இன்று நடிகை கீர்த்தி சுரேஷின் பிறந்த நாளை முன்னிட்டு ரிவால்வர் ரீட்டா படத்தின் பெயர் டீசரை தயாரிப்பு நிறுவனம் வெளியிட்டுள்ளது.
தி ரூட் மற்றும் தி ஃபேஷன் ஸ்டூடியோஸ் நிறுவனங்களின் கூட்டுத் தயாரிப்பில் உருவாகி வரும் படம் ‘ரிவால்வர் ரீட்டா’. கீர்த்தி சுரேஷ் கதை நாயகியாக நடிக்கிறார். சரஸ்வதி சபதம் படத்தை இயக்கிய ஜேகே. சந்துரு இப்படத்தை எழுதி இயக்கியுள்ளார். படத்தின் படப்பிடிப்பு சில மாதங்களுக்கு முன் நிறைவடைந்தது.
இந்த நிலையில், இன்று நடிகை கீர்த்தி சுரேஷின் பிறந்த நாளை முன்னிட்டு இப்படத்தின் பெயர் டீசரை தயாரிப்பு நிறுவனம் வெளியிட்டுள்ளது.
இந்த படத்தின் டீசர் மிகச் சிறப்பாக அமைந்துள்ளது. மார்க்கெட்டில் காய்கறி வாங்கிக் கொண்டிருக்கும் கீர்த்தி சுரேஷின் கைப்பையை திருடர்கள் காரில் பிடுங்கிக் கொண்டு போகின்றனர். அவர்களிடத்திற்கு சென்று அதை திறந்து உள்ளே பார்க்கும் அவர்கள் அதிர்ச்சி அடைகின்றனர். அதில் துப்பாக்கி, ரத்தக்கறையுடன் கத்தி மற்றும் வெடிகுண்டு ஆகியவற்றை பார்க்கும் அவர்கள் அதிர்ச்சியுடன் இருக்கும் நிலையில், அங்கே மற்றொரு அடியாளை அடித்து விட்டு உள்ளே வருகிறார் கீர்த்தி சுரேஷ். அவரிடம் அடுத்தடுத்த கேள்விகளை கேட்கும் ரவுடிகள் அவர் என்ன டானா என்று கேட்கிறார்கள், அதற்கு அவர் நானா என்று ரைமிங்காக பதிலளிக்கிறார்.
இதனிடையே தன்னுடைய பேக்கை திரும்ப வாங்கும் கீர்த்தி சுரேஷ்க்கு அவருடைய அம்மாவாக நடித்துள்ள ராதிகாவிடமிருந்து கால் வருகிறது. அதை அட்டென்ட் செய்யும் கீர்த்தி சுரேஷிடம் ராதிகா வெங்காயம் வதக்கி கொண்டிருப்பதாகவும் தக்காளி வேண்டும் என்றும் கேட்க ஐந்து நிமிடத்தில் தான் அங்கே வருவதாக கீர்த்தி சுரேஷ் கூறுவதாக இந்த டீசரில் காணப்படுகிறது. தன்னுடைய அம்மாவிற்கு செல்ல மகளாகவும் அதே நேரத்தில் ரிவால்வரை வைத்து பல வேலைகளில் செய்யும் ரீட்டாவாகவும் கீர்த்தி சுரேஷ் இந்த படத்தில் நடித்துள்ளதாக தெரிகிறது.