கமல்ஹாசனையும் தன்னையும் தாண்டிய சிறந்த நடிகர் பிரதமர் மோடிதான் என நடிகர் பிரகாஷ் ராஜ் தெரிவித்துள்ளார்.
தென்னிந்திய சினிமாவில் பிரபல நடிகராக வலம் வருபவர் நடிகர் பிரகாஷ் ராஜ். கர்நாடகாவை பூர்விகமாக கொண்ட பிரகாஷ் ராஜ், கன்னட சினிமா மட்டுமின்றி தமிழ், தெலுங்கு, மலையாளம் என பல்வேறு மொழிகளிலும் தனக்கு என ஒரு இடத்தை தக்கவைத்துள்ளார். வில்லனாக மிரட்டும் பிரகாஷ் ராஜ், சிறந்த குணச்சித்திர நடிகராகவும் உள்ளார். ஏரளாமான விருதுகளையும் குவித்துள்ளார்.
அரசியலிலும் தீவிரமாக உள்ளார் பிரகாஷ் ராஜ். சமூக வலைதளங்களிலும் ஆக்டிவாக உள்ள நடிகர் பிரகாஷ் ராஜ் அவ்வப்போது அரசியல் சார்ந்த கருத்துக்களையும் தெரிவித்து வருகிறார். குறிப்பாக பிரதமர் மோடியை கடுமையாக விமர்சித்து வருகிறார் நடிகர் பிரகாஷ் ராஜ். இதேபோல் காவிரி பிரச்சனையிலும், காவிரி எங்களுடையது என கன்னட மொழியில் டுவிட்டிய பிரகாஷ் ராஜ், நடிகர் சித்தார்த்தின் சினிமா நிகழ்ச்சி கன்னட அமைப்புகளால் நிறுத்தப்பட்டதற்கு ஆங்கிலத்தில் கண்டனம் தெரிவித்திருந்தார். இதனை கவனித்த நெட்டிசன்கள், காவிரி விவகாரத்தில் நடிகர் பிரகாஷ் ராஜ் இரட்டை வேடம் போடுவதாக தெரிவித்தனர். தொடர்ந்து பிரதமர் மோடி மற்றும் பாஜகவுக்கு எதிராக விமர்சனங்களை கூறி வருகிறார் பிரகாஷ் ராஜ்.
இந்நிலையில் ஊடகம் ஒன்றுக்கு பேட்டி அளித்துள்ளார் நடிகர் பிரகாஷ் ராஜ். அப்போது தொகுப்பாளர் நீங்களும் கமல்ஹாசனும் நடிகர்களாக இருந்து அரசியலில் தோற்றுள்ளீர்களே? சிறந்த நடிகர்கள் அரசியலில் வெற்றி பெற்றுள்ளார்களா? என கேள்வி எழுப்பினார்.
அதற்கு பதில் அளித்த நடிகர் பிரகாஷ் ராஜ், மோடி இருக்கிறாரே என்றார். மேலும் அவர் தன்னையும் கமல்ஹாசனையும் விட சிறந்த நடிகர், சிறந்த பர்ஃபார்மர். அவரைப் போன்ற ஒரு சிறந்த பேச்சாளரை தான் பார்த்ததே இல்லை என்றும் கூறியுள்ளார். மேலும் பிரதமர் மோடிக்கு என்று தனி காஸ்ட்யூம் டிப்பார்ட்மென்ட், ஹேர் ஸ்டைல் டிப்பார்ட்மென்ட் ஆகியவை உள்ளன என்றார்.
பிரகாஷ் ராஜின் இந்த வீடியோ சமூக வலைதளங்களில் தற்போது வைரலாகி வருகிறது. பிரதமர் மோடியை சிறந்த நடிகர் என விமர்சித்துள்ள நடிகர் பிரகாஷ் ராஜுக்கு பாஜகவினர் கண்டனம் தெரிவித்து வருகின்றனர். பிரதமர் மோடியின் வீடியோக்களை வெளியிட்டும் தனது கேப்ஷன்கள் மூலம் நக்கலடித்து வருகிறார் பிரகாஷ் ராஜ்.