அஜர்பைஜான் நாட்டில் நடைபெற்று வந்த ‘விடாமுயற்சி’ படத்தின் படப்பிடிப்பு தற்போது நிறைவடைந்து விட்டதாகவும், அடுத்தகட்ட படப்பிடிப்பு நடக்க உள்ள புதிய பகுதிக்கு படக்குழு விரைவில் செல்ல உள்ளதாகவும் தகவல் வெளியாகியுள்ளது.
‘துணிவு’ படத்துக்குப் பிறகு அஜித் நடித்து வரும் புதிய படத்திற்கு ‘விடாமுயற்சி’ என்று பெயரிடப்பட்டிருக்கிறது. இப்படத்தை மகிழ் திருமேனி இயக்கி வருகிறார். இதில் அஜித்துக்கு ஜோடியாக த்ரிஷா நடிக்கிறார். வில்லனாக சஞ்சய் தத் நடித்து வருகிறார். மேலும், பிரியா பவானி சங்கர், ஆரவ், அர்ஜுன் தாஸ், அருண் விஜய், ரெஜினா என பலர் நடித்து வருகின்றனர். எக்கசக்க எதிர்பார்ப்புகளை ஏற்படுத்தியுள்ள ‘விடா முயற்சி’ ஆக்ஷனும் எமோஷனும் கலந்த கலவையாக இருக்கும் என எதிர்பார்க்கப்படுகிறது.
இப்படத்தின் படப்பிடிப்பு சமீபத்தில் அஜர்பைஜான் நாட்டில் தொடங்கி நடைபெற்று வந்தது. இது தொடர்பான புகைப்படங்கள் அவ்வப்போது சமூக வலைதளங்களில் வெளியாகி வைரலாகி வந்தது. லைக்கா புரொடக்ஷன்ஸ் நிறுவனம் தயாரிக்கும் இந்த படத்துக்கு நிரவ் ஷா ஒளிப்பதிவு செய்கிறார். அனிருத் இசையமைக்கிறார். வேதாளம், விவேகம் படங்களுக்கு பிறகு மூன்றாவது முறையாக, அஜித் படத்துக்கு இசையமைக்கிறார் அனிருத். அத்துடன் முதல் முறையாக மகிழ் திருமேனியுடன் கைகோர்த்துள்ளார்.
இந்த சூழலில், அஜர்பைஜான் நாட்டில் நடைபெற்று வந்த ‘விடாமுயற்சி’ படத்தின் படப்பிடிப்பு தற்போது நிறைவடைந்து விட்டதாகவும், அடுத்தகட்ட படப்பிடிப்பு நடக்க உள்ள புதிய பகுதிக்கு படக்குழு விரைவில் செல்ல உள்ளதாகவும் அஜித்தின் பிஆர்ஓ சுரேஷ் சந்திரா தனது எக்ஸ் சமூக வலைள பக்கத்தில் தெரிவித்துள்ளார். இது தொடர்பாக சில புகைப்படங்களையும் அவர் வெளியிட்டுள்ளாா். ‘விடாமுயற்சி’ படத்தின் அப்டேட்களுக்காக ரசிகர்கள் காத்திருக்கும் நிலையில் இந்த புகைப்படங்கள் அவர்களுக்கு உற்சாகத்தை அளித்து வருகின்றன.