விஜய் சேதுபதி கதாபாத்திரத்தில் மிர்ச்சி சிவா நடிக்க, சூது கவ்வம் 2 படத்தின் டீசர் வெளியாகி ரசிகர்களிடம் வரவேற்பை பெற்றுள்ளது.
கடந்த 2013இல் வெளியாகி சூப்பர் ஹிட்டான படம் சூது கவ்வும். அறிமுக இயக்குநராக நலன் குமாரசாமி இயக்க, விஜய் சேதுபதி, சஞ்சனா ஷெட்டி, பாபி சிம்ஹா, அசோக் செல்வன், ரமேஷ் திலக், கருணாகரன், எம்எஸ் பாஸ்கர், ராதா ரவி, யோக் ஜேபி உள்பட பலரும் நடித்திருந்த இந்த படம் குறைந்த பட்ஜெட்டில் உருவாகி பாக்ஸ் ஆபிஸில் வசூலை அள்ளியது. இதைதத்தொடர்ந்து 11 ஆண்டுகள் கழித்து இந்த படத்தின் இரண்டாம் பாகம் சூது கவ்வும் 2 என்ற பெயரில் உருவாகியுள்ளது. இந்த பாகத்தில் விஜய் சேதுபதி கதாபாத்திரத்தில் மிர்ச்சி சிவா நடித்துள்ளார். அத்துடன் முதல் பாகத்தில் நடித்த பெரும்பாலான நடிகர்கள் இந்த பாகத்திலும் நடித்துள்ளார்கள். படத்துக்கு திரைக்கதை எழுதி, எஸ்ஜே அருண் இயக்கியுள்ளார். எட்வின் லூயிஸ் விஸ்வநாதன் இசையமைத்துள்ளார். முதல் பாகத்தை தயாரித்த சி.வி. குமார் இந்த பாகத்தையும் தயாரித்துள்ளார்.
இந்த படத்தின் டீசரை படக்குழுவினர் தற்போது வெளியிட்டுள்ளனர். முதல் பாகத்துடன் தொடர்புபடுத்தும் விதமாக பல்வேறு காட்சிகள் இந்த பாகத்திலும் இடம்பிடித்துள்ளன. முதல் பாகத்தை போல் இந்த பாகத்தையும் கோடை விடுமுறை விருந்தாக ரிலீஸ் செய்யப்படும் என தெரிவிக்கப்பட்டுள்ளது.
சூதுகவ்வும் பிளாக் காமெடி படமாக வெளியாகி ரசிகர்களை வெகுவாக கவர்ந்தது. ஷார்கட்டில் பணத்தை சம்பாதிக்க நினைக்கும் விஜய் சேதுபதி, அசோக் செல்வன் மற்றும் அவரது நண்பர்கள் பாபி சிம்ஹா, ரமேஷ் திலக், அமைச்சர் மகனாக வரும் கருணாகரன் ஆகியோர் சந்திக்கும் பிரச்னைகளே படத்தின் கதையாக அமைந்துள்ளது. இரண்டாவது பாகம் படமும் அதேபோன்றதொரு கதையம்சத்தில் உருவாகி இருப்பதாக தெரிகிறது. மிர்ச்சி சிவாவின் சில டிரேட்மார்க் காமெடிகளும் படம் முழுவதிலும் இடம் பெறும் என கூறப்படுகிறது.
டீசர் காட்சியில் “பொண்ணுகளோடு கற்பனைல தான் நிம்மதியா வாழ முடியும்” என்ற மிர்ச்சி சிவாவின் வசனம் வைரலாகி வருகிறது.