கோயம்பேடு பேருந்து நிலையம் இன்னும் ஓராண்டு மட்டுமே பயன்பாட்டில் இருக்கும் என அமைச்சர் சேகர்பாபு கூறிய நிலையில், இதுதொடர்பாக பாமக தலைவர் அன்புமணி ராமதாஸ் காட்டமாக பதிலடி கொடுத்துள்ளார். மேலும், கோயம்பேடு பேருந்து நிலையத்தில் வணிக வளாகத்தை கட்ட நினைத்தால் தாங்கள் வேடிக்கை பார்க்க மாட்டோம் எனவும் அவர் கூறியுள்ளார்.
சென்னையில் இருந்து மற்ற அனைத்து மாவட்டங்களுக்கும், பெங்களூர், ஹைதரபாத் போன்ற வெளிமாநில நகரங்களுக்கும் செல்லககூடிய பேருந்து நிலையமாக கோயம்பேடு பேருந்து நிலையம் இயங்கி வந்தது. ஆனால், பெருகி வரும் மக்கள்தொகைக்கு ஏற்ப கோயம்பேடு பேருந்து நிலையம் எனக் கூறி, ஊரப்பாக்கத்தை அடுத்த கிளாம்பாக்கத்தில் புதிய பேருந்து நிலையத்தை தமிழக அரசு கட்டியுள்ளது. இந்த பேருந்து நிலையம் மக்கள் பயன்பாட்டுக்கும் கொண்டு வரப்பட்டுள்ளது. தென் மாவட்டங்களுக்கு செல்லும் பேருந்துகள் இங்கிருந்து தான் புறப்படுகின்றன.
இது ஒருபுறம் இருக்க, கோயம்பேடு பேருந்து நிலையம் இன்னும் ஓராண்டு தான் பயன்பாட்டில் இருக்கும் என்றும், அங்கு ஒரு பெரிய திட்டம் வரவுள்ளதாகவும் அமைச்சர் சேகர்பாபு நேற்று கூறினார். இந்நிலையில், இதுகுறித்து செய்தியாளர்கள் கேட்டதற்கு பதிலளித்து அன்புமணி கூறியதாவது:-
ஆசியாவிலேயே மிகப்பெரிய வணிக வளாகமாக கோயம்பேடு வணிக வளாகம் விளங்குகிறது. இருந்தபோதிலும், சுத்தமாக இங்கு அடிப்படை வசதிகளே கிடையாது. அண்மையில் கோயம்பேடு பேருந்து நிலையத்தை கிளாம்பாக்கத்துக்கு அரசு மாற்றியுள்ளது. வெறும் மாநகர பேருந்துகள் மட்டும் தான் கோயம்பேட்டில் இருந்து இயங்குகிறது. இந்த சூழலில், இன்னும் ஓராண்டு தான் இந்த பேருந்து நிலையம் செயல்படும் என அமைச்சர் சேகர்பாபு தெரிவித்துள்ளார்.
அவருக்கு நான் ஒன்றை கூறிக் கொள்கிறேன். கோயம்பேடு பஸ் நிலையத்தில் வணிக வளாகமோ, அடுக்குமாடி குடியிருப்புகளோ வர வேண்டும் என்ற எண்ணம் அவருக்கு இருந்தால் அதை இப்போதே அவர் மாற்றிக்கொள்ள வேண்டும். இந்த இடத்தில் பொது பசுமை பூங்காவை தான் அமைக்க வேண்டும். இன்றைய காலத்தில் சென்னையில் நீரிழிவு, ரத்த அழுத்தம், மன அழுத்தம் கொண்டவர்கள் அதிகம் இருக்கிறார்கள். எனவே அவர்களுக்கு உடற்பயிற்சி செய்ய ஒரு பூங்கா அவசியம். அவ்வாறு பசுமை பூங்கா இல்லாமல் வேறு ஏதேனும் திட்டத்தை வைத்திருந்தால் அதை தடுக்கும் வகையில் நாங்கள் மிகப்பெரிய போராட்டத்தை நடத்துவோம். இவ்வாறு அன்புமணி ராமதாஸ் கூறினார்.