வித்தியாசமான அரசியல் செய்வேன் என கெஜ்ரிவால் கூறியதாக ராகுல் காந்தி தெரிவித்துள்ளார்.
டெல்லி சட்டப்பேரவைத் தோ்தல் வரும் பிப்.5-ஆம் தேதி நடைபெறவுள்ளது. அங்கு ஆளுங்கட்சியாக உள்ள ஆம் ஆத்மி, எதிர்க்கட்சியான பாஜக மற்றும் காங்கிரஸ் ஆகிய கட்சிகளிடையே மும்முனைப் போட்டி நிலவுகிறது.
சமாஜ்வாதி, திரிணமூல், சிவசேனை(உத்தவ்), தேசியவாத காங்கிரஸ் ஆகியவை ஆம் ஆத்மிக்கு ஆதரவு தெரிவித்துள்ளன.
இந்த நிலையில் மேற்கு வினோத் நகரில் நடந்த பொதுக்கூட்டத்தில் உரையாற்றிய காங்கிரஸ் எம்.பி.யும் மக்களவை எதிர்க்கட்சித் தலைவருமான ராகுல் காந்தி ஆம் ஆத்மி கட்சியில் தேசிய ஒருங்கிணைப்பாளரும் டெல்லியின் முன்னாள் முதல்வருமான அரவிந்த் கெஜ்ரிவாலை கடுமையாக சாடினார்.
மேலும் பிரசாரத்தில் ராகுல் காந்தி பேசும்போது, “டெல்லி முதல்வராக இருந்த அரவிந்த் கெஜ்ரிவால் மக்களை ஒருபோதும் நேரில் சந்திக்கவில்லை. டெல்லியில் வன்முறையால் மக்கள் பலரும் பாதிக்கப்பட்ட நிலையிலும் கெஜ்ரிவால் அவர்களைச் சந்திக்கவே இல்லை.
அரவிந்த் கெஜ்ரிவால் வித்தியாசமாக அரசியல் செய்வதாக கூறினார். ஆனால், சிறிய காரில் வந்தவர் இப்போது, ஷீஷ் மஹாலில் இருக்கிறார். பட்பர்கஞ்ச் எம்எல்ஏவும் முன்னாள் டெல்லி துணை முதல்வருமான மணீஷ் சிசோடியா, அரவிந்த் கெஜ்ரிவாலுடன் சேர்ந்து மதுபான ஊழலில் ஈடுபட்டார். அதனால்தான் மணீஷ் சிசோடியா தன்னுடைய பதவியை விட்டு ஓடிவிட்டார். நாட்டின் எதிர்காலத்திற்காக அன்பை பரப்ப வேண்டும். மேலும் வெறுப்பை எதிர்த்து போராடவேண்டும்” என்றார்.