பிரதமரை கேள்வி கேட்கும் உரிமை முதல்வர் மு.க.ஸ்டாலினுக்கு இல்லை என தமிழிசை சவுந்தரராஜன் கூறியுள்ளார்.
மக்களவைத் தேர்தல் வரும் 19ஆம் தேதி நடைபெறவுள்ளது. வாக்குப் பதிவுக்கு இன்னும் 8 நாட்களே உள்ளதால் தமிழ்நாடு முழுவதும் அரசியல் கட்சிகள் கொதிக்கும் வெயிலில் சூறாவாளி பரப்புரையை மேற்கொண்டு வருகிறார்கள். தமிழ்நாட்டைப் பொறுத்தவரை திமுக, அதிமுக, பாஜக என மூன்று அணிகள் இடையே கடும் போட்டி நிலவி வருகிறது. இதுதவிர நாம் தமிழர் கட்சியும் 40 தொகுதிகளிலும் தனித்து வேட்பாளர்களை களமிறக்கியுள்ளது.
தெலங்கானா ஆளுநராகவும், புதுச்சேரி துணை நிலை ஆளுநராகவும் பணியாற்றிய தமிழிசை சவுந்தரராஜன், பதவியை ராஜினாமா செய்துவிட்டு மீண்டும் பாஜகவில் இணைந்தார். தற்போது தென்சென்னை பாஜக வேட்பாளராக போட்டியிடும் தமிழிசை, தீவிர வாக்கு சேகரிப்பில் ஈடுபட்டு வருகிறார்.
இந்த நிலையில் செய்தியாளர்களை சந்தித்த தமிழிசை, “முதல்வர் மு.க.ஸ்டாலின் பிரதமர் மோடியிடம் 23 கேள்விகளை கேட்கிறார். அவரிடம் நாங்கள் ஒரே ஒரு கேள்விதான் கேட்கிறோம். வி.பி.சிங் ஆரம்பித்து மன்மோகன் சிங் வரை பிரதமராக இருந்தபோது திமுக கூட்டணியில் இருந்ததே. அப்போது வழக்காடு மொழியாக தமிழ் இருந்ததா? கல்வி மாநிலப் பட்டியலில் இருந்ததா? ஜல்லிக்கட்டுக்கு எதிர்ப்பு தெரிவித்தது யார்? நீட்டை கொண்டு வந்தது யார்..? அப்படிப்பட்ட காங்கிரஸுடன் தான் திமுக கூட்டணி சேர்ந்துள்ளது” என்று குற்றம்சாட்டினார்.
மழைக்கு வராத பிரதமர் தேர்தலில் ஓட்டு கேட்டு மட்டும் வந்துள்ளாரே என்ற குற்றச்சாட்டு குறித்த கேள்விக்கு, “மழை வெள்ளத்தின் போது வராத தென் சென்னை தொகுதி எம்.பி பரப்புரைக்கு வருகிறார்கள் அல்லவா? வெள்ள சேதத்தை பார்வையிட ராஜ்நாத் சிங், நிர்மலா சீதாராமன் ஆகியோரை பிரதமர் அனுப்பி வைத்தார்.. நிர்வாகப் பொறுப்பில் இருந்ததால் வெள்ளத்தை எப்படி நிர்வகிக்க வேண்டும் என்பது எனக்கு தெரியும். வெள்ளம் வரும் அளவுக்கு மோசமாக சென்னையை மாற்றிவிட்டு, வெள்ளம் வந்த பிறகு பிரதமர் வரவில்லை வரவில்லை என்பது என்ன நியாயம்?..
வெள்ளத்தை ஏன் வரவைத்தீர்கள்? வடிகால் வசதி எங்கே இருக்கிறது? கால்வாய்களில் குப்பை அடைத்துக் கொண்டுள்ளது. டிசம்பர் வந்தாலே மக்களுக்கு திக் திக் என்று இருக்கிறது. இப்படித்தான் ஆட்சியை நடத்துவதா? நான் வெற்றி பெற்றால் விஞ்ஞான முறையில் வெள்ளத்தை தடுப்பேன். முதலில் என்ன அழகில் ஆட்சி நடத்துகிறீர்கள் என முதல்வர் மு.க.ஸ்டாலினை மக்கள் கேள்வி கேட்க வேண்டும். அவருக்கு பிரதமரை கேள்வி கேட்க எந்த உரிமையும் இல்லை” என்று காட்டமாக குற்றம்சாட்டினார்.
தேர்தலுக்குப் பிறகு அதிமுக காணாமல் போய்விடும் என அண்ணாமலை கூறியது குறித்து கேள்வி எழுப்ப, அதற்கு பதில் சொல்லாமல் அங்கிருந்து நழுவிச் சென்றார் தமிழிசை சவுந்தரராஜன்.