இலங்கை கடற்படையால் தமிழக மீனவர்கள் கைது செய்யப்படுவது அதிகரித்து வருவது வெளியுறவுத்துறை இணையமைச்சர் கூறியுள்ள பதிலில் தெரிய வந்துள்ளது.
தமிழக மீனவர்கள் மீது இலங்கை கடற்படை கொடூரமாக தாக்குவதும், துப்பாக்கிச் சூடு நடத்துவதும், கை செய்வதும், படகுகள், மீன்களை பறிமுதல் செய்வதும் தொடர் கதையாகி வருகிறது. தமிழக அரசு ஒன்றிய அரசிடம் தொடர்ந்து வலியுறுத்தி வரும் போதும் உறுதியான நடவடிக்கைகள் மேற்கொள்ளப்படுவதில்லை என மக்கள் வேதனை தெரிவிக்கின்றனர்.
இந்நிலையில் இலங்கை கடற்படையால் தமிழக மீனவர்கள் கைது செய்யப்படுவது பற்றி நாடாளுமன்றத்தில் மதுரை மக்களவை உறுப்பினர் சு. வெங்கடேசன் வெளியுறவு இணை அமைச்சரிடம் கேள்வி எழுப்பினார்.
அந்த கேள்விக்கு ஒன்றிய வெளியுறவு இணை அமைச்சர் முரளிதரன் பதில் அளித்துள்ளார். அமைச்சர் அளித்துள்ள பதிலில், தமிழக மீனவர்கள் 2019 இல் 190 பேர், 2020 இல் 74 பேர், 2021 இல் 143 பேர், 2022 இல் 219 பேர் இலங்கை கடற்படையால் கைது செய்யப்பட்டுள்ளனர் என்றும், அவர்களில் 21 பேர் இன்னும் சிறைகளில் இருக்கிறார்கள் என்றும், கைப்பற்றப்பட்ட படகுகள் 2019 இல் 39, 2020 இல் 11, 2021 இல் 19, 2022 இல் 30 என்றும் அவற்றில் மீண்டும் திரும்ப மீட்கப்பட்ட படகுகள் 2019 இல் 1, 2020 இல் 1, 2021 இல் 4, 2022 இல் 0 என்றும் தகவல்களை தந்துள்ளார்.
இந்திய தூதரகம் கைது செய்யப்பட்ட இலங்கை மீனவர்களின் நலன், சட்ட உதவி செய்து வருவதாகவும், இப்பிரச்சினை குறித்து பிரதமர்கள் மட்டத்தில் இணைய வழியில் செப்டம்பர் 2020, இந்திய வெளியுறவு அமைச்சர் மற்றும் இலங்கை மீன் வள அமைச்சர் மட்டத்தில் ஜூன் 2021, மார்ச் 2022 லிலும், இந்திய வெளியுறவு அமைச்சர் மற்றும் இலங்கை நிதி அமைச்சர் மட்டத்தில் இணைய வழியில் ஜனவரி 2022லிலும் விவாதிக்கப்பட்டுள்ளது என்றும், 2016 இல் 2 + 2 (இரண்டு நாடுகளின் வெளியுறவு, மீன் வள அமைச்சர்கள்) சந்திப்பில் உருவாக்கப்பட்ட கூட்டு செயல் குழு மார்ச் 2022 இல் ஐந்தாவது முறையாக கூடி விரிவாக விவாதித்துள்ளது என்றும் அமைச்சர் பதிலில் தெரிவித்துள்ளார்.
“அரசு முயற்சிகளை எடுப்பதாக கூறினாலும் இலங்கை கடற்படையின் அத்து மீறல்களும், கைதுகளும் அதிகரித்து வருவதையே அமைச்சரின் பதிலில் உள்ள விவரங்கள் சொல்கின்றன. 2019 இல் 190 கைதுகள் என்பது கோவிட் காலத்தில் மட்டும் சற்று குறைந்தாலும் 2022 இல் இதுவரை 219 என்ற அளவிற்கு உயர்ந்திருக்கிறது. நான்கு ஆண்டுகளில் 626 தமிழக மீனவர்கள் கைது செய்யப்பட்டுள்ளனர். 99 படகுகள் கைப்பற்றப்பட்டதில் 93 படகுகள் மீடகப்படவில்லை. ஆகவே அரசு முறை முயற்சிகள் இன்னும் தீவிரமாக்கப்பட வேண்டும். இன்னும் சிறையில் இருக்கிற 21 தமிழக மீனவர்கள் உடனடியாக விடுதலை செய்யப்பட நடவடிக்கைகள் வேண்டும்” என்று சு. வெங்கடேசன் எம்.பி கூறியுள்ளார்.