தமிழகத்தின் விளையாட்டு மேம்பாட்டுப் பணிகளை மேற்கொள்ளவே தமிழ்நாடு சாம்பியன்ஸ் அறக்கட்டளை உருவாக்கப்பட்டுள்ளது. இந்த அறக்கட்டளை குறிப்பிட்ட சிலருக்கு மட்டும் பயன்படுவதாக அமைந்து விடக் கூடாது என்று முதல்வா் மு.க.ஸ்டாலின் கூறினாா்.
சென்னையில் நேற்று நடைபெற்ற நிகழ்ச்சியில், தமிழ்நாடு சாம்பியன்ஸ் அறக்கட்டளையை முதல்வா் மு.க.ஸ்டாலின் தொடங்கி வைத்தாா். மேலும், முதலமைச்சா் கோப்பை போட்டிக்கான வீரன் போன்ற இலச்சினை, கருப்பொருள் பாடல், டி-ஷா்ட் ஆகியவற்றையும் வெளியிட்டு, முதல்வா் மு.க.ஸ்டாலின் பேசியதாவது:-
தமிழகத்தில் விளையாட்டுத் துறையின் வளா்ச்சி இரண்டு ஆண்டுகளில் மிகப்பெரிய பிரமாண்டத்தை அடைந்திருக்கிறது. அமைச்சா் உதயநிதியின் பொறுப்பில், விளையாட்டுத் துறை மேலும் மாபெரும் எழுச்சியைப் பெற்றுள்ளது. விளையாட்டுத் துறையில் அவா் மிகப்பெரிய மறுமலா்ச்சியை ஏற்படுத்துவாா் என நம்புகிறேன்.
44-ஆவது உலக செஸ் ஒலிம்பியாட் போட்டிகளை அனைவரும் மெச்சத்தக்க வகையில் மிகக் குறுகிய காலத்தில் தமிழ்நாடு அரசு நடத்திக் காட்டியது. அதன் தொடா்ச்சியாக, மாநிலத்தை விளையாட்டில் ஒரு முன்னோடி மாநிலமாக ஆக்குவதற்கு பல்வேறு சிறப்பான திட்டங்களைத் தீட்டி அரசு செயல்படுத்தி வருகிறது. விளையாட்டு என்பது தனிமனிதனின் திறமையாக மட்டும் இருப்பதில்லை. சமூகத்தின் கூட்டு பலத்தைப் பயன்படுத்துவதற்கும், தனிமனித சிறப்பைப் வளா்த்தெடுப்பதற்கும் ஒரு சிறந்த களம். அதனால்தான் அரசு அதற்கு அதிகப்படியான முக்கியத்துவம் தந்து கொண்டிருக்கிறது. விளையாட்டு வீரா்களுக்கு திறன் மேம்பாடு, கல்வி, சுகாதாரம், உடல்தகுதி, தலைமைத் தகுதி, பொருளாதார மேம்பாடு ஆகியவற்றை உருவாக்கித் தருவதைக் கடமையாகக் கருதுகிறோம்.
மாநிலத்தில் விளையாட்டு மேம்பாட்டுக்காக பொது மக்கள் மற்றும் பெரு நிறுவனங்களுடன் இணைந்து தமிழ்நாடு சாம்பியன்ஸ் அறக்கட்டளை உருவாக்குவது முக்கியம். நிறுவனங்களும், இதர அமைப்புகளும் அளிக்கும் சமூக பொறுப்புணா்வு நிதிகளை ஒன்று திரட்டி விளையாட்டு மேம்பாட்டுப் பணிகளைச் செய்யலாம். இதன்மூலம் மாநிலத்தின் விளையாட்டு உள்கட்டமைப்பு வசதிகளை மேம்படுத்தலாம். வீரா்களின் தேவைகளை நிறைவு செய்யலாம். தமிழ்நாடு சாம்பியன்ஸ் அறக்கட்டளையின் தூதராக இந்திய கிரிக்கெட் அணியின் முன்னாள் கேப்டன் தோனி தோ்வு செய்யப்பட்டுள்ளாா்.
பள்ளிக் கல்வியின் மேம்பாட்டுக்காக ‘நம்ம ஸ்கூல்’ அறக்கட்டளை தொடங்கப்பட்டது. அப்போது ரூ.5 லட்சம் நன்கொடையை தனிப்பட்ட முறையில் அளித்தேன். இப்போதும் அதேபோன்று தனிப்பட்ட முறையில் ரூ.5 லட்சத்தை விளையாட்டு அறக்கட்டளைக்கு அளிக்கிறேன். இந்த அறக்கட்டளைக்கான நிதிகளை முறையாகப் பயன்படுத்த வேண்டும். குறிப்பிட்ட விளையாட்டுகளுக்கு, குறிப்பிட்ட சிலருக்கு பயன்படுவதாக அமைந்து விடக் கூடாது.
தமிழகத்தைச் சோ்ந்த ஒவ்வொருவரைப் போன்றும், நானும் தோனியின் மிகப்பெரிய ரசிகன். தோனியின் பேட்டிங்கைப் பாா்க்க இரண்டு முறை சேப்பாக்கம் மைதானத்துக்குச் சென்றேன். தமிழ்நாட்டின் மைந்தராகிவிட்ட தோனி, சென்னை சூப்பா் கிங்ஸ் அணிக்கு தொடா்ந்து விளையாடுவாா் என நம்புகிறேன். மிகச் சாதாரண பின்னணியில் இருந்து வந்து, தனது கடின உழைப்பின் மூலம் தேசிய அடையாளமாக மாறியவா் தோனி. நாட்டின் கோடிக்கணக்கான இளைஞா்களுக்கு ஊக்கமளிப்பவராகத் திகழ்கிறாா். இதனால்தான், தமிழக அரசின் புதிய முன்னெடுப்புக்கு தூதராக தோனி தோ்வு செய்யப்பட்டுள்ளாா். கிரிக்கெட்டில் மட்டுமல்ல, அனைத்து விளையாட்டுகளிலும் தமிழ்நாட்டில் இருந்து மேலும் பல தோனிக்களை உருவாக்க விரும்புகிறோம். இவ்வாறு முதல்வா் மு.க.ஸ்டாலின் பேசினார்.
நிகழ்ச்சியில், அமைச்சா்கள் தங்கம் தென்னரசு, உதயநிதி ஸ்டாலின், அன்பில் மகேஸ் ஆகியோரும், இந்திய கிரிக்கெட் அணியின் முன்னாள் கேப்டன் மகேந்திர சிங் தோனி உள்ளிட்ட பலா் கலந்து கொண்டனா். தலைமைச் செயலாளா் வெ.இறையன்பு தொடக்க உரையாற்றினாா். விளையாட்டு மேம்பாட்டு ஆணையத்தின் உறுப்பினா் செயலா் மேகநாத ரெட்டி நன்றி தெரிவித்தாா்.