தமிழ் சினிமாவின் முன்னணி நடிகராக வலம் வருகிறார் சிவகார்த்திகேயன். அண்மைக்காலமாக இவரது நடிப்பில் வெளியாகும் படங்கள் அனைத்தும் தவறாமல் வசூலை வாரி குவித்து வருகின்றன. அடுத்தடுத்து நல்ல கதையம்சம் கொண்ட படங்களையும் தேர்ந்தெடுத்து நடித்து வருகிறார். இந்நிலையில் சிவகார்த்திகேயன் தனது ரசிகர்களை சந்தித்துள்ள நிகழ்வு சோஷியல் மீடியாவில் தற்போதைய ஹாட் டாபிக்காக மாறியுள்ளது.
சின்னத்திரையில் மேடை ரசிகர்களை சிரிக்க வைத்து சினிமாவில் நுழைந்து, இன்று தனக்கென ரசிகர்கள் பட்டாளம், மார்கெட் வைத்து உச்ச நடிகராக திகழ்பவர் சிவகார்த்திகேயன். இன்று சினிமாவில் சாதிக்க துடிக்கும் பல இளைஞர்கள் மற்றும் சின்னத்திரையில் இருந்து வெள்ளித்திரைக்குள் நுழைய ஆசைப்படும் பலருக்கும் ஒரு முன்னுதாரணமாக மாறியுள்ளார் சிவகார்த்திகேயன். கடைசியாக இவரது நடிப்பில் கடந்த பொங்கல் ரிலீசாகி ‘அயலான்’ படம் வெளியான நிலையில் தற்போது ‘அமரன்’ என்ற படத்தில் நடித்து முடித்துள்ளார். உலக நாயகனின் ராஜ் கமல் பிலிம்ஸ் நிறுவனம் தயாரிப்பில் உருவாகியுள்ள இப்படத்தினை ராஜ்குமார் பெரியசாமி இயக்கியுள்ளார். கெளதம் கார்த்திக் நடிப்பில் வெளியான ரங்கூனுக்கு பின், அவரின் இரண்டாவது படைப்பாக அமரன் உருவாகியுள்ளது.
சிவகார்த்திகேயன் இராணுவ வீரராக நடித்துள்ள இப்படம் முழுக்க முழுக்க மிலிட்டரி பின்னணியில் உருவாகியுள்ளது. ‘அமரன்’ படப்பிடிப்பை முடித்த கையோட ஏ.ஆர். முருகதாஸுடன் கூட்டணி அமைத்துள்ளார் சிவகார்த்திகேயன். எஸ்கே 23 படமாக உருவாகும் இதில் ருக்மணி வசந்த் ஹீரோயினாக நடிக்கிறார். மேலும், அனிருத் இசையமைக்கும் இப்படத்தின் ஷுட்டிங் துவங்கி தற்போது மும்முரமாக நடந்து வருகிறது.
இந்நிலையில் தனது நற்பணி இயக்க நிர்வாகிகளை சந்தித்துள்ளார் சிவகார்த்திகேயன். தமிழ்நாடு அளவில் இருக்கும் எஸ்கே நற்பணி இயக்கத்தை சார்ந்த மாவட்ட, நகற்ற, ஒன்றிய நிர்வாகிகள் இந்த நிகழ்வில் பங்கேற்றுள்ளனர். சென்னை போரூரில் ஒரு மண்டபத்தில் இந்நிகழ்ச்சி நடந்துள்ளது. இது தொடர்பான போட்டோஸ் மற்றும் வீடியோஸ் தற்போது சோஷியல் மீடியாவில் வைரலாகி வருகிறது.
இந்நிகழ்ச்சியில் ரசிகர்களிடம் பேசிய சிவகார்த்திகேயன், சினிமாவில் நான் ஏராளமான பிரச்சனைகளை சந்தித்துள்ளேன். அதையெல்லாம் சொல்லி ஆறுதல் தேட எனக்கு தந்தையோ, சகோதரரோ கிடையாது. அந்த சமயத்தில் ரசிகர்களாகிய உங்களிடம் தான் அனைத்தும் பேசியுள்ளேன் என கூறியுள்ளார். இதனைக்கேட்டு ரசிகர்கள் அனைவரும் நெகிழ்ந்து போயுள்ளனர். மேலும், ரசிகர்களுடன் சிவகார்த்திகேயனின் இந்த சந்திப்பு பிரம்மாண்டமாக நடந்து முடிந்துள்ளது குறிப்பிடத்தக்கது.