எப்போது இருந்தாலும் திமுகவுக்கு ஆன்மீகம்தான் முதல் எதிரி என்று துக்ளக் ஆசிரியர் குருமூர்த்தி எச்சரித்துள்ளார்.
துக்ளக் பத்திரிகையின் 52 ஆவது ஆண்டு விழா சென்னையில் நேற்று நடைபெற்றது இதில் மத்திய நிதியமைச்சர் நிர்மலா சீதாராமன் சிறப்பு விருந்தினராக பங்கேற்றார். விழாவின் முக்கிய அம்சமாக வாசகர்களின் கேள்வி பதிலுக்கு துக்ளக் ஆசிரியர் குருமூர்த்தி அளித்த பதில்:
கேள்வி: நீட் விலக்கு மசோதா தற்போது ஆளுநரிடமிருந்து மத்திய அரசுக்கு அனுப்பப்பட்டுள்ளதே… இதன் அடுத்த நிலை என்ன?
பதில்: நீட் என்பது நாடு முழுவதுக்கான பொதுவான தேர்வு. இதில் தமிழ்நாட்டுக்கு மட்டும் விலக்கு அளிக்க முடியாது. இதில் தேர்ச்சி பெறாவிட்டால் தமிழ்நாட்டில் இருந்து மருத்துவர்கள் வெளிமாநிலம், வெளிநாடுகளுக்கு எப்படி போக முடியும்? எனவே, இனிமேல் விலக்கு கேட்டு இங்கு வரக்கூடாது என்று, தமிழக அரசுக்கு 2017 இல் உச்ச நீதிமன்றம் அழுத்தம், திருத்தமாக சொல்லிவிட்டது. ஆனால் இன்றும் நீட் விலக்கு கேட்டு வருகிறார்கள். நீட் அரசியல் மூலம் மத்திய அரசு, தமிழக ஆளுநர் மீது களங்கம் கற்பிக்க முயல்கின்றனர். தமிழகத்துக்கு நீட் விலக்கு வேண்டுமென்றால் திமுக அரசு போராட வேண்டியது உச்ச நீதிமன்றத்தில்தானே தவிர மத்திய அரசையோ, ஆளுநரையோ இவர்கள் இனியும் குறை கூறக்கூடாது. நீட் அரசியல் போல ஒரு மோசடி கிடையாது.
கேள்வி: மத்திய அரசை திமுக அரசு ஒன்றிய அரசு என்று ஏதோ உள்நோக்கத்துடன் அழைத்து வருகிறது. தமிழ்நாட்டை தமிழக பிரதேசம் என்றோ, தமிழ் மாநிலம் என்றோ ஏன் பெயர் மாற்றம் செய்யக் கூடாது?
பதில்: 2006 இல் காங்கிரஸ் தலைமையிலான ஐ்க்கிய முற்போக்கு கூட்டணி ஆட்சியில் திமுக அங்கம் வகித்தது. அப்போது நமது அரசியல் சாசனம் தமிழிலும் இருக்க வேண்டும் எனக் கூறி மொழி பெயர்த்தனர். அதில் Union Govt என்றிருந்ததை ‘ஒன்றிய அரசு’ என மொழிப் பெயர்த்தனர். அதனைதான் ஏதோ புதிதாக கண்டுபிடித்தது போல பேசுகிறார்கள். மத்திய அரசை ஒன்றிய அரசு என்று அழைப்பது தேசவிரோதம் என்பது மட்டுமில்லாமல், மத்திய அரசை மட்டம் தட்டுவதை போன்றதாகும். இதனால் மத்திய அரசின் அதிகாரம் எதுவும் குறைய போதில்லை. எவ்வளவு நாளைக்கு பேசுகிறார்கள் என்று பார்ப்போம்.
கேள்வி: அண்ணாமலை, ஆளுநர், ஆன்மிகம்… இந்த மூன்றிலும் திமுக சிக்கித் தவித்து வருகிறது. இதிலிருந்து அவர்கள் விடுபட ஆசிரியர் ஏதாவது ஆலோசனை சொல்வாரா?
பதில்: சட்டம், நீதி, பாங்கு எதுவும் கிடையாத திமுகவினரின் ஆட்சியைப் பற்றி சிந்திக்க வேண்டிய நிலையில் மத்திய அரசுதான் உள்ளது. சட்டப்படி நடந்துவரும் மத்திய அரசு, சட்டத்தை மீறி செயல்பட்டுவரும் மாநில அரசை கையாள்வது பற்றி சிந்திக்க வேண்டி உள்ளது.
1970 களில் நாத்திக பூமியாக இருந்தது. அப்போது இங்கு நாத்திகமும், அரசியலும் பிரிக்க முடியாதவையான இருந்தன. ஆனால் தற்போது இங்கு நிலை மாறிவிட்டது; தமிழகம் தற்போது ஆன்மிக பூமியாக மாறி வருகிறது; மக்கள் மாறி வருகிறார்கள். எனவே திமுகவால் ஆன்மீகத்தை தவிர்க்க இயலவில்லை. அதனால் அதனை தழுவிக்கொள்ள வேண்டும் என்று முயற்சிக்கின்றனர்.
நெற்றியில் குங்குமம் இட்டு வந்த ஒருவரை என்ன ரத்தம் வடிகிறது ஏதாவது காயமா என்று கருணாநிதி கேட்ட காலம்போய், தற்போது திமுக அரசில் அறநிலையத் துறை அமைச்சர் சேகர் பாபு நெற்றி முழுவதும் தீருநீர் இட்டு கொண்டு வருகிறார். இவர்கள் எப்படி மாறினாலும் ஆன்மீகம் தான் திமுகவின் முதல் எதிரி. அடுத்தது பிஜேபி. அதற்கு அடுத்ததுதான் மத்திய அரசு. நாஸ்திகன் ஆஸ்திகனாக வரும்போது நாம் கொஞ்சம் ஜாக்கிரதையாக இருக்க வேண்டும். தமிழக பாஜக தலைவராக உள்ள இளைஞர் அண்ணாமலைக்கு நீண்ட ஆயுளும், மனோதிடமும் கிடைக்கப்பெற்றால், எதிர்காலத்தில் தமிழகத்துக்கு நல்லொரு தலைவர் கிடைப்பார். இவ்வாறு குருமூர்த்தி பதிலளித்தார்.