மழையால் சேதமடைந்த செங்கல்பட்டு – திண்டிவனம் தேசிய நெடுஞ்சாலையை சீரமைக்க வேண்டும் என்று பாமக நிறுவனர் ராமதாஸ் கோரிக்கை விடுத்துள்ளார்.
தமிழகத்தில் கடந்த நவம்பர், டிசம்பர் மாதங்களில் வடகிழக்கு பருவமழை தீவிரமாக பெய்தது. இதனால் சென்னை, திருவள்ளூர், காஞ்சிபுரம், செங்கல்பட்டு மற்றும் தென் மாவட்டங்கள் கடுமையாக பாதிக்கப்பட்டன. அத்துடன் வெள்ளம் காரணமாக சாலைகள், பாலங்கள் கடுமையாக சேதமடைந்துள்ளன.
இந்த நிலையில் பாமக நிறுவனர் ராமதாஸ் தனது எக்ஸ் பக்கத்தில், சென்னை – திருச்சி தேசிய நெடுஞ்சாலையில் செங்கல்பட்டு – திண்டிவனம் இடையிலான பகுதி அண்மையில் பெய்த மழையில் கடுமையாக சேதமடைந்துவிட்டதாகவும், சாலையின் மேற்பரப்பு முற்றிலுமாக சேதமடைந்து விட்ட நிலையில் பல இடங்களில் ஓர் அடி ஆழத்திற்கு பள்ளங்கள் ஏற்பட்டுள்ளது என்றும் சுட்டிக்காட்டினார்.
சாலையில் செல்லும் இரு சக்கர ஊர்திகள் பள்ளத்தில் சிக்கி விபத்துக்கு உள்ளாவது அன்றாட நிகழ்வுகளாகி விட்டன என்றும், ஆனாலும் சாலையை முழுமையாக சீரமைக்க எந்த நடவடிக்கையும் மேற்கொள்ளப்படவில்லை என்றும் குற்றம்சாட்டினார்.
செங்கல்பட்டு – திண்டிவனம் இடையிலான சாலையில் ஏற்பட்ட சேதத்தால் ஏற்பட்ட விபத்துகளில் கடந்த சில நாட்களில் மட்டும் 7 பேர் உயிரிழந்துள்ளதாக கூறப்படுகிறது என்று விவரித்த ராமதாஸ், “இவை தவிர சிறிய அளவிலான விபத்துகளில் ஏராளமானோர் காயமடைந்துள்ளனர். சாலையில் ஏற்பட்டுள்ள பள்ளங்களால் ஊர்திகளின் சராசரி வேகம் குறைந்துள்ளது. கடுமையான போக்குவரத்து நெரிசலும் அடிக்கடி ஏற்படுகிறது. இவை அனைத்துக்கும் காரணம் சேதமடைந்த சாலை தான்” என்று கூறியுள்ளார்.
நெடுஞ்சாலையை முழுமையாக சீரமைக்காமல் தடையற்ற போக்குவரத்தை உறுதி செய்ய முடியாது என்றும் எனவே, போர்க்கால அடிப்படையில் செங்கல்பட்டு – திண்டிவனம் இடையிலான சாலையை முழுமையாக சீரமைக்க வேண்டும் எனவும் கோரிக்கை விடுத்தார்.
மேலும், “சென்னை முதல் பெங்களூரு தேசிய நெடுஞ்சாலையில் மதுரவாயல் – வாலாஜா இடையிலான பகுதி கடுமையாக சேதமடைந்துள்ளது. அது முழுமையாக சரி செய்யப்படும் வரை அந்தப் பகுதியில் முழு சுங்கக் கட்டணம் வசூலிக்கக் கூடாது. அரை சுங்கக் கட்டணம் தான் வசூலிக்க வேண்டும் என்று சென்னை உயர் நீதிமன்றம் உத்தரவிட்டுள்ளது. அந்த சாலையை விட செங்கல்பட்டு – திண்டிவனம் நெடுஞ்சாலை மிக மோசமாக சேதமடைந்திருப்பதால், அது சரி செய்யப்படும் வரை, அந்தப் பகுதியில் சுங்கக் கட்டணத்தை முழுமையாகவே ரத்து செய்ய வேண்டும்” என்று வலியுறுத்தியுள்ளார்.