உள்நாட்டுப் போரை நோக்கி இந்தியா செல்வதாக, ராஷ்ட்ரீய ஜனதா தளம் கட்சித் தலைவர் லாலு பிரசாத் யாதவ் தெரிவித்து உள்ளார்.
கடந்த சில மாதங்களுக்கு முன்னர் 5-வது மாட்டுத் தீவன ஊழல் வழக்கில், பீகார் மாநில முன்னாள் முதலமைச்சரும், ராஷ்ட்ரீய ஜனதா தளம் கட்சித் தலைவருமான லாலு பிரசாத் யாதவ் குற்றவாளி என ராஞ்சி சிபிஐ சிறப்பு நீதிமன்றம் தீர்ப்பு வழங்கியது. இதில் அவருக்கு மேலும் 5 ஆண்டுகள் சிறை தண்டனையும், 60 லட்சம் ரூபாய் அபராதமும் விதிக்கப்பட்டது. இதற்கிடையே, இந்த வழக்கில் கடந்த மாதம் தான் ஜாமினில் லாலு பிரசாத் யாதவ் வெளியே வந்தார். இத்தகைய சூழலில் அவர் மீது மேலும் ஒரு வழக்கு பதிந்து சிபிஐ விசாரணையைத் தொடங்கி உள்ளது. இந்த முறை, அரசுப் பணி நியமனங்களில் முறைகேடு செய்ததாக, லாலு பிரசாத் யாதவ் அவரது குடும்பத்தினர் மீது வழக்குப் பதிவு செய்யப்பட்டு உள்ளது. மேலும், இந்த வழக்கு தொடர்பாக அவருக்கு சொந்தமான இடங்களிலும் சோதனை நடத்தப்பட்டு உள்ளது.
இந்நிலையில், பொதுக் கூட்டம் ஒன்றில் பேசிய லாலு பிரசாத் யாதவ் கூறியதாவது:-
பாஜகவின் செயல்பாடுகளைப் பார்க்கும் போது நாடு உள்நாட்டுப் போரை நோக்கி நகர்கிறதோ எனத் தோன்றுகிறது. நாட்டு மக்கள் இந்த வேளையில் பணவீக்கம், வேலைவாய்ப்பின்மை, ஊழல் ஆகியவற்றிற்கு எதிராக போராட வேண்டும். நாம் ஒன்றிணைந்து போராடினால் தான் வெற்றி கிடைக்கும். மதச்சார்பற்ற சக்திகள் ஒருங்கிணைந்து போராட வேண்டும். இவ்வாறு அவர் கூறினார்.