இந்துத்துவ அரசியல் தேசத்தை பாழ்படுத்தும்: திருமாவளவன்

இந்துத்துவம் என்ற பெயரில் பார்ப்பானியர்கள் அல்லது அவர்களுக்காக முன்னெடுக்கப்படும் அரசியல் தேசத்தை பாழ்படுத்தும் என்று தொல்.திருமாவளவன் கூறினார்.

முனைவர் கோ.கேசவனின் நூல் தொகுப்புகள் வெளியீட்டு விழா, சென்னை திருவான்மியூரில் உள்ள தனியார் விடுதியில் நடைபெற்றது. தமிழ்ச் சமூக வரலாறு, தலித்தியம், மார்க்சியம் ஆகிய நூல்கள் தொகுப்பாக வெளியிடப்பட்டன. இந்த நிகழ்வில் விசிக தலைவரும், சிதம்பரம் நாடாளுமன்ற உறுப்பினருமான தொல்.திருமாவளவன் சிறப்பு விருந்தினராக கலந்து கொண்டு நூல் தொகுப்பை வெளியிட்டார் அதனை முன்னாள் நீதிபதி சந்துரு பெற்றுக் கொண்டார். விழாவில் திருமாவளவன் பேசியதாவது:-

திராவிடம் என்ற சொல்லாடலை முதன்முதலாக பயன்படுத்தியவர் பண்டிதர் அயோத்திதாசர். தமிழ் தேசியம் என்ற பெயரில் திராவிடத்திற்கு பேசுகிறோம் என்று சிலர் பார்ப்பனியத்திற்கு ஆதரவாக பேசுகிறார்கள். பார்ப்பனியத்தை மூர்க்கமாக எதிர்த்தவர்கள் அம்பேத்கரும் பெரியாரும். பார்ப்பனியர்கள் தங்களை தனிமைப்பட்டுவிடாமல் தற்காத்து கொள்ள கையாளும் யுக்தி தான் இந்துத்துவம்

திராவிடத்தை விமர்சனம் செய்கிறார்கள் என்றால் பெரியாரையும் அம்பேத்கரையும் விமர்சனம் செய்வதாக தான் பொருள். பெரியாரையும் அம்பேத்கரையும் எதிர்த்தால் அவர்கள் தெரிந்தோ தெரியாமலோ பார்ப்பனியத்திற்கு துணை நிற்கிறார்கள். மார்க்சிய, பெரியாரிய, அம்பேத்கரிய சிந்தனையாளர்கள் இன்றைய சூழலில் ஒற்றுமையாக இருக்க வேண்டியது மிக முக்கியம். இந்த தேசத்தை இந்துத்துவம் என்ற பெயரில் சிதைக்க துடிக்கிறார்கள். பார்ப்பனியர் அல்லாத மோடியும் அமித்ஷாவும் அவர்களின் வேலை ஆட்களாக உழைத்து கொண்டு இருக்கிறார்கள். எனவே இந்த ஆட்சிக்கு எதிராக நாம் ஒருங்கிணைய வேண்டும்.

தமிழகத்தில் 20 ஆண்டுகளுக்கு முன்பு இருந்த தலித் ஒற்றுமை இப்பொழுது இல்லை. சாதி தலைவர்களை தனித்தனியே பிரித்துவிட்டார்கள். மதமாகவும் சாதியாகவும் பிரிப்பவர்களுக்கு எதிராக நாம் ஒன்றிணைய வேண்டும். பாஜக, சங்க்பரிவார்களை எதிர்க்க அகில இந்திய பார்வை தேவை. அகில இந்திய அளவில் ஒருங்கிணைவு தேவை. திராவிட எதிர்ப்பு வெறும் திமுக எதிர்ப்பு அல்ல, அது பெரியார் எதிர்ப்பு. எனவே நாம் கவனமாக இருக்க வேண்டும்.

சனாதனத்தை வீழ்த்த ஆரியத்தை எதிர்ப்பதற்கான கருத்தியல் அடையாளம் தான் திராவிடம். பார்ப்பனிய எதிர்ப்பை திமுக பார்த்துக்கொள்ளும்; திராவிடர் கழகம் பார்த்துக் கொள்ளும் என்று நாம் விலகி நிற்க முடியாது, மார்க்சிய பெரியாரிய அம்பேத்கரிய உணர்வாளர்கள் ஒன்றிணைந்து எதிர்க்க வேண்டும் இந்துத்துவம் என்ற பெயரில் அவர்கள் முன்னெடுக்கும் அரசியல் தேசத்தை பாழ்படுத்தும். இப்போது அவர்கள் தமிழகத்தை குறிவைத்து காய்களை நகர்த்துகிறார்கள். இது மிகவும் ஆபத்தானது. எனவே நாம் விழிப்பாக இருக்க வேண்டும்

கோ.கேசவனின் கருத்துக்கள், சிந்தனைகள், அடுத்த தலைமுறைக்கும் போய் சேர வேண்டும். தலித்திய மார்க்சிய சிந்தனைகளை ஆய்வு செய்பவர்களுக்கு இந்த நூல்கள் மிக உதவியாக இருக்கும். இவ்வாறு அவர் பேசினார்.