காலை உணவுத் திட்டத்தை செயல்படுத்தும் பணியை தனியாரிடம் ஒப்படைக்க கூடாது என்று டிடிவி தினகரன் கூறியுள்ளார்
அரசுப் பள்ளிகளில் 1 முதல் 5ஆம் வகுப்பு வரை பயிலும் மாணவர்களுக்கு காலை உணவு வழங்கும் திட்டம் செயல்படுத்தப்படுகிறது. முதலமைச்சரின் கனவுத் திட்டமாக குறிப்பிடப்படும் இந்த திட்டத்தை செயல்படுத்தும் பொறுப்பை சென்னை மாநகராட்சி தனியார் வசம் கொடுப்பது தொடர்பாக நேற்று தீர்மானம் நிறைவேற்றப்பட்டது. சென்னை மாநகராட்சியின் இந்த தீர்மானத்துக்கு பல்வேறு அரசியல் கட்சிகளும் எதிர்ப்பு தெரிவிக்கின்றன. சென்னை மாநகராட்சியை பின் தொடர்ந்து பிற இடங்களிலும் காலை உணவுத் திட்டத்தை செயல்படுத்தும் பணி தனியார் வசம் செல்ல வாய்ப்புள்ளதாக கூறப்படுகிறது.
இதற்கு எதிராக அமமுக பொதுச் செயலாளர் டிடிவி தினகரன் வெளியிட்ட அறிவிப்பில், காலை உணவை தயார் செய்யும் பணியினை அம்மா உணவகங்களுக்கு வழங்கலாம் என்று யோசனை தெரிவித்துள்ளார். ஒருவேளை அவ்வாறு செயல்படுத்தப்பட்டால் அம்மா உணவகங்களையும் திறம்பட நடத்திட வாய்ப்புள்ளது.
சென்னை மாநகராட்சி எல்லைக்குட்பட்ட சுமார் 350 பள்ளிகளில் நாள்தோறும் 65ஆயிரம் மாணவ, மாணவியர்களுக்காக செயல்படுத்தப்பட்டு வந்த காலை உணவுத்திட்டத்தை தனியாருக்கு தாரைவார்க்கும் தீர்மானம் சென்னை மாநகராட்சி மாமன்ற கூட்டத்தில் நிறைவேற்றப்பட்டுள்ளது. இத்தீர்மானம் தமிழக முதலமைச்சரின் ஒப்புதலோடு தான் நிறைவேற்றப்பட்டதா?
ஒருவேளை முதலமைச்சரும் இத்தீர்மானத்திற்கு அனுமதி அளித்திருந்தால், திமுக ஆட்சிக்கு வந்த பின்னர் போக்குவரத்து துறை தொடங்கி அனைத்து துறைகளையும் தனியாருக்கு தாரை வார்ப்பதாக பொதுமக்கள் முன்வைக்கும் குற்றச்சாட்டுக்கள் உண்மை தானோ? என்று எண்ணத் தோன்றுகிறது.
எனவே, காலை உணவுத்திட்டத்தை தனியாருக்கு தாரைவார்க்கும் தீர்மானத்தை திரும்ப பெறுவதோடு, ஏழை, எளிய மக்களின் பசியைப் போக்கிய அட்சயப்பாத்திரமான அம்மா உணவகங்களை மேம்படுத்தி அதன் மூலம் பள்ளிக் குழந்தைகளுக்கு தரமான உணவு தயார் செய்து வழங்குவதற்கான நடவடிக்கைகளை மேற்கொள்ளுமாறு சென்னை மாநகராட்சியையும், தமிழக அரசையும் வலியுறுத்திக் கேட்டுக் கொள்கிறேன்” எனக் குறிப்பிட்டுள்ளார்.