வாக்காளர்களின் பெயர்கள் நீக்கம் தொடர்பான பாஜகவின் குற்றச்சாட்டு குறித்து சிபிஎம் மாநிலச் செயலாளர் கே.பாலகிருஷ்ணன் விமர்சனம் செய்துள்ளார்.
மக்களவைத் தேர்தலின் முதற்கட்ட வாக்குப் பதிவு நேற்று முன் தினம் 21 மாநிலங்களில் உள்ள 102 தொகுதிகளுக்கு நடைபெற்று முடிந்தது. அந்த வகையில் தமிழ்நாடு மற்றும் புதுச்சேரியில் மொத்தம் உள்ள 40 தொகுதிகளுக்கும் தேர்தல் முடிந்துவிட்டது. மற்ற மாநிலங்களில் வரும் ஜூன் 1ஆம் தேதி வரை மக்களவைத் தேர்தல் நடைபெற உள்ள நிலையில், ஜூன் 4ஆம் தேதி வாக்கு எண்ணிக்கை நடைபெறும்.
தமிழ்நாட்டில் வாக்குப் பதிவு நடைபெற்ற சமயத்தில் வாக்காளர்கள் பட்டியல் தொடர்பாக குற்றச்சாட்டுகள் எழுந்தன. கோவை தொகுதியில் ஒரு லட்சம் வாக்காளர்களின் பெயர்கள் நீக்கப்பட்டுவிட்டதாக அண்ணாமலை குற்றம்சாட்டினார். மத்திய சென்னை தொகுதியில் ஒரு லட்சம் வாக்குகள் வரை திமுக திட்டமிட்டு நீக்கிவிட்டதாக பாஜக வேட்பாளர் வினோஜ் பி செல்வம் விமர்சித்தார். தமிழிசை சவுந்தரராஜனும் பாஜகவுக்கு ஆதரவான வாக்காளர்கள் பெயர் பட்டியலில் இருந்து நீக்கப்பட்டுள்ளதாக குற்றம்சாட்டினார்.
ஆனால் வாக்குச் சாவடி அலுவலகர்கள் மட்டுமின்றி அரசியல் கட்சிகளின் முகவர்களையும் பணிகளில் ஈடுபடுத்தியே வாக்காளர் பட்டியல் வெளியிடப்படுவதாகவும், அதனால் முறைகேடு நடக்க வாய்ப்பில்லை என்றும் தேர்தல் ஆணையம் தரப்பில் தெரிவிக்கப்பட்டுள்ளது.
இந்த நிலையில் சென்னையில் செய்தியாளர்களை சந்தித்த மார்க்சிஸ்ட் மாநிலச் செயலாளர் கே.பாலகிருஷ்ணன் கூறியதாவது:-
நடந்து முடிந்த மக்களவைத் தேர்தலில் திமுக கூட்டணி மகத்தான வெற்றிபெறும் நிலை ஏற்பட்டுள்ளது. பதிவாகியுள்ள வாக்குகளில் 50 சதவிகிதத்திற்கு மேல் இந்தியா கூட்டணிக்கு வந்திருக்கும் என்ற நம்பிக்கை ஏற்பட்டுள்ளது. கூட்டணி கட்சிகளை ஒருங்கிணைத்தது, பாஜக மற்றும் அதிமுகவுக்கு எதிராக வலுவான பரப்புரை மேற்கொண்டது என ஒருநாள் கூட ஓய்வில்லாமல் முதல்வர் மு.க.ஸ்டாலின் பணியாற்றியுள்ளார். இந்தியா கூட்டணி ஒரு வலிமைமிக்க தேர்தல் போராட்டத்தை தமிழ்நாட்டில் நடத்தியுள்ளது” என்று தெரிவித்தார்.
கோவையில் ஒரு லட்சம் பாஜக ஆதரவாளர்கள் ஓட்டுகளை காணவில்லை என்றும், அதற்கு திமுகதான் காரணம் என்று குற்றச்சாட்டுகிறார்களே என்ற கேள்விக்கு, “வாக்குப் பதிவு முடியும் வரை பாஜகவினர் இதுதொடர்பாக எந்த குற்றச்சாட்டையும் முன்வைக்கவில்லை. ஏற்கனவே தேர்தல் ஆணையம் வாக்காளர் பெயர் பட்டியல் சரிபார்ப்பு உள்ளிட்ட பணிகளை மேற்கொண்டது. அப்போது கவனத்தில் எடுத்து சுட்டிக்காட்டி இருந்தால் கூட தேர்தல் ஆணையம் சரி செய்திருக்கும். இப்போது தேர்தல் முடிந்த பிறகு ஒரு லட்சம் வாக்காளர்கள் பெயர் இல்லை என்பதும், குறிப்பாக பாஜக ஆதரவு வாக்காளர்களாக பார்த்து பட்டியலில் இருந்து நீக்கியுள்ளார்கள் என்று சொல்வதும் வரக்கூடிய தோல்விக்கு இப்போது இருந்தே ஏதாவது காரணம் சொல்ல வேண்டும் என்பதற்காக சொல்லப்படுகிறது. இதுதவிர அந்த குற்றச்சாட்டு உண்மையானதாக தெரியவில்லை. தேர்தல் அதிகாரிகள் அதற்கான உரிய விளக்கத்தை கொடுத்திருக்கிறார்கள். வாக்காளர் பட்டியல் தயாரிப்பு உள்ளிட்ட அனைத்து பணிகளையும் தேர்தல் ஆணையம்தான் மேற்கொண்டது. ஒன்றுக்கு பலமுறை அது அனைத்து கட்சி கூட்டங்களையும் நடத்தியுள்ளது. அப்போது எல்லாம் இவர்களுக்கு இந்த விஷயம் கண்ணுக்கு படவில்லை என்று தெரியவில்லை” என்றும் கே.பாலகிருஷ்ணன் பதிலளித்தார்.