கரும்பு விவசாயிகளுக்கு ஊக்கத் தொகை வழங்க வேண்டும் என தமிழக அரசுக்கு எடப்பாடி பழனிசாமி வலியுறுத்தி உள்ளார்.
தமிழகத்தில் நெல்லுக்கு அடுத்தபடியாக கரும்பு விவசாயம்தான் பிரதானமாக உள்ளது. டெல்டா பகுதி உள்பட பல மாவட்டங்களில் லட்சக்கணக்கான ஏக்கரில் கரும்பு பயிரிடப்பட்டுள்ளது. எனினும், கரும்பு விவசாயத்தில் பல்வேறு சிரமங்களை சந்திப்பதாக விவசாயிகள் தெரிவித்து வருகின்றனர். அத்துடன், கரும்புக்கான குறைந்தபட்ச ஆதார விலையை உயர்த்தித் தர வேண்டும் எனவும் கோரிக்கை வைத்து வருகிறார்கள்.
இந்த நிலையில் எதிர்க்கட்சித் தலைவர் எடப்பாடி பழனிசாமி வெளியிட்ட அறிக்கையில், “கரும்பு டன் ஒன்றுக்கு குறைந்தபட்ச ஆதார விலையாக ரூ.4000 வழங்கப்படும் என்று சட்டமன்ற தேர்தலின் போது வாக்குறுதி அளித்து திமுக ஆட்சியைப் பிடித்தது. 41 மாதங்கள் ஆகிவிட்ட நிலையில் 2023-24ம் ஆண்டில் கரும்பு சப்ளை செய்த விவசாயிகளுக்கு சிறப்பு ஊக்கத் தொகையாக டன் ஒன்றுக்கு 215 ரூபாய் வழங்கப்படும் என்று சட்டமன்றத்தில் வேளாண் துறை அமைச்சர் அறிவித்தார்” என்று சுட்டிக்காட்டினார்.
அதனையே உறுதி செய்து தீபாவளிக்கு முன்பு அனைத்து கரும்பு விவசாயிகளுக்கும் ஊக்கத் தொகை வழங்கப்படும் என்று தமிழக அரசின் சார்பில் செய்தி குறிப்பும் வெளியிடப்பட்டது என்று தெரிவித்த இபிஎஸ், ஆனால் இன்று வரை ஊக்கத் தொகை கரும்பு விவசாயிகளுக்கு வழங்குவதற்கான எந்த விதமான நடவடிக்கைகளையும் திமுக அரசு எடுக்கவில்லை என்று விமர்சனம் செய்தார்.
மேலும், “தீபாவளிக்கு இன்னும் ஒரீரு நாட்களே உள்ள நிலையில் ஊக்கத் தொகை கிடைக்காத கரும்பு விவசாயிகள் இந்தாண்டு தீபாவளியை வழக்கமான உற்சாகத்தில் கொண்டாட முடியாமல் மிகுந்த அதிருப்தியில் உள்ளனர். ஆகவே, உடனடியாக கரும்பு விவசாயிகளுக்கு சிறப்பு ஊக்கத் தொகையை வழங்க முதல்வர் மு.க.ஸ்டாலினை வலியுறுத்துகிறேன்” என்று குறிப்பிட்டுள்ளார்.