வயநாட்டிற்கு ராகுல் காந்தி சென்றதை சீமான் விமர்சிப்பது ஏற்புடையது அல்ல என கார்த்தி சிதம்பரம் தெரிவித்துள்ளார்.
கேரள மாநிலம் வயநாடு பகுதியில் சூரல்மலை, முண்டக்கை உள்ளிட்ட பகுதிகளில் அண்மையில் ஏற்பட்ட நிலச்சரிவின் காரணமாக ஒரே ஊரே அழித்து போயுள்ளது. கிட்டத்தட்ட 300க்கும் அதிகமான மக்களின் உயிர் நொடிப்பொழுதில் பறிபோனது. இன்னும் மீட்புப் பணிகளை ராணுவம் மேற்கொண்டு வருகிறது. நிலச்சரிவு தகவலறிந்த ராகுல் காந்தி மற்றும் பிரியங்கா காந்தி ஆகியோர் வயநாட்டிற்குச் சென்று பாதிக்கப்பட்ட மக்களுக்கு ஆறுதல் தெரிவித்தனர். அத்துடன், மீட்புப் பணிகளையும் பார்வையிட்டனர்.
இந்த சூழலில் நேற்று நாம் தமிழர் கட்சி தலைமை ஒருங்கிணைப்பாளர் சீமான், “எதிர்க்கட்சித் தலைவர் ராகுல் காந்தியும், பிரியங்கா காந்தியும் வயநாடு நிலச்சரிவு பாதிப்புகளை ஓடோடிச் சென்று பார்த்து ஆறுதல் சொல்வது மகிழ்ச்சியாக உள்ளது. ஆனால், தூத்துக்குடி மற்றும் திருநெல்வேலி பெரு வெள்ளத்தில் தத்தளிக்கும் போது ஒன்றுமே செய்யவில்லையே?” என்று குற்றம்சாட்டி இருந்தார்.
இதுதொடர்பாக புதுக்கோட்டையில் பதிலளித்த சிவகங்கை காங்கிரஸ் எம்.பி கார்த்தி சிதம்பரம், “தமிழக காங்கிரஸ் சார்பில் தூத்துக்குடி வெள்ள பாதிப்புகளை பார்வையிட்டு மக்களுக்கு ஆறுதல் கூறியுள்ளோம். நிவாரணப் பணிகளையும் மேற்கொண்டுள்ளோம். வயநாடு தொகுதி எம்.பியாக இருந்ததால் ராகுல் காந்தி உடனடியாக அங்கு சென்றார். நியாயமாக பிரதமர் மோடியைப் பார்த்து இந்த கேள்வியை சீமான் கேட்க வேண்டும். அதிகாரத்தில் இருப்பவர்கள்தான் உடனடியாக பாதிக்கப்பட்ட பகுதிகளுக்குச் செல்ல வேண்டும். மனித நேயத்துடன் ராகுல் காந்தி வயநாட்டுக்கு சென்றுள்ளார். அதனை விமர்சனம் செய்வது என்னைப் பொறுத்த வரை நியாயமானதாக இல்லை” என்று குற்றம் சாட்டினார்.
தொடர்ந்து காவிரி விவகாரம் பற்றியும் பேசினார். “இந்த ஆண்டு சிறப்பாக மழை பெய்துள்ளது. கர்நாடகம், தமிழ்நாடு என இரண்டு மாநிலங்களுக்கு தேவையான தண்ணீரும் கண்டிப்பாக கிடைக்கும். வரும் ஆண்டுகளில் இரு மாநிலங்களுக்கும் பிரச்னை நீடித்தால், அதனை காவிரி மேலாண்மை ஆணையம் மூலமாக தீர்த்துக் கொள்ளலாம். ஆணையத்தின் உத்தரவில் திருப்தி இல்லையென்றால் உச்ச நீதிமன்றத்தை நாடலாம். இதற்கென உள்ள வழிமுறைகள் மூலமாக இரு மாநில அரசுகளும் ராஜாங்க ரீதியிலாக இந்த பிரச்னையை தீர்த்துக்கொள்வார்கள்” என்றும் கார்த்தி சிதம்பரம் விளக்கம் அளித்தார்.