சிவகார்த்திகேயன் நடிப்பில் அடுத்ததாக ரிலீசாகவுள்ள ‘மாவீரன்’ ஆகஸ்ட் 11 ஆம் தேதி வெளியாகும் என அறிவிக்கப்பட்டிருந்த நிலையில், தற்போது திடீரென ரிலீஸ் தேதியை மாற்றியுள்ளனர் படக்குழுவினர்.
டான், பிரின்ஸ் படங்களை தொடர்ந்து சிவகார்த்திகேயன் நடிக்கும் படமாக ‘மாவீரன்’ உருவாகி வருகிறது. இந்தப்படத்தை மடோன் அஸ்வின் இயக்கி வருகிறார். இவர் யோகி பாபு நடிப்பில் ரிலீசாகி விமர்சனம் மற்றும் வசூல்ரீதியாக நல்ல வரவேற்பை குவித்த ‘மண்டேலா’ படத்தை இயக்கியவர். இந்தப்படத்தின் வெற்றியைத் தொடர்ந்து தனது இரண்டாவது படைப்பாக தற்போது ‘மாவீரன்’ படத்தை இயக்கி வருகிறார்.
இதன் படப்பிடிப்பு கடந்த சில மாதங்களாகவே மும்முரமாக நடந்து வந்தது. இதன் படப்பிடிப்பின் போது சிவகார்த்திகேயனுக்கும், அஸ்வினுக்கு கருத்து வேறுபாடு ஏற்பட்டு படப்பிடிப்பு பாதியில் நிறுத்தப்பட்டதாக எல்லாம் தகவல்கள் வெளியானது. ஆனால் இதனை படக்குழுவினர் முழுவதுமாக மறுத்தனர். இதனையடுத்து ‘மாவீரன்’ படப்பிடிப்பு முழு வீச்சில் நடைபெற்றது.
இந்நிலையில் இந்தப்படம் ஏற்கனவே ஆகஸ்ட் 11 ஆம் தேதி வெளியாகும் என அறிவிக்கப்படிருந்த நிலையில் தற்போது ரிலீஸ் தேதியை படக்குழுவினர் மாற்றியுள்ளனர். அதன்படி ஜுலை 14 ஆம் தேதி ‘மாவீரன்’ படம் ரிலீசாகும் என அறிவிக்கப்பட்டுள்ளது. ஆகஸ்ட் 10 ரஜினியின் ‘ஜெயிலர்’ படம் ரிலீசாவதால் அதற்கு முன்பாகவே ‘மாவீரன்’ படம் வெளியாகவுள்ளதாக கூறப்படுகிறது.
ரஜினியின் தீவிர ரசிகரான சிவகார்த்திகேயன் ‘ஜெயிலர்’ பட ரிலீசால் ‘மாவீரன்’ பட வெளியீட்டு தேதியை மாற்றியுள்ளதை ரசிகர்கள் கொண்டாடி வருகின்றனர். இந்தப்படத்தில் அதிதி ஷங்கர் சிவகார்த்திகேயனுக்கு ஜோடியாக நடிக்கிறார். மேலும் பிரபல இயக்குனர் மிஷ்கின், சரிதா, யோகி பாபு உள்ளிட்டோர் முக்கியமான கதாபாத்திரத்தில் நடிப்பது குறிப்பிடத்தக்கது.