சூப்பர் ஸ்டார் ரஜினி நடித்துள்ள ஜெயிலர் படத்தின் ஃபர்ஸ்ட் சிங்கிள் தற்போது வெளியானது. அனிருத் இசையில் காவாலா என்ற டைட்டிலில் வெளியாகியுள்ள இப்பாடல் ரசிகர்களிடம் நல்ல வரவேற்பைப் பெற்றுள்ளது.
நெல்சன் இயக்கத்தில் நடிகர் ரஜினிகாந்த் ஜெயிலர் படத்தில் நடித்து முடித்துள்ளார். ரம்யா கிருஷ்ணன், யோகி பாபு, விநாயகன் உள்ளிட்ட பலர் இப்படத்தில் நடிக்கின்றனர். காவாலா எனத் தொடங்கும் முதல் பாடலின் முன்னோட்டம் சமீபத்தில் வெளியாகியிருந்தது. தமன்னாவின் நடனத்தில் உருவான இப்பாடல் ‘புஷ்பா’ படத்தில் இடம்பெற்று இந்தியா முழுவதும் ஒலித்த ‘ஊ அண்டாவா..’ பாடலை நினைவுப்படுத்துவதாகவும் நிச்சயம் ‘காவாலா’ ஏமாற்றாது என ரசிகர்கள் கருத்துக்களைப் பதிவிட்டு வந்தனர்.
இந்நிலையில், ஜெயிலர் படத்தின் ஃபர்ஸ்ட் சிங்கிள் தற்போது வெளியாகியுள்ளது. அனிருத் இசையில் ‘காவாலா’ என்ற டைட்டிலில் உருவாகியுள்ள இப்பாடலை அருண்ராஜா காமராஜ் எழுதியுள்ளார். ஷில்பா ராவ்வின் ஹஸ்க்கியான குரலில் ரசிகர்களுக்கு கிக் ஏற்றுகிறது ‘காவாலா’ பாடல். அதேபோல், தமன்னாவின் கிளாமர் ஆட்டமும் ரசிகர்களை சூடேற்றியுள்ளது. முன்னதாக இந்தப் பாடலில் தமன்னா மட்டுமே நடனம் ஆடியிருப்பார் என எதிர்பார்க்கப்பட்டது. ஆனால், தற்போது வெளியான முழு பாடலில், சூப்பர் ஸ்டார் ரஜினியும் தமன்னா உடன் ஆட்டம் போட்டு மாஸ் காட்டியுள்ளார். தமன்னா செம்ம கிளாமராகவும், சூப்பர் ஸ்டார் ரஜினி சால்ட் அன்ட் பெப்பர் லுக்கிலும் டான்ஸ் ஆடி அசத்தியுள்ளார். இதனைப் பார்த்த ரசிகர்கள் செம்ம வைபில் உள்ளனர். ஜி கர்தா வெப் சீரிஸ், லஸ்ட் ஸ்டோரிஸ் இரண்டாம் பாகம் என கிளாமரில் கிக் ஏற்றிய தமன்னா, இந்தப் பாடலிலும் ரசிகர்களை ஏமாற்றவில்லை.