“நாட்டின் பாதையை முன்னோக்கி எடுத்துச் செல்வதில் பெரிய மாற்றத்தை ஏற்படுத்தும் என்பதால் புதிய கல்விக் கொள்கையைச் செயல்படுத்தாத மாநிலங்கள் மறுபரீசனை செய்ய வேண்டும்” என்று குடியரசு துணைத் தலைவர் ஜெகதீப் தன்கர் கோரினார்.
புதுவைக்கு 3 நாள் அரசு முறை சுற்றுப்பயணமாக வந்த குடியரசு துணைத் தலைவர் இறுதி நாளான இன்று புதுச்சேரி மத்தியப் பல்கலைக்கழகத்தில் மாணவர்கள், பேராசிரியர்கள் முன்பாக உரையாற்றினார். அப்போது அவர் பேசியதாவது:-
புதிய கல்விக் கொள்கையை உருவாக்குவது நாட்டின் கல்விப் பயணத்தில் ஒரு திருப்புமுனையாகக் கருதப்படும். இது உலகின் சிறந்த கல்விக் கொள்கைகளில் ஒன்றாகும். இது தாய்மொழிக்கு முக்கியத்துவம் அளிக்கிறது.
புதிய கல்விக் கொள்கை நமது இளைஞர்கள் தங்கள் திறமையையும் ஆற்றலையும் முழுமையாகப் பயன்படுத்த அனுமதிக்கிறது. புதிய கல்விக் கொள்கையை ஏற்றுக்கொள்ளாத மாநிலங்கள் மறுபரிசீலனை செய்ய வேண்டும். மீண்டும் பார்க்க வேண்டும். ஏனெனில் இந்தக் கொள்கை ஒரு பெரிய மாற்றத்தை ஏற்படுத்தும், 2047-ஆம் ஆண்டில் பிரதமரால் திட்டமிடப்பட்டபடி நாட்டை வளர்ந்த நாடாக மாற்றுவதில் புதிய கல்விக் கட்டமைப்பு முக்கிய பங்கு வகிக்கும்.
ஆராய்ச்சி என்பது ஒரு தன்னிறைவு பெற்ற நாட்டின் ஆன்மாவாகும். மேலும் அது ஒரு நாட்டின் பொருளாதாரப் பாதையை வரையறுக்கிறது. நாடு எதிர்கொள்ளும் சவால்களுக்கு மிகவும் பொருத்தமான ஆராய்ச்சியில் ஈடுபடுவதன் மூலம் நாம் அதிக கவனம் செலுத்த வேண்டிய நேரம் இது. 2047-ஆம் ஆண்டுக்குள் வளர்ந்த நாடாக மாறுவதை நோக்கி நாம் முன்னேறிச் செல்லும்போது, உலகளவில் சிறந்த நிறுவனங்களுடன் போட்டியிடும் வகையில் நாடு சிறந்த நிறுவனங்களை உருவாக்க முடியும். நாட்டின் கல்விச் சூழல் அமைப்பில் முதலீடு செய்வதைத் தொழில்களும் நிறுவனங்களும் பரிசீலிக்க வேண்டும்.
இந்த முயற்சியானது கல்வியானது பண்டமாக்கல் மற்றும் வணிகமயமாக்கலால் இயக்கப்படக் கூடாது, மாறாக, இந்தியாவின் பாரம்பரிய குருகுல முறையுடன் ஒத்துப்போக வேண்டும், அறிவுப் பெறுதலுடன் பண்பு மேம்பாட்டை வலியுறுத்த வேண்டும். ‘சேவையாகக் கல்வி’ என்ற இந்த நெறிமுறை தற்போதைய வணிக மாதிரியுடன் முரண்படுகிறது.
நமது நாகரிக, ஆன்மிக சாரத்திலிருந்து விலகி நாம் ஏன் பொறுமையின்றி செயல்பட வேண்டும்? மோதலுக்கு இடமில்லை. உரையாடல் இருக்க வேண்டும். இந்தியா எழுச்சி பெறும் நேரம் இது. நமது அரசியல்வாதிகள் எப்போதும் தேசிய நலன் மற்றும் தேசிய வளர்ச்சிக்குச் செவிசாய்க்க வேண்டிய தேவையைப் பூர்த்தி செய்யாவிட்டால் நமக்கு ஏற்படும் சவால்கள் சிக்கலானதாகிவிடும்.
சனாதன பெருமை மீண்டும் கட்டியெழுப்பப்படுகிறது. இழந்தது வலுவான உறுதியுடன் மீண்டும் கட்டியெழுப்பப்படுகிறது. மொழிகளில் நாம் எவ்வாறு பிரிக்கப்பட முடியும்? உலகில் வேறு எந்த நாடும் நம் நாடு போல் மொழிகளுக்குச் செழுமையாக இல்லை. நாடாளுமன்றத்தில் உறுப்பினர்கள் 22 மொழிகளில் பேசலாம். சனாதனம் நமக்கு ஒரே உன்னத நோக்கத்திற்காக ஒற்றுமையாக இருப்பதைத் தவிர வேறு எதையும் கற்பிக்கவில்லை. இவ்வாறு அவர் கூறினார்.