வெள்ள பாதிப்பு தொடர்பாக தமிழக அரசை விமர்சித்த மத்திய நிதி அமைச்சர் நிர்மலா சீதாராமனுக்கு காங்கிரஸ் எம்.பி ஜோதிமணி பதிலடி கொடுத்துள்ளார்.
மிஜ்காம் புயல் காரணமாக கடந்த டிசம்பர் 4ஆம் தேதி பெய்த கனமழை சென்னை, திருவள்ளூர், காஞ்சிபுரம் மற்றும் செங்கல்பட்டு ஆகிய மாவட்டங்களை புரட்டிப்போட்டுவிட்டது. அதிலிருந்தே மக்கள் மீளாத நிலையில் தென் மாவட்டங்களான நெல்லை, தூத்துக்குடி, தென்காசி மற்றும் கன்னியாகுமரி மாவட்டங்களில் டிசம்பர் 17,18 ஆகிய தேதிகளில் கனமழை கொட்டித் தீர்த்தது. இதனால் லட்சக்கணக்கான மக்கள் வாழ்வாதாரத்தை இழந்துள்ளனர்.
இதுதொடர்பாக பேட்டியளித்த மத்திய நிதியமைச்சர் நிர்மலா சீதாராமன், தமிழகத்தில் ஏற்பட்டுள்ள வெள்ள பாதிப்பை பேரிடராக அறிவிக்க முடியாது என உறுதியாகக் கூறினார். கனமழைக்கான முன்னெச்சரிக்கை நடவடிக்கைகளை தமிழ்நாடு அரசு எடுக்கவில்லை என்று குற்றம்சாட்டிய அவர், மீட்புப் பணிகளிலும் விரைந்து செயல்பட வில்லை என்றார். இதற்கு தமிழக நிதியமைச்சர் தங்கம் தென்னரசு பதிலளித்த நிலையில், திமுகவின் கூட்டணிக் கட்சிகள் நிர்மலா சீதாராமனை கடுமையாக விமர்சித்து வருகின்றன.
இந்த நிலையில் காங்கிரஸ் எம்.பி ஜோதிமணி தனது எக்ஸ் பக்கத்தில், கடந்த ஒன்பது ஆண்டுகளில் தமிழ்நாட்டை மட்டுமல்ல இந்தியாவை எத்தனையோ இயற்கை சீற்றங்கள் உலுக்கி எடுத்திருக்கிறது என்றும், புயல், மழை, வெள்ளம் என்று மக்களின் வாழ்வு சிதைந்து போயிருக்கிறது. லட்சக்கணக்கான மக்கள் வெறுப்பு மற்றும் வன்முறைக்கு பலியாகியுள்ளானர். இன்னும் பற்றி எரிந்துகொண்டிருக்கும் மணிப்பூர் அதற்கு சாட்சி என்று குறிப்பிட்டார்.
கொரோனா தொற்றில் மருத்துவமனையில் ஆக்சிஜன் கிடைக்காமல் இறந்த மக்களின் உடல்கள் ஆற்றில் மிதந்தன என்ற ஜோதிமணி, இங்கெல்லாம் பிரதமர் மோடி எங்காவது எட்டிப்பார்த்திருக்கிறாரா? பாதிக்கப்பட்ட மக்களுக்கு ஆறுதல் சொல்லியிருக்கிறார? கடந்த காலத்தில் தமிழ்நாட்டை வர்தா, ஒகி, கஜா, நிவர் புயல்கள் வாட்டியடுத்தபோது தமிழகத்தை பிரதமர் மோடி எட்டிப்பார்த்தாரா? இல்லை இழப்பீடுதான் கொடுத்தாரா? என்று அடுக்கடுக்காக கேள்வி எழுப்பினார்.
இப்படிப்பட்ட ஒரு பிரதமரை வைத்துக்கொண்டு வெள்ளமோ, புயலோ, கொரோனா தொற்றோ களத்தில் நிற்கும் முதலமைச்சர் மு.க.ஸ்டாலினையும், தமிழ்நாடு அரசையும் குறை சொல்ல பாஜகவும் நிர்மலா சீதாராமனும் வெட்கப்பட வேண்டும் என்று காட்டமாக விமர்சித்த அவர், வரி என்ற பெயரில் தமிழ்நாட்டை கொள்ளயடித்துக் கொண்டு போகிற உங்களிடம் நிதி கேட்பது எங்கள் உரிமை என்றும், அதை கொடுக்க வேண்டியது உங்கள் கடமை. முதலில் தமிழ்நாடு அரசு கேட்ட இழப்பீட்டைக் கொடுங்கள், தமிழ்நாட்டு மக்களை அவமதிப்பதை நிறுத்துங்கள் என்றும் கூறியுள்ளார்.