‘படத்தில் எனக்கு கெட்டவன் வேடம் கொடுத்த இயக்குனரைப் பாராட்டுகிறேன். ஏனென்றால் நான் திரையில் கெட்டவனாக இருக்கவே விரும்புகிறேன்’ என்று கமல்ஹாசன் கூறினார்.
வைஜெயந்தி மூவிஸ் தயாரிப்பில் நாக் அஸ்வின் இயக்கிய ‘கல்கி 2898 ஏடி’, பல மொழிகளில் ஜூன் 27ம் தேதி திரையரங்குகளில் வெளியாக உள்ளது. இப்படம் ரூ. 600 கோடி பட்ஜெட்டில் உருவாகியுள்ளதாக கூறப்படுகிறது. படத்தின் புரமோஷன் நிகழ்ச்சி மும்பையில் நடைபெற்றது. இதில் கமல்ஹாசன் பேசும்போது, ‘படத்தில் எனக்கு கெட்டவன் வேடம் கொடுத்த இயக்குனரைப் பாராட்டுகிறேன். ஏனென்றால் நான் திரையில் கெட்டவனாக இருக்கவே விரும்புகிறேன். காரணம், அவர்களால்தான் திரையில் எல்லா நல்லதும் நடக்கும். இந்த படத்தில் இயக்குனர் அஸ்வின் கொடுத்த வேடம் ஒரு அற்புதமாக மாறி உள்ளது’ என்றார்.
பிரபாஸ் பேசும்போது, ‘இத்தகைய சிறந்த ஜாம்பவான்களுடன் (அமிதாப் பச்சன், கமல்ஹாசன்) பணியாற்ற எனக்கு வாய்ப்பளித்த தத்தா சார் மற்றும் நாகி சாருக்கு நன்றி சொல்ல வேண்டும். இது கனவை விட பெரியது. அமிதாப் பச்சன் சாரை முதன்முதலில் சந்தித்தேன், அவருடைய பாதங்களைத் தொட்டேன், அவர், ‘அதைச் செய்யாதே, நீங்கள் செய்தால், நானும் அதைச் செய்வேன்’ என்றார்.
நானோ ‘சார், உங்களுடன் நடிப்பதை என்னால் நினைத்துக்கூட பார்க்க முடியவில்லை. நான் உங்களைப் பார்த்து வளர்ந்தவன், நாட்டின் அனைத்து பகுதிகளையும் சென்றடைந்த நாட்டின் முதல் நடிகர் நீங்கள்’ என்றேன். ஒவ்வொரு உயரமான நபரையும் அமிதாப் பச்சன் என்று அழைத்தோம். இந்தியாவில், அந்தச் சாதனையைப் படைத்த முதல் நடிகர் அவர்தான்.
கமல் சாரின் சாகர் படம் வந்தபோது, நான் என் அம்மாவிடம், அவருடைய உடையை போல் வேண்டும் என்று கேட்டேன். அவரைப் போல் நடிக்க முயன்றேன். இன்று அவர்களுடன் வேலை செய்வது நம்பமுடியாத ஒன்று’ என்றார். விழாவில் அமிதாப் பச்சன், தீபிகா படுகோன், ராணா, நாக் அஸ்வின், தயாரிப்பாளர் அஸ்வனி தத் உள்பட பலர் பங்கேற்றனர்.