தமிழக வாழ்வுரிமைக் கட்சித் தலைவர் வேல்முருகனின் மனைவி பாஜகவில் இணைந்துள்ளார்.
மாற்று கட்சியிலிருந்து செல்வாக்கான நபர்களை தங்கள் கட்சிக்கு கொண்டு வரும் வேலையை பாஜகவினர் நாடு முழுவதும் மேற்கொள்கின்றனர். தமிழ்நாட்டிலும் அதே பாணி கையாளப்பட்டு வந்த நிலையில் எல்.முருகன் தலைவராக இருந்த போது அதில் வேகம் காட்டப்பட்டது. திமுகவின் முக்கிய விக்கெட்டுகளையும் வீழ்த்தினார் அவர். அண்ணாமலை தலைவராக பதவியேற்ற பின்னர் பெரிய தலைகள் எதுவும் பாஜக பக்கம் வரவில்லை என்றும் குற்றப் பின்னணி கொண்ட தங்கள் பகுதிகளில் ரவுடிசத்தில் ஈடுபடும் சிலர் தங்களை காப்பாற்றிக் கொள்ள பாஜக பக்கம் வருவதாக விமர்சனங்கள் எழுந்தன. ஆனால் அண்ணாமலையோ தொடர்ந்து திமுக, அதிமுக உள்ளிட்ட முக்கிய கட்சிகளைச் சேர்ந்தோரிடம் பேசி வந்துள்ளார். திரைமறைவில் நடைபெற்ற பேச்சுவார்த்தைகள் சுமுகமாக சென்றதாலே அடுத்தடுத்து பாஜகவை நோக்கி வருபவர்களின் பட்டியல் நீள்கிறது. திமுக எம்.பி திருச்சி சிவாவின் மகன் சூர்யா அண்மையில் பாஜகவில் இணைந்தார், நாகை முன்னாள் எம்.பி முருகையாவின் மகன் எஸ்ஜிஎம்.ரமேஷ் பாஜகவில் இணைந்தார்.
இதன் தொடர்ச்சியாக தற்போது திமுகவின் கூட்டணியில் அங்கம் வகிக்கும் தமிழக வாழ்வுரிமைக் கட்சியின் தலைவர் வேல்முருகன் மனைவி பாஜகவில் இணைந்துள்ளார். வேல்முருகனுக்கும் அவரது மனைவி காயத்ரிக்கும் சில ஆண்டுகளாகவே கருத்து வேறுபாடு நிலவி வந்தது. இதனால் 2018ஆம் ஆண்டே விவாகரத்துக்கான சட்டரீதியான முயற்சிகள் மேற்கொள்ளப்பட்டன. அதிலிருந்து இருவரும் தனித்தனியே வசிக்கின்றனர்.
காயத்ரி காஞ்சிபுரத்தில் வசித்து வருகிறார். இருப்பினும் அவருக்கு தனது கணவரால் அச்சுறுத்தல் ஏற்படுவதாக தனக்கு நெருக்கமானவர்களிடம் கூறியுள்ளார். அந்த சமயத்தில் செங்கல்பட்டு மாவட்ட பாஜக மகளிர் அணி தலைவி மாலா செல்வகுமார் மூலம் பாஜகவில் இணைய முடிவெடுத்து நேற்று அண்ணாமலை முன்னிலையில் கட்சியில் இணைந்தார். அதன் பின்னர் முன்னாள் மத்திய அமைச்சர் பொன்.ராதாகிருஷ்ணனிடம் வாழ்த்து பெற்றார்.
மாற்று கட்சிகளில் அதிருப்தியில் இருக்கும் நபர்கள், அரசியலில் செல்வாக்கான நபர்களின் குடும்பத்தில் அதிருப்தியில் இருக்கும் நபர்கள் என பட்டியல் தயாரிக்கப்பட்டு அவர்களிடம் பாஜகவைச் சேர்ந்த டீம் தொடர்ச்சியாக பேசி கட்சிக்குள் கொண்டு வருகின்றனர். சமீப நாள்களில் வந்தவர்கள் இவர்கள் என்றால், இனி வரும் நாள்களில் பெரிய கூட்டமே வர உள்ளதாக சொல்கிறார்கள் விவரம் அறிந்தவர்கள்.
தமிழக வாழ்வுரிமை கட்சி தலைவர் வேல்முருகனின் முன்னாள் மனைவி காயத்ரி கூறியதாவது:-
தமிழக வாழ்வுரிமை கட்சி தலைவர் வேல்முருகனின் மனைவியாக இருந்தவள் நான். அவரால் எனக்கு, வெளியில் சொல்ல முடியாத துன்பங்கள் ஏற்பட்டன. அவரிடம் இருந்து விடுதலைக்கு வழி தேடிக் கொண்டிருந்தேன். கடந்த 2018ல் விவகாரத்து செய்து கொள்ளலாம் என, வலியுறுத்தினார். விவகாரத்துக்கு சட்டப்படி முயற்சி மேற்கொள்ளப்பட்டு, அவரிடம் இருந்து பிரிந்து வெளியே வந்து விட்டேன். தற்போது காஞ்சிபுரத்தில் வசிக்கிறேன். அவர் என்னை பழிவாங்கும் எண்ணத்தில், தொடர்ந்து கொலை மிரட்டல் விடுத்துக் கொண்டிருந்தார். வேல்முருகன் தி.மு.க., கூட்டணியில் செல்வாக்கோடு, எம்.எல்.ஏ.,வாக இருப்பதால், யாரும் எனக்கு உதவ முன் வரவில்லை. என்னை காப்பாற்றிக் கொள்ள, எனக்கு தெரிந்த பா.ஜ.,வினர் வாயிலாக அண்ணாமலையை சந்தித்து பா.ஜ.,வில் இணைந்து விட்டேன். இனி என்னை அவர்கள் காப்பாற்றுவர். இவ்வாறு அவர் கூறினார்.