தன் காதல் மனைவியான குஷ்பு பற்றி இதுவரை யாருக்கும் தெரியாத விஷயத்தை கூறியிருக்கிறார் சுந்தர் சி. திருமணம் செய்து கொள்ள முடிவு செய்தபோது தங்கள் வாழ்க்கையில் டாக்டர்கள் குண்டை தூக்கிப் போட்டது பற்றி பேசியிருக்கிறார் அவர்.
கோலிவுட்டின் வெற்றிகரமான இயக்குநர்களில் ஒருவர் சுந்தர் சி. அவரும், நடிகை குஷ்புவும் ஆறு ஆண்டுகளாக காதலித்து கடந்த 2000ம் ஆண்டு திருமணம் செய்து கொண்டார்கள். அவர்களுக்கு அவந்திகா, அனந்திதா என இரண்டு மகள்கள் இருக்கிறார்கள். மகள்களின் பெயரில் தயாரிப்பு நிறுவனம் துவங்கி குஷ்புவுடன் சேர்ந்து படங்களை தயாரித்து வருகிறார். இந்நிலையில் சுந்தர் சி. இயக்கி, நடித்திருக்கும் அரண்மனை 4 படம் நாளை தியேட்டர்களில் ரிலீஸாகவிருக்கிறது. இதையொட்டி அவர் படத்தை விளம்பரம் செய்து வருகிறார், மேலும் பேட்டிகள் கொடுத்து வருகிறார்.
பேட்டிகளில் சுந்தர் சி. சொல்லும் விஷயங்கள் எல்லாம் ரசிகர்களை கவர்ந்து கொண்டிருக்கிறது. இந்நிலையில் தன் மனைவி பற்றி இதுவரை சொல்லாத ஒரு விஷயத்தை சொல்லியிருக்கிறார் சுந்தர் சி. பேட்டி ஒன்றில் சுந்தர் சி. கூறியதாவது:-
நானும், குஷ்புவும் திருமணம் செய்து கொள்ள முடிவு செய்தோம். அந்த நேரத்தில் அவருக்கு உடல்நிலை பாதிக்கப்பட்டது. அவரை பரிசோதனை செய்த மருத்துவர்களோ, குஷ்புவுக்கு குழந்தை பிறக்க வாய்ப்பே இல்லை என்றார்கள். இதை கேட்ட குஷ்புவோ, நீங்கள் வேறு ஒரு பெண்ணை திருமணம் செய்து கொண்டு சந்தோஷமாக இருங்க என்றார்.
வேறு யாரையும் திருமணம் செய்யும் ஐடியா இல்லை என்றேன். சரி திருமணம் செய்து கொண்டால் குழந்தை பிறக்காது, உனக்கு நான் குழந்தை, எனக்கு நீ குழந்தை என முடிவு செய்தோம். ஆனால் திருமணமான பிறகு ஒன்று அல்ல இரண்டு பெண் பிள்ளைகள் பிறந்தார்கள். இது கடவுளின் அருள் என்றார்.
மூத்த மகள் அவந்திகா அம்மா வழியில் நடிகையாக முடிவு செய்திருக்கிறார். குஷ்புவும், சுந்தர் சி.யும் நினைத்தால் அவந்திகாவை ஹீரோயினாக வைத்து படம் எடுத்து ரிலீஸ் செய்யலாம். ஆனால் அவர்கள் அப்படி செய்யவில்லை. மகள் தன் சொந்த முயற்சியால் நடிகையாகட்டும் என விட்டுவிட்டார்கள்.
இளைய மகள் அனந்திதாவுக்கு அப்பா மாதிரி இயக்குநராகும் ஆசை. அதனால் தற்போது மணிரத்னத்திடம் உதவியாளராக வேலை செய்து வருகிறார். உலக நாயகன் கமல் ஹாசனை வைத்து மணிரத்னம் இயக்கி வரும் தக்லைஃப் படத்தில் வேலை செய்து கொண்டிருக்கிறார் அனந்திதா.