கொடைக்கானலில் கடும் மழையையும் பொருட்படுத்தாது கங்குவா படத்தின் படப்பிடிப்பை படக்குழு நடத்தி முடித்துள்ளது. இதனால் ஒட்டுமொத்த படக்குழுவிற்கும் சூர்யா பிரியாணி விருந்து வைத்துள்ளார்
தமிழ் சினிமாவில் தவிர்க்கமுடியாத முன்னணி நடிகர்களில் ஒருவர் தான் சூர்யா. இடையில் சில காலம் தோல்வி படங்களாக கொடுத்து வந்த சூர்யா சூரரைப்போற்று படத்திற்கு பிறகு மீண்டும் வெற்றிப்பாதைக்கு திரும்பினார். மேலும் அப்படத்தில் நடித்ததற்காக சிறந்த நடிகருக்கான தேசிய விருதை பெற்றார் சூர்யா.
இதையடுத்து ஜெய் பீம் என்ற படத்தில் நடித்த சூர்யா அப்படத்தின் மூலம் ரசிகர்களிடையே மிகப்பெரிய தாக்கத்தை ஏற்படுத்தினார். இவ்வாறு தொடர் வெற்றிகளை கொடுத்து வந்த சூர்யா விக்ரம் படத்தில் கெஸ்ட் ரோலில் நடித்து ரசிகர்களை வியக்க வைத்தார். ரோலக்ஸ் என்ற நெகட்டிவ் ரோலில் வெறும் ஐந்தே நிமிடங்கள் வந்து ரசிகர்களின் மனதில் நிலையான இடம் பிடித்தார் சூர்யா. இதன் மூலம் இவர் அடுத்தடுத்து நடித்து வரும் படங்களின் மீது மிகப்பெரிய எதிர்பார்ப்பு இருந்து வருகின்றது.
இந்நிலையில் தற்போது சூர்யா சிறுத்தை சிவா இயக்கத்தில் கங்குவா என்ற மிகப்பிரமாண்டமாக உருவாகும் படத்தில் நடித்து வருகின்றார். ஸ்டூடியோ க்ரீன் சார்பாக ஞானவேல் ராஜா தயாரித்து வரும் இப்படம் சூர்யாவின் திரைப்பயணத்திலேயே அதிக பொருட்செலவில் உருவாகும் படமாக இருக்குமாம். பீரியட் படமாக உருவாகும் கங்குவா 3d தொழில்நுட்பத்தில் பத்து மொழிகளில் அடுத்தாண்டு துவக்கத்தில் வெளியாகும் என தெரிகின்றது. பல நூற்றாண்டிற்கு முன்பு நடந்த சம்பவங்களை வைத்து சிவா கங்குவா படத்தின் கதைக்களத்தை உருவாக்கியுள்ளாராம் என்னதான் சிவாவின் முந்தைய படமான அண்ணாத்த திரைப்படம் தோல்வியடைந்தாலும் இப்படத்தின் மூலம் தமிழ் சினிமாவையே திரும்பிப்பார்க்க செய்வார் என அனைவராலும் எதிர்பார்க்கப்பட்டு வருகின்றது.
இந்நிலையில் கடந்த இரண்டு மாதங்களாக கங்குவா படத்தின் படப்பிடிப்பு விறுவிறுப்பாக நடைபெற்று வருகின்றது. தற்போது அடுத்தகட்ட படப்பிடிப்பு கொடைக்கானல் வனப்பகுதியில் நடைபெற்று முடிவிற்கு வந்துள்ளது. கொடைக்கானலில் தற்போது கடுமையாக மழை பெய்து வந்தாலும் அந்த மழையையும் பொருட்படுத்தாது படப்பிடிப்பை படக்குழு நடத்தி முடித்துள்ளது. எனவே படக்குழுவினர் மழை மற்றும் குளிரையும் பொருட்படுத்தாது கடுமையாக உழைத்து படப்பிடிப்பை முடிந்ததன் காரணமாக சூர்யா உச்சகட்ட மகிழ்ச்சியில் இருக்கிறாராம். அந்த மகிழ்ச்சியை வெளிப்படுத்த ஒட்டுமொத்த படக்குழுவிற்கும் பிரியாணி விருந்து வைத்துள்ளார் சூர்யா. இதன் காரணமாக ஒட்டுமொத்த படக்குழுவினரும் உச்சகட்ட நெகிழ்ச்சியில் இருக்கின்றனர்.