முத்தமிழ் முருகன் மாநாட்டில் நிறைவுரையாற்றிய அமைச்சர் உதயநிதி ஸ்டாலின், ‘திராவிடம் என்பது எல்லோருக்கும், எல்லாம் என்பது’எனத் தெரிவித்துள்ளார்.
முருக பக்தர்களை உலகளவில் ஒருங்கிணைக்கும் வகையில் அனைத்துலக முத்தமிழ் முருகன் மாநாடு திண்டுக்கல் மாவட்டம் பழனியில் நேற்று முன்தினம் தொடங்கியது. தமிழக அரசின் இந்து சமய அறநிலையத் துறை நடத்திய முருகன் மாநாட்டில் நேற்றும் ஆயிரக்கணக்கான முருக பக்தர்கள் கலந்துகொண்டனர். மாநாட்டில் காணொலி வாயிலாக தொடக்க உரையாற்றிய முதல்வர் மு.க.ஸ்டாலின், ஒவ்வொருவருக்கும் ஒரு நம்பிக்கை இருக்கும். அந்த நம்பிக்கைகளுக்கு திராவிட மாடல் அரசு தடையாக இருக்காது என்று தெரிவித்தார். இரண்டு நாள் மாநாடு நிறைவுபெற்ற நிலையில், அமைச்சர் உதயநிதி ஸ்டாலின் நிறைவு உரையாற்றினார். உதயநிதி ஸ்டாலின் பேசியதாவது:-
அறநிலையத் துறையின் பொற்காலம் என்று சொன்னால் அது திமுக ஆட்சிக் காலம்தான். திராவிட இயக்கத்தின் தொடக்கப் புள்ளியாக இருந்த நீதிக் கட்சி ஆட்சியில்தான் இந்து சமய அறநிலையத் துறை பாதுகாப்புச் சட்டம் உருவாக்கப்பட்டு, வழிபாட்டு உரிமை உறுதி செய்யப்பட்டது. குற்றக்குடி அடிகளார் தந்த திருநீறை நெற்றி நிறைய பூசிக்கொண்டவர் தான் தந்தை பெரியார். ஒன்றே குலம் ஒருவனே தேவன் என்று அண்ணா முழங்கினார். ஓடாத திருவாரூர் தேரை ஓட வைத்தவர்தான் கலைஞர்.
இப்படிப்பட்ட தலைவர்கள் வழியில் முதல்வர் மு.க.ஸ்டாலின் அறநிலையத் துறை சார்பில் ஏராளமான திட்டங்களை செயல்படுத்தி வருகிறார். திராவிட மாடல் அரசு அமைந்த இந்த 3 ஆண்டுகளில் மட்டும் 1400க்கும் அதிகமான கோயில்களுக்கு குட முழுக்கு செய்யப்பட்டுள்ளது. 5,600 கோடி ரூபாய் மதிப்பிலான 6,000 ஏக்கர் கோயில் நிலங்கள் மீட்கப்பட்டுள்ளன. 3,800 கோடி ரூபாய் மதிப்பீட்டில் 8500 கோயில்களில் திருப்பணிகள் மேற்கொள்ளப்பட்டுள்ளன. நாள் ஒன்றுக்கு 1 லட்சம் பக்தர்களுக்கு கோயில்களில் அன்னதானம் வழங்கப்படுகிறது.
திராவிடம் என்பது எல்லோருக்கும் எல்லாமும் என்பதுதான். திராவிடம் யாரையும் ஒடுக்காது, எல்லோரையும் இணைக்கும். அதற்கு உதாரணமாக அனைத்து சாதியினரையும், பெண்களையும் அர்ச்சகராக்கியவர் முதல்வர் மு.க.ஸ்டாலின். அன்னைத் தமிழில் அர்ச்சனை திட்டம் அனைத்து கோயில்களிலும் செயல்படுத்தப்பட்டு வருகிறது. மற்ற துறைகளைப் போல அறநிலையத் துறையும் இந்திய ஒன்றியத்துக்கே வழிகாட்டி வருகிறது. இப்படி அடுக்கடுக்கான சாதனைகளை செய்துவிட்டுதான் இப்படி சிறப்புமிக்க முருகன் மாநாட்டினை தமிழக அரசு நடத்துகிறது.
முருகன் மாநாடு ஆன்மீக மாநாடாக மட்டுமல்லாமல் தமிழர் பண்பாட்டு மாநாடாகவும் நடைபெறுகிறது. திமுக அரசின் இந்த முயற்சிகளை பக்தர்கள், ஆன்மீக பெரியோர் பாராட்டி வருகிறார்கள். இந்த மாநாட்டின் பங்கேற்றதில் நான் மிக்க மகிழ்ச்சி அடைகிறேன். ஆன்மீகத்தை எல்லோருக்கும் உடையதாக்குகிற வகையில் நடைபெறும் அனைத்துலக முத்தமிழ் முருகன் மாநாடு வரலாற்றில் என்றென்றும் நிலைத்து நிற்கும் என்பது உறுதி. இவ்வாறு அவர் கூறினார்.