பாகிஸ்தான் அமைச்சர் பிலாவல் பூட்டோவை தீவிரவாதத்தின் செய்தித்தொடர்பாளர் என மத்திய வெளியுறவுத் துறை அமைச்சர் எஸ். ஜெய்சங்கர் தெரிவித்தார்.
ஷாங்காய் ஒத்துழைப்பு மாநாட்டில் கலந்து கொண்ட பாகிஸ்தான் வெளியுறவுத் துறை அமைச்சர் பிலாவல் பூட்டோவை தீவிரவாதத்தின் செய்தித் தொடர்பாளர் என மத்திய வெளியுறவுத் துறை அமைச்சர் எஸ். ஜெய்சங்கர் கூறியது பெரும் பரபரப்பை ஏற்படுத்தியுள்ளது.
ஆசியாவிலேயே மிக முக்கிய அமைப்பாக விளங்கும் ஷாங்காய் ஒத்துழைப்பு அமைப்பின் வெளியுறவுத் துறை அமைச்சர்கள் மாநாடு கோவாவில் நேற்று தொடங்கியது. இரண்டு நாட்கள் நடைபெறும் இந்த மாநாட்டில் இந்தியா, சீனா, கஜகஸ்தான், பாகிஸ்தான், கிர்கிஸ்தான், ரஷ்யா, உஸ்பெகிஸ்தான் ஆகிய உறுப்பு நாடுகளின் வெளியுறவுத் துறை அமைச்சர்கள் கலந்து கொண்டனர். இந்தியாவில் நடைபெறுவதால் இந்த மாநாட்டில் பாகிஸ்தான் பங்கேற்காது என்றே கருதப்பட்டது. இரு நாடுகளுக்கும் இடையே சுமூகமான சூழல் நிலவவில்லை என்பதாலும், இந்தியாவுக்கு செல்லக்கூடாது என தீவிரவாதிகள் மிரட்டல் விடுத்ததாலும் இந்த மாநாட்டில் பாகிஸ்தான் வெளியுறவுத்துறை அமைச்சர் பிலாவல் பூட்டோ கலந்துகொள்ள மாட்டார் என்றே செய்திகள் வந்த வண்ணம் இருந்தன.
ஆனால், தீவிரவாதிகளின் மிரட்டலை பொருட்படுத்தாமல் தான் இந்தியாவுக்கு வரவுள்ளதாக கடந்த மாதம் அறிவித்தார் பாகிஸ்தான் வெளியுறவுத் துறை அமைச்சர் பிலாவல் பூட்டோ. இவ்வாறு அவர் அறிவித்த அடுத்த நாளே, காஷ்மீரில் ராணுவத்தினரை குறிவைத்து தீவிரவாதிகள் தாக்குதல் நடத்தினர். இதில் 6 ராணுவ வீரர்கள் வீரமரணம் அடைந்தனர். இதை காரணம் காட்டியாவது, பாகிஸ்தான் அமைச்சர் இந்தியா செல்ல மாட்டார் என தீவிரவாதிகள் எதிர்பார்த்தனர். எனினும், தான் அறிவித்தபடியே ஷாங்காய் ஒத்துழைப்பு மாநாட்டில் பாகிஸ்தான் அமைச்சர் பிலாவல் பூட்டோ கலந்துகொண்டார். இந்த மாநாட்டின் நிறைவில் இந்திய வெளியுறவுத் துறை அமைச்சர் ஜெய்சங்கரை பிலாவல் பூட்டோ சந்தித்து பேசுவதாக இருந்தது. இந்த சூழலில்தான், காஷ்மீரில் நேற்று தீவிரவாதிகள் பயங்கர தாக்குதலை நடத்தினர். இதில் 5 ராணுவ வீரர்கள் வீரமரணம் அடைந்தனர். இது இந்தியாவை கோபத்தின் உச்சிக்கே கொண்டு சென்றது.
தீவிரவாதிகளின் இந்த செயலால் கடும் அதிருப்தி அடைந்த எஸ். ஜெய்சங்கர், பிலாவல் பூட்டோ உடனான சந்திப்பை ரத்து செய்தார். மாநாடு நிறைவடையும் போது உரையாற்றிய ஜெய்சங்கர், பாகிஸ்தானையும், பிலாவல் பூட்டோவையும் கடுமையாக விமர்சித்தார். அவர் பேசியதாவது:-
தீவிரவாதத்தை ஊக்குவிப்பவர், தீவிரவாதத்தை நியாயப்படுத்துபவர், தீவிரவாதத்தின் செய்தித் தொடர்பாளர் இங்கு வந்திருக்கிறார். பயங்கராவதத்தால் பாதிக்கப்பட்டவர்களும், அதற்கு காரணமானவர்களும் ஒன்றாக அமர்ந்து பேச முடியாது. ஷாங்காய் மாநாட்டுக்கு உறுப்பு நாடு என்ற முறையில் பிலாவல் பூட்டோ வந்திருக்கிறார். அதை தாண்டி இதில் ஒன்றும் இல்லை. பாகிஸ்தானின் அந்நிய செலவாணியை போலவே அந்நாட்டின் மீதான நம்பகத்தன்மை குறைந்து கொண்டே வருகிறது. இவ்வாறு ஜெய்சங்கர் பேசினார்.