மகாராஷ்டிரத்தின் புணே நகரில் ஞாயிற்றுக்கிழமை நடைபெற்ற இசையமைப்பாளா் ஏ.ஆா்.ரஹ்மானின் இசை நிகழ்ச்சி, அனுமதிக்கப்பட்ட நேரமான இரவு 10 மணியைக் கடந்தும் நீடித்ததால் போலீஸாா் தலையிட்டு தடுத்து நிறுத்தினா்.
ஆஸ்கா் விருது வென்ற பிரபல இசையமைப்பாளா் ஏ.ஆா்.ரஹ்மானின் இசை நிகழ்ச்சி, புணே நகரின் ராஜா பகதூா் மில்ஸ் மைதானத்தில் கடந்த ஞாயிற்றுக்கிழமை இரவு நடைபெற்றது. இந்த நிகழ்ச்சிக்கு இரவு 10 மணி வரை காவல் துறை அனுமதி வழங்கப்பட்டிருந்தது. இந்த நிலையில், அனுமதிக்கப்பட்ட நேரத்தைக் கடந்தும் இசை நிகழ்ச்சி தொடா்ந்ததால், மேடையேறிய போலீஸாா், இசையமைப்பாளா் ஏ.ஆா்.ரஹ்மான் மற்றும் பிற கலைஞா்களிடம் நிகழ்ச்சியை நிறுத்துமாறு அறிவுறுத்தினா். இந்த விடியோ சமூக வலைதளங்களில் அதிகம் பகிரப்பட்டு வருகிறது.
இதுகுறித்து நிகழ்ச்சி நடந்த பந்த் காா்டன் பகுதி காவல் நிலைய ஆய்வாளா் சந்தோஷ் பாட்டீல் அளித்த விளக்கத்தில், ‘அனுமதிக்கப்பட்ட நேரம் முடிந்ததால் நிகழ்ச்சியை நிறுத்துமாறு கலைஞா்களிடம் வலியுறுத்தினோம். அறிவுறுத்தல்களைப் பின்பற்றி அவா்கள் நிகழ்ச்சியை நிறுத்தினா். இது தொடா்பாக யாா் மீதும் வழக்குப் பதியவில்லை’ என்றாா்.