டாஸ்மாக் அலுவலகத்தில் அமலாக்கத் துறை நடத்திய சோதனை தொடர்பான வழக்கை வேறு மாநிலத்துக்கு மாற்றக்கோரி தமிழக அரசு உச்ச நீதிமன்றத்தில் முறையீடு செய்துள்ளது.
சென்னையில் உள்ள டாஸ்மாக் தலைமை அலுவலகத்தில் கடந்த மார்ச் 6-ம் தேதி முதல் 8-ம் தேதி வரை அமலாக்கத் துறை அதிகாரிகள் தொடர் சோதனையில் ஈடுபட்டனர். இந்த சோதனையை சட்டவிரோதம் என அறிவிக்கக் கோரியும் டாஸ்மாக் அதிகாரிகளை விசாரணை என்ற பெயரில் துன்புறுத்தக்கூடாது என உத்தரவிடக்கோரியும் தமிழக அரசு மற்றும் டாஸ்மாக் நிறுவனம் சார்பில் சென்னை உயர் நீதிமன்றத்தில் வழக்குகள் தொடரப்பட்டன.
இந்த வழக்குகளை ஏற்கெனவே விசாரித்த நீதிபதிகள் எம்.எஸ்.ரமேஷ், என். செந்தில்குமார் ஆகியோர் அடங்கிய அமர்வு, இந்த சோதனையின் அடிப்படையில் அமலாக்கத் துறை மேல்நடவடிக்கை எடுக்கக் கூடாது என இடைக்காலத் தடை விதித்தனர். அதன்பிறகு இந்த வழக்கு விசாரணையில் இருந்து இரு நீதிபதிகளும் விலகினர்.
அதையடுத்து, இந்த வழக்கு விசாரணை நீதிபதிகள் எஸ்.எம்.சுப்ரமணியம், கே.ராஜசேகர் ஆகியோர் அடங்கிய அமர்வுக்கு மாற்றப்பட்டது. கடந்தமுறை இந்த வழக்கை விசாரித்த நீதிபதிகள், இந்த வழக்கில் அமலாக்கத் துறையின் பதில் மனுவுக்கு தமிழக அரசு தரப்பில் பதிலளிக்க உத்தரவி்ட்டு விசாரணையை வரும் ஏப்.8-ம் தேதிக்கு தள்ளிவைத்தனர். ஏப்.8 மற்றும் ஏப்.9 ஆகிய இரு தேதிகளில் இந்த வழக்கில் இறுதிவிசாரணை நடத்தப்படும் எனவும் நீதிபதிகள் அறிவித்துள்ளனர்.
இந்நிலையில், இந்த அமர்வில் உள்ள நீதிபதி கே.ராஜசேகர், தமிழக அமைச்சர் செந்தில் பாலாஜிக்காக ஏற்கெனவே ஆஜராகிய வழக்கறிஞர் ஒருவரின் சகோதரர் என்பதால் இந்த அமர்வும் இந்த வழக்கை விசாரிக்கக் கூடாது எனக்கூறி மூத்த வழக்கறிஞர் கே.எம்.விஜயன் உயர் நீதிமன்ற தலைமை நீதிபதி அமர்வில் முறையிட்டார். அப்போது இதுதொடர்பாக சம்பந்தப்பட்ட அமர்விலேயே முறையிட தலைமை நீதிபதி கே.ஆர். ஸ்ரீராம் அறிவுறுத்தினார்.
இந்நிலையில், இந்த வழக்கை சென்னை உயர் நீதிமன்றத்தில் இருந்து வேறு மாநிலத்துக்கு மாற்றக்கோரி தமிழக அரசு சார்பில் மூத்த வழக்கறிஞர் விக்ரம் சவுத்ரி, உச்ச நீதிமன்ற தலைமை நீதிபதி சஞ்சீவ் கண்ணா தலைமையிலான அமர்வில் நேற்று முறையீடு செய்தார். அந்த முறையீட்டை ஏற்ற தலைமை நீதிபதி, இதுதொடர்பாக மனு தாக்கல் செய்தால் வரும் ஏப்.7 அன்று விசாரிக்கப்படும் என தெரிவித்துள்ளார்.