் கட்சிக்காக தங்கள் வாழ்க்கையையே அர்ப்பணித்தவர்களை ஒரு குறையும் கூறவில்லை எனக் குறிப்பிட்டுள்ளார்.
காங்கிரஸில் சோனியா காந்தி பெயரளவில் மட்டுமே தலைவராக இருக்கிறார். கட்சியில் முக்கிய முடிவுகள் அனைத்தும் ராகுல் அல்லது அவரது உதவியாளர்களால் மட்டுமே எடுக்கப்படுகிறது. 2014ஆம் ஆண்டு மக்களவை தேர்தலில் ஐக்கிய முற்போக்கு கூட்டணியின் தோல்விக்கு ராகுல் காந்தியின் குழந்தைத்தனமான நடவடிக்கையே காரணம். காங்கிரஸில் இருந்த ஆலோசனை வழிமுறையை ராகுல் காந்தி முற்றிலும் அழித்துவிட்டார் என அடுக்கடுக்காக குற்றச்சாட்டுகளை முன்வைத்துள்ளார்.