கூட்டணி விஷயத்தில் பாமக எடுத்துள்ள முடிவு தமிழக அரசியலை முற்றிலுமாக மாற்றி இருக்கிறது என்று தமிழக பாஜக தலைவர் அண்ணாமலை தெரிவித்துள்ளார்.
திண்டிவனம் தைலாபுரம் தோட்டத்தில் இன்று (மார்ச் 19) பாமக நிறுவனர் ராமதாஸ், தலைவர் அன்புமணி, பாஜக மாநில தலைவர் அண்ணாமலை, மத்திய இணை அமைச்சர் எல்.முருகன் முன்னிலையில் பாஜக – பாமக இடையிலான கூட்டணி ஒப்பந்தம் கையெழுத்தானது. இதில் பாமகவுக்கு மொத்தம் 10 தொகுதிகள் ஒதுக்கப்பட்டுள்ளன. இந்த சந்திப்புக்குப் பிறகு செய்தியாளர்களிடம் பேசிய தமிழக பாஜக தலைவர் அண்ணாமலை கூறியதாவது:-
தமிழகத்தின் மக்கள் சக்தியாக, தனிப்பெரும் அரசியல் இயக்கமாக இருக்கும் பாட்டாளி மக்கள் கட்சி மிக முக்கியமான ஒரு முடிவை எடுத்து பிரதமர் மோடியின் கரத்தை வலுப்படுத்தியிருக்கிறது. மக்களவை தேர்தலில் தேசிய ஜனநாயகக் கூட்டணி 400க்கும் அதிகமான சீட்களில் வெற்றிபெற வேண்டும் என்று ஒரு வேள்வியுடன் பாமக களமிறங்கியிருக்கிறது.
தமிழகத்தின், இந்தியாவின் தனிப்பெரும் அரசியல் தலைவராக திகழும் ராமதாஸுக்கு நன்றி தெரிவித்துக் கொள்கிறோம். பிரதமர் மோடி, முன்னாள் பிரதமர் வாஜ்பாய் உள்ளிட்ட பாஜக மூத்த தலைவர்களின் அன்பை பெற்றவர் ராமதாஸ். தமிழகத்தில் புரட்சிகரமான அரசியல் மாற்றத்தைக் கொண்டு வரவேண்டும் என்பது அவரது மிகப்பெரிய கனவு.
ராமதாஸ் யோசித்துக் கொண்டிருக்கும் பல விஷயங்களை பிரதமர் மோடி நாடு முழுவதும் செயல்படுத்திக் கொண்டிருக்கிறார். 2024 மக்களவை தேர்தலில் மக்கள் வெற்றியை கொடுப்பார்கள் என்ற முழு நம்பிக்கையுடன் களத்தில் இறங்கியிருக்கிறோம். தமிழகத்தின் அரசியல் நேற்று இரவில் இருந்து மாறியிருக்கிறது. பாட்டாளி மக்கள் கட்சி எடுத்துள்ள இந்த முடிவு தமிழக அரசியலை முற்றிலுமாக மாற்றி இருக்கிறது.
2024ல் மாபெரும் வெற்றி, 2026ல் நாம் அனைவரும் எதிர்பார்க்கும் அரசியல் மாற்றம். நாங்கள் இரவோடு இரவாக கோவையிலிருந்து இங்கு வந்ததற்கு காரணம், இன்று சேலத்தில் பிரதமர் மோடியுடன் ராம்தாஸை அமரவைத்து அழகு பார்க்க வேண்டும் என்ற ஆசைதான். இவ்வாறு அண்ணாமலை பேசினார்.
முன்னதாக செய்தியாளர்களிடம் பேசிய அன்புமணி, “கடந்த 10 ஆண்டுகளாக தேசிய ஜனநாயகக் கூட்டணியில் பாமக அங்கம் வகிக்கிறது. நாட்டின் நலன் கருதி தேசிய ஜனநாயகக் கூட்டணியில் இணைந்து போட்டியிட முடிவு செய்யப்பட்டுள்ளது. தமிழகத்தில் அரசியல் மாற்றம் வரவும், பிரதமர் மோடி நல்லாட்சி தொடரவும் இணைந்துள்ளோம். தமிழகத்தை 60 ஆண்டு கால ஆட்சியை நடத்தி வருபவர்கள் மீது மக்கள் வெறுப்புடன் உள்ளனர். மாற்றம் வேண்டும் என்று மக்கள் எதிர்பார்க்கிறார்கள். அதை பூர்த்தி செய்ய நாங்கள் இந்த முடிவை எடுத்து இருக்கிறோம். தமிழகத்தில் மட்டுமல்ல, அகில இந்திய அளவில் தேசிய ஜனநாயகக் கூட்டணி மாபெரும் வெற்றி பெறும். மூன்றாவது முறையாக பிரதமராக மோடி தேர்ந்தெடுக்கப்படுவார்” என்றார்.
இதனை தொடர்ந்து பிரதமர் மோடி பங்கேற்கும் கூட்டத்தில் பங்கேற்க ராமதாஸ், அன்புமணி இருவரும் சேலம் புறப்பட்டுச் சென்றனர்.