லைகா நிறுவனத்தின் தயாரிப்பில் தனது மகள் இயக்கியுள்ள ‘லால் சலாம்’ படத்தில் கெஸ்ட் ரோலில் நடித்துள்ளார் ரஜினிகாந்த். இந்நிலையில் தீபாவளியை முன்னிட்டு இப்படத்தின் மிரட்டலான டீசர் வெளியாகி ரசிகர்கள் இடையில் நல்ல வரவேற்பினை பெற்று வருகிறது.
நீண்ட இடைவேளைக்கு பிறகு தற்போது ‘லால் சலாம்’ படம் மூலமாக மீண்டும் இயக்கத்திற்கு திரும்பியுள்ளார் ஐஸ்வர்யா ரஜினிகாந்த். கிரிக்கெட் விளையாட்டை மையமாக வைத்து உருவாகியுள்ள இப்படத்தில் விஷ்ணு விஷால், விக்ராந்த் உள்ளிட்டோர் இணைந்து நடித்துள்ளனர். லைகா நிறுவனம் இப்படத்தை தயாரித்துள்ளது. அத்துடன் இசைப்புயல் ஏ.ஆர். ரஹ்மான் ‘லால் சலாம்’ படத்திற்கு இசையமைத்துள்ளார்.
இந்நிலையில் தீபாவளியை முன்னிட்டு தற்போது இப்படத்தின் மிரட்டலான டீசர் வெளியாகியுள்ளது. விக்ராந்த், விஷ்ணு விஷால் இருவரும் கிரிக்கெட் வீரர்களாக என்ட்ரி கொடுக்கின்றனர். விளையாட்டில் மோதல் ஏற்பட ரஜினி அதிரடியாக என்ட்ரி கொடுத்து, ‘விளையாட்டுல மதத்தை கலந்து இருக்கீங்க. குழந்தைகள் மனசுல விஷத்தை விதைச்சு இருக்கீங்க’ என வசனம் பேசி கவனம் ஈரக்கிறார்.
இதன் மூலமாக ‘லால் சலாம்’ படம் கிரிக்கெட் விளையாட்டை வைத்து நடக்கும் அரசியல் குறித்து பேசியுள்ளது உறுதியாகியுள்ளது. டீசரில் இடம்பெற்றுள்ள ரஜினியின் மாஸான லுக்கும் ரசிகர்கள் இடையில் கவனம் ஈர்த்து வருகிறது. மேலும் இப்படத்தில் கே.எஸ். ரவிக்குமார் அரசியல்வாதியாகவும், தம்பி ராமையா, செந்தில் இருவரும் முக்கியமான கதாபாத்திரத்தில் நடித்துள்ளதும் இந்த டீசர் மூலமாக உறுதியாகியுள்ளது. ‘லால் சலாம்’ படம் அடுத்தாண்டு பொங்கலுக்கு வெளியாகவுள்ளது குறிப்பிடத்தக்கது.