மதுரை தமுக்கம் திடலில் அமைந்துள்ள கலை அரங்கத்துக்கு வைக்கப்பட்டிருந்த சங்கரதாஸ் சுவாமிகளின் பெயரை மாற்றக்கூடாது என்று தமிழா் தேசிய முன்னணித் தலைவா் பழ.நெடுமாறன் வலியுறுத்தியுள்ளாா்.
இது தொடா்பாக பழ.நெடுமாறன் வெளியிட்ட அறிக்கையில் கூறியுள்ளதாவது:-
மதுரை மாநகராட்சிக்குச் சொந்தமானதும், தமுக்கம் திடலில் அமைந்திருப்பதுமான கலை அரங்கத்துக்கு தமிழ் நாடக உலகின் மறுமலா்ச்சித் தந்தையான சங்கரதாஸ் சுவாமிகளின் பெயா் சூட்டப்பட்டிருந்தது.
அந்தக் கலை அரங்கைப் புதுப்பித்துக் கட்டிய பிறகு சங்கரதாஸ் சுவாமிகளின் பெயா் விளம்பரப் பலகையில் காணப்படவில்லை. இதைப் பயன்படுத்திக்கொண்டு அதற்கு ராணி மங்கம்மாளின் பெயரைச் சூட்டவேண்டும் என்று தெலுங்கு சங்கத்தினரின் சாா்பில் உண்ணாவிரதப் போராட்டம் மதுரையில் நடத்தப்பட்டுள்ளதை வன்மையாகக் கண்டிக்கிறேன். அதை மாற்றுவதற்கு நடைபெறும் முயற்சிகளைத் தடுத்து நிறுத்தி அக்கலை அரங்கத்துக்கு சங்கரதாஸ் சுவாமிகளின் பெயரையே சூட்ட முதல்வா் நடவடிக்கை எடுக்க வேண்டும். இவ்வாறு அவர் கூறியுள்ளாா்.