“மது அருந்துவது குற்றமல்ல. இன்னும் சொல்லப்போனால் அரசே கடைகள் மூலம் மதுபானத்தை விற்பனை செய்கிறது. மது அருந்துவதால் ஏற்படும் விளைவுகளுக்கு அரசுதான் முழுப் பொறுப்பு” என்று நீதிபதி ஆனந்த் வெங்கடேஷ் கூறினார்.
லாரி மோதி ஏற்பட்ட விபத்தில் இருசக்கர வாகனத்தில் சென்று காயமடைந்த ரமேஷ் என்பவர் இழப்பீடு கேட்டு பெரம்பலூர் மோட்டார் விபத்து வழக்குகளை விசாரிக்கும் தீர்ப்பாயத்தில் 2016ஆம் வழக்கு தொடர்ந்திருந்தார். இவ்வழக்கை விசாரித்த தீர்ப்பாயம், மனுதாரர் 3.07 லட்சம் இழப்பீடு பெற தகுதியுள்ளது என்று தெரிவித்தது. ஆனால், விபத்து நடந்தபோது ரமேஷ் மீது மதுவாசனை வீசியதாகவும், லாரியில் இருந்து அவர் பாதுகாப்பான இடைவெளியை பின்பற்றவில்லை என்றும் கூறி 50% இழப்பீடாக 1, 53,952 ரூபாய் வழங்க உத்தரவு பிறப்பித்தது. இந்த உத்தரவை எதிர்த்து ரமேஷ் சென்னை உயர் நீதிமன்றத்தில் மேல்முறையீடு செய்தார்.
இவ்வழக்கு நீதிபதி ஆனந்த் வெங்கடேஷ் முன்பு நேற்று விசாரணைக்கு வந்தது. அப்போது, “மது வாசனை வீசியதாக கூறிய போதிலும், அதன் அளவை குறிப்பிடவில்லை. ஓட்டுநரின் ரத்தத்தில் ஆல்கஹால் அளவு அனுமதிக்கப்பட்ட அளவைத் தாண்டியிருந்தால் மட்டுமே கவனக்குறைவாக இருக்க முடியும். அதேபோல மாநில சாலைகளில் பாதுகாப்பான இடைவெளியை பின்பற்ற முடியாது என்பதை கவனத்தில் கொள்ள வேண்டும்” என நீதிபதி கருத்து தெரிவித்தார்.
இந்த காரணத்துக்காக பாதிக்கப்பட்டவருக்கு முழு இழப்பீட்டுத் தொகையை மறுக்க முடியாது என்றும், ரமேஷுக்கு வழங்கப்பட்ட இழப்பீட்டை 3, 53,904 ரூபாயாக அதிகரித்து வழங்கவும் உத்தரவிட்டார். இதனைத் தொடர்ந்து “மது அருந்துவது குற்றமல்ல. இன்னும் சொல்லப்போனால் அரசே கடைகள் மூலம் மதுபானத்தை விற்பனை செய்கிறது. மது அருந்துவதால் ஏற்படும் விளைவுகளுக்கு அரசுதான் முழுப் பொறுப்பு” என்றும் நீதிபதி சுட்டிக்காட்டினார்.
தொடர்ந்து, பல சமயங்களில் மோட்டார் வாகன விபத்துகளில் சிக்கி மருத்துவமனை அழைத்து வரப்படும் நபர்களுக்கு இரத்தத்தில் ஆல்கஹால் அளவை மருத்துவர்கள் பரிசோதிக்கத் தவறுவதாகத் தெரிவித்த நீதிபதி, “இதனால் விபத்தில் காயமடைபவர்களுக்கு உரிய இழப்பீட்டை தீர்மானிக்க முடியாத நிலை உள்ளது” என்று விவரித்தார்.
ஆகவே, மோட்டார் வாகன விபத்தில் சிக்கி மருத்துவமனை அழைத்து வரப்படும் நபர்கள் மீது மதுவாசனை வீசினால், அவர்களின் ரத்தத்தில் ஆல்கஹால் அளவைப் பரிசோதிக்கவும், அதனை விபத்து அறிக்கைகளில் பதிவு செய்யவும் தனியார் மருத்துவமனைகள் உட்பட அனைத்து மருத்துவமனைகளுக்கும் சுற்றறிக்கையை வெளியிடுமாறு சுகாதாரத் துறை செயலாளருக்கு நீதிபதி ஆனந்த் வெங்கடேஷ் உத்தரவிட்டார்.