தேர்தலில் வெல்வது தான் நமது இலக்கு. பிரதமரை பின்னர் தேர்வு செய்யலாம் என்று முதல்வர் முக ஸ்டாலின் பிறந்தநாள் விழாவில் பரூக் அப்துல்லா பேசினார்.
தமிழ்நாடு முதல்வர் ஸ்டாலின் பிறந்த நாள் விழா பொதுக்கூட்டத்தில் ஜம்மு காஷ்மீர் முன்னாள் முதல்வர் பரூக் அப்துல்லா உரையாற்றினார். அப்போது அவர் கூறியதாவது:-
தமிழ்நாட்டிற்கு மட்டுமில்லாமல் இந்தியா முழுமைக்கும் சேவை செய்ய முக ஸ்டாலினை வாழ்த்துகிறேன். பல சிறப்பு திட்டங்களை முக ஸ்டாலின் நடைமுறைப்படுத்தியுள்ளார். ஆனால் இன்னும் பல வேலைகள் செய்யப்பட வேண்டியுள்ளது. இந்தியா மிக கடுமையான கால கட்டத்தில் பயணித்து வருகிறது. உலகின் மிகப்பெரிய ஜனநாயக நாட்டில் ஜனநாயகத்திற்கு ஆபத்து ஏற்பட்டுள்ளது. அரசியலமைப்பு சட்டம் ஆபத்தில் உள்ளது. நாம் இதை மறுக்கவோ, மறக்கவோ கூடாது. நாம் தீவிரமாக பணியாற்ற வேண்டிய நேரம் இது.
காஷ்மீருக்கும் தமிழ்நாட்டிற்கு பொதுவான காரணிகள் என்ன உள்ளது. காஷ்மீரில் இன்று 5 டிகிரி செல்சியஸ் வெப்பநிலை, ஆனால் தமிழ்நாட்டில் 32 டிகிரி செல்சியஸ். நான் பேசும் மொழி உங்களுக்கு புரியாது, அதேபோல் நீங்கள் பேசும் மொழி எனக்கு புரியாது. இப்படி அனைத்து காரணிகளும் காஷ்மீருக்கும் தமிழ்நாட்டிற்கும் வேறுபடுகின்றன. நம்மிடம் பொதுவான காரணிகள் இல்லை. ஆனால் நம்மை ஒருங்கிணைப்பது பன்மைத்துவம். நாம் ஒண்றிணைந்து வலிமையான இந்தியாவை மீண்டும் நிறுவ வேண்டும். மிகச் சிறந்த தந்தையின் ஆகச் சிறந்த தனயனாக ஸ்டாலின் விளங்குகிறார். கருணாநிதி அவர்களை எனக்கு நன்றாக தெரியும். நாம் இன்னும் இங்கு பல வேலைகளை செய்ய வேண்டும். இந்த மேடையில் நான் ஸ்டாலினுக்கு கோரிக்கை வைக்கிறேன்.
தமிழ்நாட்டிற்கு மட்டுமல்ல இந்தியாவிற்கும் நீங்கள் பல முன்னெடுப்புகளை செய்ய வேண்டும். நாம் ஒருங்கிணைந்து செயல்பட வேண்டிய நேரமிது. நாம் இந்தியாவை பற்றி யோசிப்போம், ஒவ்வொரு மாநிலத்தின் நிலையைப் பற்றியும் யோசிப்போம். நாம் ஒண்றிணைந்து வாழ வேண்டும். இந்தியாவில் உள்ள அனைத்து மதங்களும் இந்தியாவின் அடையாளம். இந்துக்கள், முஸ்லீம்கள், சீக்கியர்கள் அனைவரும் இந்த மிகச்சிறந்த இந்தியாவின் குழந்தைகள் தான். இந்த மேடையில் இருக்கும் தலைவர்களும், ஜனநாயகத்தை மதிக்கும் அனைத்து தலைவர்களும் இந்தியாவை வலிமையாக்க முயற்சி செய்ய வேண்டும். இந்தியாவில் அனைத்து மக்களும் அமைதியாகவும், சுயமரியாதையுடனும் மதிப்பு மிக்க வாழ்க்கையை நடத்த நாம் உறுதி ஏற்போம்.
கடற்படை, விமானப்படையோ ராணுவமோ இந்தியாவை வலிமையாக்காது, மக்கள் தான் நாட்டை வலிமையாக்குவார்கள். தைரியத்தையும் நம்பிக்கையையும் கைவிடாமல் நாம் உழைக்க வேண்டும். எதிர்காலம் சிறப்பாக அமையும் என்ற நம்பிக்கை எனக்கு உள்ளது. தமிழ்நாடு மட்டுமில்லாமல் இந்தியாவின் நம்பிக்கையாக முக ஸ்டாலின் விளங்குகிறார்.
தமிழ்நாட்டை உருவாக்கியது போன்று ஸ்டாலின் இந்தியாவை உருவாக்க வேண்டும். எதிர்கட்சிகளில் யார் பிரதமர் வேட்பாளர் என்பதை நாம் மறக்க வேண்டும். மக்களவை தேர்தலில் வெல்வதே நம் இலக்கு. வென்ற பின் பிரதமரை தேர்ந்தெடுக்கலாம். பிரதமரை விட நாடு தான் அதிமுக்கியத்துவம் வாய்ந்தது. நமக்குள் சிறு சிறு பிரச்சனைகள் முரண்கள் இருக்கலாம், அதை ஓரம் தள்ளிவிட்டு வேலையை பார்ப்போம். ராகுல் காந்தியின் யாத்திரையில் இளைஞர்களின் நம்பிக்கையை நான் உணர்ந்தேன். இளைஞர்களின் நம்பிக்கை தான் நாட்டை முன்னேற்றும். இவ்வாறு பருக் அப்துல்லா பேசினார்.