தமிழக வெற்றிக் கழகம் கட்சியின் ஆலோசனை கூட்டம் இன்று நடைபெற உள்ள நிலையில் இதில் பல முக்கிய முடிவுகள் குறித்து ஆலோசிக்கப்பட உள்ளதாக தகவல் வெளியாகியுள்ளது.
தமிழக வெற்றி கழகம் கட்சியின் முதல் மாநில மாநாடு கடந்த 27ஆம் தேதி நடைபெற்றது. கடந்த பிப்ரவரி மாதம் அரசியல் கட்சியை தொடங்கிய விஜய் பத்திரிகையாளர்களை சந்திக்கவில்லை, தனது கட்சியின் கொள்கை மற்றும் சித்தாந்தம் குறித்து பேசவில்லை என விமர்சனங்கள் எழுந்து வந்தன. இந்நிலையில் இதற்கு பதிலடி கொடுக்கும் வகையில் கடந்த 27ஆம் தேதி நடைபெற்ற மாநாட்டில் கட்சியின் கொள்கை மற்றும் சித்தாந்தம் குறித்து அறிவித்தார் விஜய். மேலும் தனது அரசியல் எதிரி யார் என்பதையும் வெளிப்படையாக அறிவித்த விஜய், திமுகவை கடுமையாக விமர்சனம் செய்திருந்தார். இதனை தொடர்ந்து விஜய்யின் பேச்சு விமர்சனத்துக்கு உள்ளானது. குறிப்பாக திமுக தரப்பிலிருந்தும் நாம் தமிழர் கட்சி தரப்பிலிருந்தும் விஜய்யின் பேச்சுக்கு எதிர்ப்புகள் கிளம்பியுள்ளன.
இந்நிலையில் தமிழக வெற்றிக் கழகம் கட்சியின் ஆலோசனை கூட்டம் இன்று நடைபெற உள்ளது. சென்னை பனையூரில் உள்ள தமிழக வெற்றிக் கழகம் கட்சியின் அலுவலகத்தில் தற்காலிக மாவட்ட நிர்வாகிகள் மற்றும் பொறுப்பாளர்களுடன் இந்த ஆலோசனைக் கூட்டம் நடைபெற உள்ளது. தவெக மாவட்ட நிர்வாகிகள், செயற்குழு உறுப்பினர்கள் மற்றும் அணி தலைவர்கள் கலந்துகொள்ளும் ஆலோசனை கூட்டம் பனையூரில் உள்ள அக்கட்சியின் தலைமை அலுவலகத்தில் இன்று நடைபெற உள்ளது.
தவெக முதல் மாநில மாநாடு சமீபத்தில் நடந்து முடிந்துள்ள நிலையில், அடுத்தகட்ட பணிகள் மற்றும் பொறுப்பாளர்கள் நியமனம் குறித்து இக்கூட்டத்தில் விவாதிக்கப்பட வாய்ப்புள்ளதாக கூறப்படுகிறது. கட்சியின் பொதுச் செயலாளர் புஸ்ஸி ஆனந்த் தலைமையில் ஆலோசனை கூட்டம் நடைபெறவுள்ள நிலையில், இறுதியில் கட்சியின் தலைவர் விஜய் பங்கேற்க உள்ளதாக தகவல் வெளியாகியுள்ளது.
இந்த ஆலோசனை கூட்டத்தில் கட்சியின் நிர்வாகிகள் குறித்து அறிவிப்பு வெளியாகும் என தகவல் வெளியாகியுள்ளது. மேலும் விஜய் சுற்று பயணம் குறித்தும், இன்றைய கூட்டத்தில் ஆலோசிக்கப்பட உள்ளதாக கூறப்படுகிறது. தமிழக வெற்றி கழகம் கட்சிக்கான தொலைக்காட்சி சேனலை தொடங்குவது குறித்தும் இந்த கூட்டத்தில் ஆலோசிக்க வாய்ப்புள்ளதாக கூறப்படுகிறது. சீமான் உள்ளிட்டோரின் விமர்சனங்களை எதிர்கொள்வது குறித்தும் இந்த ஆலோசனை கூட்டத்தில் ஆலோசிக்கப்பட உள்ளதாகவும் தகவல்கள் வெளியாகி உள்ளன.