சிறுபான்மை மக்கள் என்றைக்கும் கழகத்திற்கு துணையாக இருந்து கழகத்திற்கு வாக்களிக்க வேண்டும் என்று உதயநிதி ஸ்டாலின் கூறினார்.
தமிழ்நாடு துணை முதலமைச்சர் உதயநிதி ஸ்டாலின் காஞ்சிபுரம் வடக்கு மாவட்ட தி.மு.கழக சிறுபான்மை நல உரிமைப்பிரிவு சார்பில் ஆலந்தூர் கண்டோன்மெண்ட் புனித மான்போர்ட் மெட்ரிக் மேல்நிலை பள்ளியில் நடைபெற்ற சமத்துவ கிறிஸ்துமஸ் பெருவிழாவில் 1,000 கிறிஸ்துவ பெருமக்களுக்கு நலத்திட்ட உதவிகளை வழங்கினார். நிகழ்வில் உதயநிதி பேசியதாவது:-
கிறிஸ்துமஸ் என்றாலே எனக்கு கூடுதல் மகிழ்ச்சி ஏற்பட்டு விடும். ஏனென்றால், எனக்கு விபரம் தெரிந்த காலத்தில் இருந்து நான் பள்ளிப்படிப்பை படித்தது கிறிஸ்டியன் ஸ்கூலில்தான். எக்மோரில் இருக்கக் கூடிய டான் பாஸ்கோ பள்ளிக்கூடத்தில் படித்தேன். அதன் பிறகு, கல்லூரிப் படிப்பை லயோலா கல்லூரியில் படித்தேன். எல்லாமே கிறிஸ்டியன் இன்ஸ்டியூட்டில் படித்தது தான். அதனால், கிறிஸ்துமஸ் என்றாலே கூடுதல் மகிழ்ச்சி தான். எல்லோரிடமும் அன்பு செலுத்துகிற ஒரு விழா என்றால் அது கிறிஸ்துமஸ் விழாதான். எல்லா மதங்களுமே அன்பை தான் போதிக்கின்றன. ஆனால், மதங்களின் பெயரைச் சொல்லி அரசியல் செய்யும் சங்கிகள் தான் எப்போதுமே வெறுப்பைப் பரப்புகிறார்கள். இப்போது சங்கிகள் மட்டுமல்ல, அவர்களின் ஸ்லீப்பர் செல்லாக உயர் பொறுப்புகளில் சிலபேர் கூட, வெளிப்படையாக வெறுப்பு பிரச்சாரத்தில் ஈடுபடுகிறார்கள்.
சமீபத்தில், அலகாபாத் உயர் நீதிமன்ற நீதிபதி ஒருவர், இஸ்லாமியர்களுக்கு எதிராக ஒரு கருத்தைப் பேசியிருக்கிறார். அதைக்கண்டித்து ஒட்டுமொத்த எதிர்க்கட்சிகளும் ஓரணியில் நிற்கின்றன. அவர் மீது நடவடிக்கை எடுக்க வலியுறுத்தி விவாதம் நடத்த வேண்டும் என, தி.மு.க, காங்கிரஸ் உள்ளிட்டவற்றின் எம்.பி.க்கள் கையெழுத்திட்டு கடிதம் கொடுத்தனர். ஆனால், அந்த கடிதத்தில் கையெழுத்திடாத ஒரே இயக்கம் எது என்று பார்த்தால் இங்கே இருக்கக்கூடிய அதிமுக என்ற இயக்கம் தான். அந்தப் பிரச்சினையில் மட்டுமல்ல. சமீபத்தில், நாடாளுமன்றத்தில் அண்ணல் அம்பேத்கர் அவர்களை இழிவுபடுத்தும் விதமாக உள்துறை அமைச்சர் அமித்ஷா அவர்கள் மக்களவையில் பேசியிருக்கிறார். அதற்கு ஒட்டுமொத்த நாடே வெகுண்டெழுந்தது. நம்முடைய கழகம் சார்பில், இந்த காஞ்சிபுரம் வடக்கு மாவட்டத்தில் கூட ஆர்ப்பாட்டம் நடைபெற்றது.
இன்று கூட, கழக செயற்குழுவில் அமித்ஷாவின் அவர்களின் பேச்சைக் கண்டித்து மிகப் பெரிய ஒரு தீர்மானத்தை நிறைவேற்றியிருக்கிறோம். நம்முடைய தலைவர் அவர்கள் மிகக் கடுமையான கண்டனத்தை தெரிவித்தியிருக்கிறார்கள். ஆனால், அதிமுக எதிர்க்கட்சித் தலைவர் திரு.எடப்பாடி பழனிசாமியிடம் பத்திரிகையாளர்கள் இதைப்பற்றி கேட்டால், அவர் என்ன சொல்கிறார் என்றால், ஜெயக்குமார் என்ன சொன்னாரோ அதுதான் என் கருத்தும் என்று சொல்லியிருக்கிறார். இப்படி யாராவது ஒரு கருத்தை சொல்லிக் கேட்டிருக்கிறீர்களா? சரி ஜெயக்குமார் என்னதான் சொல்லிருக்கார் என்று பார்த்தால், “பாஜக பின்விளைவுகளை சந்திக்கும்” என்று பொத்தாம் பொதுவாக சொல்லியிருக்கிறார். பாஜக-விற்கு தமிழ்நாட்டில் எப்போதும் பின்விளைவுகளை சந்திப்பதுதான் வேலை என்பது ஒட்டுமொத்த தமிழ்நாட்டு மக்களுக்கே தெரியும்.
அதுமட்டுமல்ல, மாநிலங்களின் உரிமைகளை எல்லாம் ஒழித்துவிட வேண்டும் என்று பாஜக இன்றைக்கு ஒரே நாடு ஒரே தேர்தல் என்ற திட்டத்தை கொண்டு வருகிறது. அதையும் அதிமுக ஆதரிக்கிறது. மாநில சுயாட்சி நாயகர் பேரறிஞர் அண்ணாவின் பெயரை கட்சிப்பெயரில் வைத்துக் கொண்டு, மாநிலங்களுக்கு எதிரான ஒரே நாடு ஒரே தேர்தல் திட்டத்தை எடப்பாடி பழனிச்சாமி ஆதரிக்கிறார் என்றால் இதை விட மிகப் பெரிய வெட்கக்கேடு வேறென்ன இருக்கிறது?
புயல் பாதிப்புக்கு நம்முடைய முதலமைச்சர் அவர்கள் நிவாரண நிதியாக ஒன்றிய அரசிடம் 6 ஆயிரம் கோடி வேண்டும் என்று கேட்டார்கள். ஆனால், ஒன்றிய அரசு தமிழ்நாட்டிற்கு வழங்கியது வெறும் 945 கோடியை தந்தது. நாம் கேட்டது 6000 கோடி ரூபாய். அம்பேத்கர் அவர்களை பாஜக கொச்சசைப்படுத்தினால், திட்டினால் அதற்கு அமைதி. சிறுபான்மையினருக்கு எதிராக பேசினால், அதற்கும் அமைதி. தமிழ்நாட்டுக்கு நிதி தரவில்லை என்றாலும் அமைதி. அந்தளவுக்கு பயம். இது தான் இன்றைக்கு அதிமுக-வின் நிலைமை. கழக அரசின் மீது எந்த குற்றச்சாட்டையும் அவர்களால் சொல்ல முடியவில்லை. அதனால்தான் வெறும் வதந்தியை பரப்பிக் கொண்டிருக்கிறார்கள்.
கடந்த வாரம் என்னைப் பற்றி ஒரு வதந்தி வந்தது. சனாதனம் பற்றி நான் பேசியதற்காக யாரோ ஒரு சாமியாரிடம் சென்று ஏதோ ஒரு பரிகாரம் செய்து வந்தேன் என்ற ஒரு வதந்தி. கேள்விப்பட்டிருப்பீர்கள். என்னுடைய தலையையே சீவுவேன் என்று சொன்னார்கள். மன்னிப்பு கேட்கவேண்டும் என்று சொன்னார்கள். மன்னிப்பு கேட்க முடியாது என்று சொன்னேன். நீதிமன்றம், நீதிமன்றமாக போய் வழக்குப் போட்ட போதும் அதற்கும் நான் பயப்படல. நான் போய் பரிகாரம் கேட்பேனா? அந்த செயலில் ஈடுபடுவேனா? நான் கலைஞர் அவர்களுடைய பேரன். சொன்னால் சொன்னதுதான். என்னுடைய கொள்கையில் எப்போதும் உறுதியாக இருப்பேன். இந்த வதந்தியை கூட வாயை வாடகைக்கு விடுவார்கள் என்று சொல்வார்கள் அந்த மாதிரி ஆட்கள் இதைப்பற்றி பரப்பிக் கொண்டிருந்தார்கள். பிறப்பால் ஏற்றத் தாழ்வு சொல்லும் எதையும், எப்போதும் எதிர்ப்போம். சமத்துவ சமுதாயம் அமைப்பது தான் எங்கள் இலக்கு என்பதை மீண்டும் உறுதி செய்திட விரும்புகின்றேன்.
இந்த நேரத்தில ஒரு சிறிய நிகழ்வை நான் குறிப்பிட விரும்புகின்றேன். இங்கே திரு.பீட்டர் அல்போன்ஸ் அவர்கள் பேசும்போது சொன்னார். இந்த கிறிஸ்துமஸ் விழாவை நாமும் கொண்டாடிக் கொண்டிருக்கிறோம். எதிர்க்கட்சித் தலைவர் எடப்பாடி பழனிசாமி அவர்களும் நேற்று ஒரு நிகழ்ச்சியில் கலந்து கொண்டிருக்கிறார். ஒன்றிய பிரதமர் திரு.மோடி அவர்களும் கிறிஸ்துமஸ் நிகழ்ச்சியில் கலந்து கொண்டிருக்கிறார். ஆனால் இந்த நிகழ்ச்சிக்கும், அவர்கள் கலந்து கொண்ட நிகழ்ச்சிக்கும் ஒரு வித்தியாசம் இருக்கிறது. இந்த சிறிய கதையை கலைஞர் அவர்கள் தான் ஒரு உவமையாக சொல்லியிருக்கிறார்.
ஒரு பாலைவனம், அந்தப் பாலைவனத்தில் ஒரு பாம்பு ஊர்ந்து வருகின்றது. கடுமையான வறட்சி. வெயில் சுட்டெரிக்கிறது. தரையெல்லாம் ஒரே சூடு. அப்போது, அந்த பாம்பினால் ஊர்ந்து செல்ல முடியவில்லை. உடனே அந்த பாம்பு, தன் தலையையும், உடலையும் தூக்கிக் கொண்டு வெறும் வாலில் ஊர்ந்து சென்று கொண்டிருக்கிறது. அப்போது, பாம்பின் தலை மற்றும் உடலின் நிழல், அந்த மண்ணில் விழுகிறது. அந்த வழியாக வந்த தவளை ஒன்று பாம்பின் நிழலின் கீழே போய் நிற்கிறது. அந்த பாம்பு தலையை குனிந்து கீழே பார்க்காத வரைக்கும் தான் அந்த தவளைக்கு பாதுகாப்பு. பாம்பு கீழே பார்த்தால் தவளையின் நிலைமை என்ன என்பது உங்களுக்குத் தெரியும்.
அதேபோல மற்றொரு கதை இருக்குது. அதே பாலைவனத்தில், தாய் மானும், குட்டி மானும் வெயிலில் நடந்து வந்து கொண்டிருக்கின்றன. வெயில் சூட்டினால், குட்டி மானால் நடக்க முடியவில்லை. உடனே தாய்மான், ஒரு பக்கம் நின்று கொண்டிருக்கிறது. அதன் நிழல் மறுபக்கம் விழுகிறது. உடனே, அந்த நிழலில் குட்டி மானை உட்காரச் சொல்கிறது தாய்மான். இப்படி நான் இரண்டு நிழல்களை சொல்லியிருக்கின்றேன்.
இங்கே பாம்பின் கீழ் நிற்கும் தவளை என்பது போலத்தான், அதிமுகவை மக்கள் பார்க்கின்றார்கள். ஆனால், திமுகவை சிறுபான்மை மக்கள் நம்புவது என்பது தாய் மான் நிழலில், குட்டி மான் இளைப்பாறுவதைப் போலதான் சிறுபான்மை மக்கள் நீங்கள் பார்க்கின்றீர்கள். இது அன்பால் செய்கிற உதவி. இதற்கு ஈடுஇணையே கிடையாது. ஆகவே, திராவிட முன்னேற்றக் கழகம் என்கிற கட்சி இருக்கிற வரை, சிறுபான்மை மக்களுக்கு என்றென்றும் பாதுகாப்பாக இருப்போம். உங்களுக்கு அரணாக நிற்கும் கழகத்துக்கு நீங்கள் என்றும் அரணாக, ஆதரவாக இருப்பீர்கள் என்ற நம்பிக்கை எனக்கு உண்டு.
வருகின்ற 2026 சட்டமன்றத் தேர்தல் விரைவில் வர இருக்கிறது. இதற்கு உங்களின் ஆதரவு கழகத்துக்கு மிக மிக முக்கியம். எங்களுடைய கழகத் தலைவர் முதலமைச்சர் குறைந்தது 200 சட்டமன்ற தொகுதிகளில் திமுக வென்று கூட்டணி ஆட்சி அமைக்கும் என்று சொல்லியிருக்கிறார். எந்த தைரியத்தில் சொல்லியிருக்கிறார் என்றால், சிறுபான்மை மக்கள் நீங்கள் என்றைக்கும் கழகத்திற்கு துணையாக இருந்து கழகத்திற்கு வாக்களிக்க வேண்டும் என்று கேட்டுக் கொண்டு, மீண்டும் ஒரு முறை கிறிஸ்துமஸ் வாழ்த்துகளை தெரிவித்து விடைபெறுகிறேன். இவ்வாறு அவர் கூறினார்.