விஜய் சேதுபதி நடிப்பில் வெற்றிமாறன் இயக்கத்தில் வெளியான திரைப்படம் தான் விடுதலை 2. இப்படம் வெற்றிபெற்றதை தொடர்ந்து படக்குழு இசைஞானி இளையராஜாவை நேரில் சந்தித்து தங்களின் நன்றியினை தெரிவித்துள்ளனர்
விஜய் சேதுபதி மற்றும் சூரியின் நடிப்பில் வெற்றிமாறனின் இயக்கத்தில் வெளியான திரைப்படம் தான் விடுதலை. இப்படம் 2023 ஆம் ஆண்டு மார்ச் மாதம் திரையில் வெளியானது. இப்படத்தின் மூலம் தான் முதல் முறையாக சூரி கதையின் நாயகனாக அறிமுகமானார். ஹீரோவாக தன் முதல் படத்திலேயே அசாத்தியமான நடிப்பை வெளிப்படுத்தி அசத்தியிருந்தார் சூரி. அதைத்தொடர்ந்து அடுத்தடுத்து ஹீரோவாக பல படங்களில் நடித்து வருகின்றார். முதல் பாகத்தில் சூரி ஹீரோவாக நடிக்க விஜய் சேதுபதி சிறப்பு தோற்றத்தில் நடித்திருந்தார். இதைத்தொடர்ந்து கடந்த வாரம் வெளியான விடுதலை 2 திரைப்படத்தில் விஜய் சேதுபதியே முதன்மை நாயகனாக நடித்திருந்தார். விடுதலை படத்தின் வெற்றிக்கு பிறகு விடுதலை 2 எப்போது வெளியாகும் என்பது தான் ரசிகர்களின் பல நாள் கேள்வியாக இருந்தது.
மிகப்பெரிய எதிர்பார்ப்பிற்கு மத்தியில் வெளியான விடுதலை 2 திரைப்படம் மிகப்பெரிய வெற்றிப்படமாக உருவாகி வருகின்றது. பாசிட்டிவான விமர்சனங்கள் ஒருபக்கம் சிறப்பான வசூல் மறுபக்கம் என விடுதலை 2 திரைப்படம் வெற்றிநடைபோட்டு வருகின்றது. விஜய் சேதுபதி, சூரி உட்பட படத்தில் நடித்த அனைவரது சிறப்பான நடிப்பும், படத்தில் சொல்லும் கருத்தும் இப்படத்தின் வெற்றிக்கு உறுதுணையாக இருந்ததாக படம் பார்த்தவர்கள் கூறி வருகின்றனர்.
இந்நிலையில் மிகப்பெரிய வெற்றியை பெற்றுள்ள இப்படத்திற்கு இசைஞானி இளையராஜா இசையமைத்திருந்தார். அவர் இசையமைத்த பாடல்களும் பின்னணி இசையும் வழக்கம் போல சிறப்பாக அமைந்தது. படத்தின் வெற்றிக்கு அவரின் பங்களிப்பும் மிக முக்கியமான காரணமாக இருந்துள்ளது. எனவே விடுதலை 2 படம் வெற்றிபெற்றுள்ளதால் படக்குழு இளையராஜாவை நேரில் சந்தித்து அவரின் பங்களிப்பிற்கு நன்றியினை தெரிவித்தது. அதுமட்டுமல்லாமல் விடுதலை 2 வெற்றியையும் படக்குழு இளையராஜாவுடன் பகிர்ந்துகொண்டது. விஜய் சேதுபதி, வெற்றிமாறன், தயாரிப்பாளர் எல்ரெட் குமார் ஆகியோர் இளையராஜாவை நேரில் சந்தித்து நன்றியினை தெரிவித்துக்கொண்டனர். அப்போது எடுக்கப்பட்ட புகைப்படம் இணையத்தில் ட்ரெண்டாகி வருகின்றது.
இந்நிலையில் விடுதலை 2 படத்தின் வெற்றியின் மூலம் தமிழ் சினிமாவில் தோல்வியே கண்டிராத இயக்குனர் என்ற பெருமையை வெற்றிமாறன் அடைந்துள்ளார். பொல்லாதவன் படத்தின் மூலம் இயக்குனரான வெற்றிமாறன் இதுவரை ஏழு படங்களை இயக்கியுள்ளார். அவர் இயக்கிய அனைத்து படங்களும் ரசிகர்களின் மிகப்பெரிய வரவேற்பை பெற்று வெற்றியடைந்திருக்கின்றது. எனவே திரையுலகில் தோல்வியே கண்டிராத இயக்குனர் என்ற பெருமையை பெற்றுள்ளார் வெற்றிமாறன் என்பது குறிப்பிடத்தக்கது.