சமத்துவ நாயகர் என போற்றக்கூடிய வகையில் முதல்வர் ஸ்டாலின் செயல்படுவதாக விசிக தலைவர் திருமாவளவன் புகழாரம் சூடியுள்ளார்
அண்ணல் அம்பேத்கர் பிறந்தநாளான ஏப்ரல் 14ஆம் தேதி சமத்துவ நாளாக கொண்டாடப்படும் என்று தமிழ்நாடு சட்டமன்றப் பேரவையில் விதி 110-ன்கீழ் முதல்வர் ஸ்டாலின் அறிவித்துள்ளார். இதனை அறிவித்த முதல்வர் ஸ்டாலினை சென்னை தலைமைச் செயலகத்தில் விடுதலை சிறுத்தைகள் கட்சி தலைவர் திருமாவளவன் மற்றும் விசிக சட்டமன்ற உறுப்பினர்கள் நான்கு பேரும் சந்தித்து நன்றியை தெரிவித்தனர்.
அதன் பின்னர் செய்தியாளர்களை சந்தித்த விசிக தலைவர் திருமாவளவன், “முதல்வர் ஸ்டாலின் இன்று சட்டப்பேரவையில் 110 விதியின் கீழ் ஏப்ரல் 14 புரட்சியாளர் அம்பேத்கர் பிறந்த நாள் இனி சமத்துவ நாளாக கொண்டாடப்படும் என அறிவித்திருக்கிறார். மேலும் புரட்சியாளர் அம்பேத்கரின் தேர்ந்தெடுக்கப்பட்ட நூல்களை செம்மைப் பதிப்பு எனும் பெயரில் நல்ல தமிழில் மொழிபெயர்ப்பு செய்யப்படும். அம்பேத்கர் மணிமண்டபம் கடந்த 10 ஆண்டுகளாக பராமரிக்கப்படாமல் இருக்கிறது. அதனை மறு சீரமைத்து அங்கே அம்பேத்கரின் முழு உருவ வெண்கல சிலையை அமைக்க வேண்டும், புத்தர் சிலை அமைக்க வேண்டும், அங்குள்ள நூலகங்களை சீரமைத்து மாணவர்களின் பயன்பாட்டிற்கு கொண்டுவர வேண்டும் என விடுதலை சிறுத்தைகள் கட்சி சார்பில் கோரிக்கை வைத்திருந்தோம், அதனடிப்படையில் அம்பேத்கர் மணிமண்டபத்தில் முழு உருவ வெண்கல சிலை அமைக்கப்படும் என அறிவித்திருக்கிறார்.
அரசால் நடத்தப்படும் சமபந்தி போஜனம் என்பதை சமத்துவ விருந்து என மாற்றி அமைக்க வேண்டும் என்ற விடுதலை சிறுத்தைகளின் கோரிக்கையை ஏற்று இனி சமத்துவ விருந்தாக அரசால் நடத்தப்படும் என்ற அறிவிப்பு மிகுந்த மகிழ்ச்சியை தருகிறது.” என்றார்.
சமத்துவ நாயகராக இருந்து இந்த அரசை சமூகநீதி அரசாக நடத்தி செல்லும் முதலமைச்சருக்கு விடுதலை சிறுத்தைகளின் நெஞ்சார்ந்த நன்றியை உரித்தாக்குகிறோம் என்று தெரிவித்த திருமாவளவன், “முதலமைச்சர் துணை முதல்வராக இருந்த பொழுதே பாப்பாபட்டி கீரிப்பட்டி நாட்டார்மங்கலம் கொட்டகாட்சி ஆகிய நான்கு ஊராட்சிகளுக்கு தேர்தல் நடத்தாமல் கிடப்பில் போட்டு இருந்ததை கவனத்தில் கொண்டு அங்கிருந்த எதிர்ப்புகளை எல்லாம் சரிசெய்து அந்த நான்கு ஊராட்சிகளுக்கு தேர்தலை நடத்தினார். தலித் ஊராட்சி மன்றத் தலைவர்களை நாற்காலியில் அமர வைத்த பெருமை முதல்வர் ஸ்டாலினை சேரும. அதனை வரவேற்று பாராட்டும் வகையில் அன்றைய முதல்வர் முத்தமிழறிஞர் கலைஞரை சமத்துவப் பெரியார் என விடுதலை சிறுத்தைகள் கட்சி சார்பில் பாராட்டினோம்.” என்று குறிப்பிட்டார்.