பாலியல் குற்றங்களை கட்டுப்படுவத்துவதற்கு அரபு நாடுகளில் பின்பற்றப்படும் கட்டுப்பாடுகளைப் போல, இந்தியாவில் தேசிய கொள்கை வரையறுக்கப்பட வேண்டும் என்று விசிக பொதுச் செயலாளர் திருமாவளவன் கூறியுள்ளார்.
இதுகுறித்து, விடுதலைச் சிறுத்தைகள் கட்சி பொதுச் செயலாளர் திருமாவளவன் கூறியுள்ளதாவது:-
பாலியல் வன்முறைகள், பாலியல் குற்றங்கள் நாளுக்கு நாள் அனைத்து மாநிலங்களிலும் பெருகி வருகிறது. தமிழ்நாட்டில் மட்டும் அல்ல. சமூக ஊடகங்களில் இன்றைக்கு பாலியல் தொடர்பான வீடியோக்கள் வெகுவாக பரப்பப்படுகின்றன. இவற்றை கட்டுப்படுத்துதற்கு இந்திய ஒன்றிய அரசு அல்லது மாநில அரசுகள் எந்த முயற்சியையும் மேற்கொள்ளவில்லை என்பது வேதனை அளிக்கிறது.
அரபு நாடுகளில் இதற்கெல்லாம் ஒரு கட்டுப்பாடு உள்ளது. ஆனால், இந்தியாவில் இதுபோன்ற வன்கொடுமைகள் அல்லது பாலியல் குற்றங்கள் பெருகுவதற்கு கட்டுப்பாடற்ற சமூக ஊடகச் சுதந்திரம், யூடியூப் போன்ற வலைதளங்கள் இயங்குவது முக்கியமான காரணமாக சொல்லப்படுகிறது. வல்லுநர்களின் கருத்தாகவும் இருக்கிறது. ஆகவே, தேசிய அளவில் பாலியல் வன்கொடுமைகள், பாலியல் குற்றங்கள் நடைபெறுவதைத் தடுக்க தேசிய அளவிலான கொள்ளை வரையறுக்கப்பட வேண்டும். இதில் இந்திய ஒன்றிய அரசிற்கும், மாநில அரசிற்கும் பொறுப்பு இருக்கிறது.
தமிழ்நாடு அரசு இதுபோன்ற குற்றங்களில் உரிய நடவடிக்கைகளை மேற்கொண்டு வருகிறது என்றாலும், இன்னும் கடுமையான நடவடிக்கைகளை மேற்கொண்டு இதனை கட்டுக்குள் கொண்டு வர வேண்டும் என வலியுறுத்துகிறேன். கர்ப்பிணிப் பெண்ணுக்கு, பள்ளி மாணவிகளுக்கு நேர்ந்த கொடுமை ஆகியவற்றில் விரைந்து காவல் துறையினர் நடவடிக்கை எடுத்திருக்கிறார்கள். இருப்பினும் இதுபோன்ற குற்றங்கள் பெருகாமல் தடுப்பதற்கு உரிய நடவடிக்கைகளை மேற்கொள்ள வேண்டும் என்று வலியுறுத்துகிறேன். இவ்வாறு அவர் கூறியுள்ளார்.