நாட்டில் எது எதற்கோ பஞ்சம் இருப்பதாக சொல்கிறார்கள். எனது பட்டறிவுக்கு எட்டியவரை நான் கூறுகிறேன். நாட்டில் தலைமைக்கும், நல்ல தலைவர்களுக்கும் தான் பஞ்சம் ஏற்பட்டுள்ளது என்று திருமாவளவன் கூறினார்.
சமீபகாலமாக திருமாவளவன் பாஜகவையும், பிரதமர் நரேந்திர மோடியையும் கடுமையாக விமர்சித்து வருகிறார். மத்தியில் மீண்டும் பாஜக ஆட்சி வந்துவிடவே கூடாது என்பதை தனது ஒவ்வொரு உரையிலும் வலியுறுத்தி வருகிறார் திருமாவளவன். நேற்று கூட, திருச்சியில் நடைபெற்ற கூட்டத்தில் பேசிய அவர், மீண்டும் மத்தியில் பாஜகவும், பிரதமராக நரேந்திர மோடியும் வந்தால் நம்மையும், நம் மண்ணையும் யாராலும் காப்பாற்ற முடியாது எனத் தெரிவித்தார். மேலும், மோடி மறுபடியும் பிரதமரானால், நமது கருத்தியலை பேச முடியாது என்றும், மிகப்பெரிய நெருக்கடிக்கு நாம் உள்ளோவோம் எனவும் அவர் கூறினார்.
இந்நிலையில், கவிஞர் அப்துல் காதர் எழுதிய கவிதை நூலினை, நேற்று திருப்பத்தூரில் நடைபெற்ற நிகழ்ச்சியில் திருமாவளவன் வெளியிட்டார். இந்த நிகழ்ச்சியில் அவர் பேசியதாவது:-
ஒருகாலத்தில் திருடனை திருடன் என்று இந்த சமூகம் சொல்லும். சாராயம் காய்ச்சுபவனை சாராய வியாபாரி என்று சொல்வார்கள். குடிக்கிறவனை சமுதாயம் குடிகாரன் என்கிறது. ஆனால் இந்த மூன்றையும் செய்பவனை இன்று ஒரு கூட்டம் தலைவன் என்றும், தலைவா என்றும் அழைக்கிறது. அதேபோல, இன்றைக்கு அரசியலில் யார் யாரோ தங்களை தலைவன் என்று கூறிக்கொள்கிறார்கள். அப்படிப்பட்ட தலைவர்களுக்கு பின்னால் எப்படிப்பட்டவர்கள் இருப்பார்கள்.. அப்படிப்பட்ட தலைவர்களை கொண்டாடுபவர்களால் எத்தகைய சமுதாயத்தை உருவாக்க முடியும் என்பதுதான் வேதனையிலும் வேதனையான விஷயம். இன்று நாட்டில் எது எதற்கோ பஞ்சம் இருக்கிறது என சொல்கிறார்கள். ஆனால், உண்மையில் நாட்டில் தலைமைக்கும், நல்ல தலைவர்களுக்கும் தான் பஞ்சம் இருக்கிறது. இவ்வாறு திருமாவளவன் கூறினார்.