தவறான விமர்சனங்கள் தமிழக வானியல் புண்படுத்துவதாகவும் இந்திய தொழில்நுட்பத்தை இழிவுப்படுத்துவதாகவும் இதனை தவிர்க்குமாறும் உள்ளது சென்னை வானிலை ஆய்வு மையம் உருக்கமாக வேண்டுகோள் விடுத்துள்ளது.
தென் மாவட்டங்களில் கடந் 17, 18 மற்றும் 19 ஆகிய தேதிகளில் கனமழை கொட்டித் தீர்த்தது. தூத்துக்குடி மாவட்டம் காயபட்டினத்தில் வரலாறு காணாத அளவுக்கு ஒரே நாளில் 96 சென்டி மீட்டர் மழை கொட்டி தீர்த்தது. இதனால் பெரும் வெள்ளப்பெருக்கு ஏற்பட்டது. உயிர்ச்சேதமும் பொருட் சேதமும் பெருமளவில் ஏற்பட்டுள்ளது. அந்த பகுதிகளில் இன்னமும் இயல்பு நிலை திரும்பவில்லை. வானிலை ஆய்வு மையம் மழை குறித்து துல்லியமாக முன்னெச்சரிக்கை விடுக்கவில்லை என தமிழக அரசு குற்றம்சாட்டியது. பாமக அன்புமணி ராமதாஸும் சென்னை வானிலை மையத்தை இழுத்து மூடிவிடலாம் என கடுமையாக விமர்சித்தார்.
இந்நிலையில விமர்சனங்கள் குறித்து சென்னை வானிலை ஆய்வு மையம் உருக்கமாக வேண்டுகோள் விடுத்துள்ளது. அதில் “சமீபமாக சென்னை வானிலை மையம் நவீனமாக இல்லாமல் இருப்பதாக தவறான விமர்சனங்கள் ஊடகங்களில் வெளியாகி வருவதாகவும், இந்திய வானிலை துறையில் பயன்பாட்டில் இருக்கும் அதிவேக கணினிகள், இஸ்ரோவின் செயற்கைகோள் வசதிகள், ரேடார்கள் மற்றும் தானியங்கி வானிலை சேகரிப்பன்கள் உலகத்தரத்திற்கு ஒப்பானவை என்றும் சென்னை மண்டல வானிலை மையத்திலும் இத்தகைய கருவிகளே பயன்பாட்டில் உள்ளன என்றும் குறிப்பிட்டுள்ளது.
குறிப்பாக, சென்னை வானிலையை கண்காணிக்க இரண்டு டாப்ளர் ரேடார்களும், தென் தமிழகத்தை கண்காணிக்க மூன்று டாப்ளர் ரேடார்களும் பயன்பாட்டில் உள்ளன என்று குறிப்பிட்டுள்ள சென்னை வானிலை மையம், இதில் X band வகை ரேடார் இஸ்ரோ தொழில் நுட்பத்துடன் தயாரிக்கப்பட்டு நிறுவப்பட்டது என்றும் இந்தியாவில் சிறந்த ரேடார் தொழில்நுட்ப வல்லுநர்கள் சென்னை வானிலை மையத்தில் பணியாற்றுகிறார்கள் என்றும் குறிப்பிட்டுள்ளது.
உலக வானிலை அமைப்பு இந்திய வானிலை ஆய்வு துறையின் கட்டமைப்பு மற்றும் முன்னெச்செரிக்கைகளை உலக தரம் வாய்ந்தது என்று பாராட்டியுள்ளது என்றும், வர்தா, கஜா, நிவர், மாண்டோஸ் மற்றும் மிக்ஜாம் புயல்கள் குறித்து வானிலை மையத்தின் எச்சரிக்கைகள் காரணமாக பெருமளவு உயிர் சேதம் தவிர்க்கப்பட்டது என்றும் தெரிவித்துள்ளது.
இந்நிலையில், ஆக்கப்பூர்வமான விமர்சனங்களுக்கு பதிலாக, சென்னை வானிலை மையத்தை இலக்காக வைத்து செய்யப்படும் விமர்சனங்கள், அர்ப்பணிப்புடன் இயங்கும் தமிழக வானிலை மைய பணியாளர்களை புண்படுத்தும் விதத்தில் உள்ளது என்றும், நமது இந்திய தொழில்நுட்பத்தை இழிவுபடுத்தும் விதமாகவும் உள்ளது என்றும் தெரிவித்துள்ளது. அத்தகைய தவறான விமர்சனங்களை தவிர்க்குமாறு அன்புடன் கேட்டுக் கொள்ளப்படுகிறது என்றும் சென்னை வானிலை மையம் வேண்டுகோள் விடுத்துள்ளது.