தாமிரபரணி ஆற்றின் பெயரை, பொருநை ஆறு என மாற்றம் செய்யக்கோரிய மனு விசாரணையில் 12 வாரங்களில் உரிய முடிவெடுக்க தமிழ்நாடு அரசுக்கு, உயர் நீதிமன்ற மதுரைக்கிளை உத்தரவிட்டுள்ளது.
நெல்லை தூத்துக்குடி மாவட்ட மக்களின் குடிநீர் தேவையை தீர்க்கும் தாமிரபரணி ஆறு விவசாயத்துக்கும் பயன்பட்டு வருகிறது. பொதிகை மலையில் தோன்றும் தாமிரபரணி கிளை நதிகளான பேயாறு, உள்ளாறு மற்றும் பாம்பாறு ஆகியவையுடன் இணைகிறது. தாமிரபரணியின் கிளை ஆறுகளாக மணிமுத்தாறு, பச்சையாறு, சேர்வலாறு, காரையாறு, சிற்றாறு மற்றும் கடனாநதி ஆகியவைகள் கிளை நதிகளாகும்.
தூத்துகுடியைச் சேர்ந்த பொன்காந்திமதிநாதன் உயர்நீதிமன்ற மதுரைக் கிளையில் பொதுநல வழக்கினைத் தாக்கல் செய்திருந்தார். அதில், “பொதிகை மலையில் உற்பத்தியாகி, நெல்லை மாவட்டம் வழியாக மன்னார் வளைகுடா கடலில் கலப்பது தாமிரபரணி ஆறு. தாமிரபரணி என்பது வடமொழிச் சொல். தாமிரபரணி ஆறு முன்னதாக ‘பொருநை நதி’ எனும் தமிழ்ப்பெயரால் வழங்கப்பட்டுள்ளது. திருவிளையாடல் புராணம், மங்கல நிகண்டு, முக்கூடற்பள்ளு, பெரிய புராணம் என பல தமிழ் இலக்கியங்களில் பொருநை நதி எனும் பெயரே வழங்கப்பட்டுள்ளது. பல்வேறு அகழ்வாராய்ச்சியாளர்களும், தமிழறிஞர்களும் இதனை உறுதி செய்துள்ளனர். தாமிரபரணி என்பது வடமொழிச்சொல். அதற்கு மாற்றாக தூய தமிழ் பெயரான பொருநை நதி என
மாற்றம் செய்யக் கோரி தமிழக தலைமைச் செயலருக்கு மனு அளித்தும் நடவடிக்கை இல்லை. ஆகவே தாமிரபரணியின் பெயரையும் பொருநை நதி என பெயர் மாற்றம் செய்ய உத்தரவிட வேண்டும்” என கூறியிருந்தார்.
இந்த வழக்கு நீதிபதிகள் மகாதேவன், சத்தியநாராயண பிரசாத் அமர்வு, முன் விசாரனைக்கு வந்தது. அப்போது மனு தாரர் கோரிக்கை முக்கியமானது என குறிப்பிட்ட நீதிபதிகள் கோரிக்கையான தாமிரபரணி என்பதை பொருநை ஆறு என மாற்றுவது குறித்து அரசு உரிய பரிசீலனை செய்து 12 வாரத்தில் முடிவெடுக்க உத்தரவிட்டு வழக்கை முடித்து வைத்தனர்.